حتا مجال الثرى دى فى السوق تخصصات
هوا تفكير جيد انك تفكر ايه الى عليه طلب فى السوق الان وتتعلمه او تمارسه بمعنى اصح
وايضا كون انك تعرف تو دى - هنقول مثلا فوتشوب وكوريل درو او فرى هاند مثلا دا شىء بردو يدعمك
الشركات الى بتشتغل ثرى دى انميشن عددها بسيط لان كل تكلفتها عالية وبيكون انتاجها للقنوات اكثر حسب خطة التسويق فى كل سنة عندهم

انما اكثر الشركات بتشتغل ثرى دى اعلانات وadv اكتر - لان التكلفة هنا مش بتكون كبيرة ولا تحتاج طاقم مصممين كبير
لان هيا اصلا شركة adv يعنى ممكن تعمل برشورات وايدنتى وفولدرات لشركة ما مثلا ولما يكون فيه booth او جناح لها فى معرض بردو بتعملو - يعنى تشتغل تو دى وثرى دى - ودا سر ان كل الشركات بتطلب مصمم تو دى وثرى دى
يعنى ممكن تصمم جزء معين فى شغلك ثرى دى وبعد كدا تكلمه تو دى - والموضوع ده محتاج خبرة فى توظيف التكوينات بتاعتك

ولما بتشتغل شوية تو دى وشوية ثرى دى انتا بتخرج من مود كل برنامج وتروح للتانى تفرفش معاه شوية
اغلب الشركات دلوقتى بتطلب مصمم تو دى وثرى دى -

هتقولو دا كلام مش حقيقى والمعارضات تشتغل " براحتكم " عيشو وقولو

بص اتعلم حاجة جميلة اوى بما انك معاك ثرى دى كويس تصمم stand - لعرض المنتجات ويكون كامل
تصمم booth لشركة مثلا ويكون مساحة 3 * 3 - ويكون فيه counter وكرسى بار مثلا وباك دروب
تصمم بعد كدا booth او بارتشن بمساحة 10 * 10 او 20 مثلا
تصمم بوديوم وكاونتر وستاند ولايت بوكس وحجات المعارض لان دا مفتاح هتحتاجه كتير فى اغلب شركات الـ adv

الانتاج غالبا بيكون من الخارج او بيكون فيه قسم انتاج فى كل شركة وعارف السوق كويس والحاج فودة والناس دى
لما تصمم حاجة لازم تكون عارف خاماتها من السوق ايه - مش تصميم وبس
يعنى مثلا عملت تكست على الماكس وخليته self illumanation - طيب الوش خامته ايه والإضاءة ازاى كدا
لازم انت هتشرحها للإنتاج
الوش مثلا بيكون اسطمبة بلاستيك عند فلان " مثلا ووالجوانب بلكسى ومن جوا ليدات مثلا

عموما التصنيفات كتير اوى فى السوق وفيه مكاتب هندسية عاوزة المعمارى وفيه الاستديوهات الى بتفتحت وعاوزة كل يوم انتاج دقيقة ودقيقتين وفيه شركات الاعلان الى محتاجة تو دى وثرى دى فى نفس الوقت ويكون كرييتف

لو انت تلميذ فى تخصص بعيد عن الجراف - صدقنى خليك بعيد لان السوق والشركات مفيش حاجة اسمها غلطة ولازم خبرة
هوا ملوش دعوة انت بتعمل دا ازاى هوا اهم حاجة ليه انت شغلك انت يروح للمحاسب فلوس فى الاخر

انت كلامك كله فعلا صح يا باشا انت استاذ والله استاذ انت جبت من الاخر
انا في الحقيقة بشتغل فعلا في الدعايه والاعلان علي البرامج اللي انت ذكرتها دي كلها
فوتوشوب كوريل درو و فري هاند دول هما اللي كنت بشتغل بيهم و بشتغل علي الاي بي ام و علي الابل ماكنتوش يعني تقدر تقول عليا واد بتاع كله الظروف في البلد دي عاوزة واد بتاع كله
بالنسبة بقي للكلام بتاع الاستندات ده اللي انا مفهمتوش
البروشورات انا عملت بروشورات كتير
المشكلة اني مش فاهم السوق عاوز ايه ومحتاج افهم الموضوع اكتر
انا نفسي اشتغل في شركة اعلانات اعمل كام كراكتر كده واحركهم و اعلان ظريف علي مشروع مسلسل زي بتاع كراكيب يعني حاجة زي كده بس الواحد مش عارف يروح فين ولا يروح لمين
و موضوع تلميذ لا يا عم متخفش عليا انا اتمرمطت في السوق شويتين بس عاوز اغير نشاطي وابعد بقي عن المطابع و الاعلانات اللي بتتوزع في الجوامع دي و البروشورات بتاعت المطاعم و الشركات ناهيك بقي عن الكروت الشخصية فعلا انا بحس بملل و انا شغال في الكلام ده ومتنساش الفواتير التجارية والحاجات دي
انا بصراحه عاوز اشتغل في المجال اللي انا بحبه الثري دي كراكتر يضرب كراكتر علي قفاه و كراكتر يوقع في بلاعه الخ
ارجو ان الموضوع ده ميبقاش شخصي بالنسبة ليا عاوز الموضوع يبقي مناقشة لحالة سوق الجرافيك في مصر و الوطن العربي
و ياريت محدش من اصحاب المكاتب ميخشوش ههههههههههههههه
شكرا يا عم شادي علي مرورك و عقبال بقيت الاعضاء علشان نستفيد من تجارب الناس