موضوع: ***على اسم مصر***

ردود: 16 | زيارات: 1312
  1. #1
    عضو متميز
    صور رمزية N.O.B.Y
    تاريخ التسجيل
    Sep 2006
    المنطقة
    Cairo, Egypt, Egypt
    ردود
    1,415

    ***على اسم مصر***

    على اسم مصر
    الجزء الاول
    صلاح جاهين
    النخل في العالي والنيل ماشي طوالي
    مع انه فيه الصـور .. مقلوبة وانا مالي
    يا ولاد أنا ف حالي زي النقش في العواميد
    زي الهلال اللي فوق مدنة بنوها عبيد
    وزي باقي العبيد باجري على عيالي
    باجري وخطوي وئيد من تقل أحمالي
    محنيه قامتي .. وهامتي كأن فيها حديد
    وعينيا رمل العريش فيها وملح رشيد
    كني بافتحها زي اللي اتولدت من جديد
    على اسم مصر
    مصر .. التلات أحرف الساكنة اللي شاحنة ضجيج
    زوم الهوا وطقش موج البحر لما يهيج
    وعجيج حوافر خيول بتجر زغروطة
    حزمة نغم صعب داخلة مسامعي مقروطة
    في مسامي مضغوطه مع دمي لها تعاريج
    ترع وقنوات سقت من جسمي كل نسيج
    وجميع خيوط النسيج على نبرة مربوطة
    اسمعها مهموسة والا اسمعها مشخوطه
    شبكة رادار قلبي جوه ضلوعي مضبوطة
    على اسم مصر
    وترن من تاني نفس النبرة في وداني
    ومؤشر الفرحة يتحرك في وجداني
    وأغاني واحشاني باتذكرها ما لهاش عد
    فيه شيء حصل أو بيحصل أوح يحصل جد
    أو ربما الأمر حالة وجد واخداني
    انا اللي ياما الهوى جابني ووداني
    وكلام على لساني جاني لابد اقوله لحد
    القمح ليه إسمه قمح اليوم وأمس وغد
    ومصر يحرم عليها .. والجدال يشتد
    على اسم مصر
    ولما زماني رماني عليل
    نسيت كل شيء عن حبيبي الجميل
    لكن هو أبداً
    انا مانساهوش
    نسيت مشيته وصوته كان شكله إيه
    ورسمة شفايفه
    ولمسة إيديه
    نسيت نظراته
    نسيت لون عينيه
    وقوس الحواجب وسهم الرموش
    لكن هو أبداً
    انا ما انساهوش
    نسيت إسمه وحكايته وعرفته فين
    وعشنا سوى العمر
    والا يومين
    وكان م البشر
    والا طير بجناحين
    نسيت حتى كان له وجود أو مالوش
    لكين هو أبداً
    أنا ما انساهوش
    قطعوا الأغاني وطارت نشرة الأخبار
    دارت على كل دار في الكوكب الدوار
    يا حاضرين اعلموا الغايبين بأنه في مصر
    اتغير الاسم منذ الآن فأصبح .. مصر
    ضحك التاريخ ضحكته المشهور بها واندار
    ودخل مناقشة مع الجغرافيا عما صار
    هل نعترف بالبيان اللي أذيع العصر
    أم ننتظر مصر تطرد اسرائيل بالقسر
    وساعتها تحصل بكل جدارة يوم النصر
    على اسم مصر

    على اسم مصر التاريخ يقدر يقول ما شاء
    أنا مصر عندي أحب وأجمل الأشياء
    باحبها وهي مالكه الأرض شرق وغرب
    وباحبها وهي مرميه جريحة حرب
    باحبها بعنف وبرقة وعلى استحياء
    واكرهها وألعن أبوها بعشق زي الداء
    واسيبها واطفش في درب وتبقى هي ف درب
    وتلتفت تلقيني جنبها في الكرب
    والنبض ينفض عروقي بألف نغمة وضرب
    على اسم مصر

    مصر النسيم في الليالي وبياعين الفل
    ومرايه بهتانة ع القهوة .. أزورها .. واطل
    القى النديم طل من مطرح منا طليت
    والقاها برواز معلق عندنا في البيت
    فيه القمر مصطفى كامل حبيب الكل
    المصري باشا بشواربه اللي ما عرفوا الذل
    ومصر فوق في الفراندة واسمها جولييت
    ولما جيت بعد روميو بربع قرن بكيت
    ومسحت دموعي في كمي ومن ساعتها وعيت
    على اسم مصر

    مصر السما الفزدقي وعصافير معدية
    والقلة مملية ع الشباك .. مندية
    والجد قاعد مربع يقرا في الجرنال
    الكاتب المصري ذاته مندمج في مقال
    ومصر قدامه اكتر كلمة مقرية
    قريتها من قبل ما اكتب اسمي بإيديا
    ورسمتها في الخيال على أبدع الأشكال
    ونزلت أيام صبايا طفت كل مجال
    زي المنادي وفؤادي يرتجف بجلال
    على اسم مصر

    رحـيـلاً رحـيـلاً بغيـر هـوادة
    رحـيلاً فإن الـرحـيل سعـادة
    عبادة
    إرادة
    سيادة
    ولادة
    رحـيـلا .. إلى أين لـيس يـهـم
    ولـيس يـهـم بأي وسيـلة ..
    أجيـراً بلقمـتـه في البـواخـر ..
    عـلى واحـد من جيـاد القبيلة ..
    على مقعـد في ذرى الجـو فـاخـر
    وتمـلأ الكـأس بنت جمـيلة ..
    على قدمي .. أو بفكري .. أهاجر
    أبادر
    أغادر
    أخاطر
    أسافر
    ولـكـن إلى أيـن .. لـيس يـهـم
    إلى حيث لا تعبـر الأفـق شمس
    إلى القـطب .. أو حلقة الاستواء ..
    إلى حـيث يـسمـع لـلجـن همس
    إلى بـاطـن الأرض أو في الـفضـاء
    إلى مـرفـأ الغـد .. أو أرض أمس
    أرى كل شيء ومن أين جاء
    وافعل ما قاله القدماء
    من الفقراء
    أو الحكماء
    أو الأمراء
    أو الأشقياء أو البلهاء فليس يهم
    لقد قيل وهو الكلام المهم
    اللي يعيش ياما يشوف
    واللي يمشي يشوف اكتر
    شفت الجبرتي بحرافيش الحسين وبولاق
    بان البلد ماشي زي النمس في الأسواق
    بالفلاحين ع المداخل من بعيد وقريب
    بالأرنؤوط بالشراكسة بكل صنف عجيب
    مترصصين سور رهيب مزراق في ريح مزراق
    كأنهم لا بشـر ولا خلقـة الخـلاق
    ومصر فلاحة تزرق بين رقيب ورقيب
    من غير أبو الهول ما ينهض ناهضة شايله حليب
    والصبح بدري الجبرتي ينام وقلمه يسيب
    على اسم مصر

    مصر اللي عمر الجبرتي لم عرف لها عمر
    وطلع لقاها مكان مليان عوام وزعر
    جعيدية غوغاء يجيبوا تملي وجع الراس
    وخليط أفارقه هنادوة روم ملل أجناس
    والترك في القلعة والمماليك خدودهم حمر
    كان عمرها ستلاف سنة .. كلها سنين خضر
    بس الزمان يختلف زي اختلاف الناس
    ناس تبني مجد وحضارة وناس بلا احساس
    وناس تنام لما يزحف موكب الأحداث
    على اسم مصر

    أنا اللي اسمي حتحـور .. أنا بنت رع
    مثـال الأمـومـة ورمـز الحـنـان
    تفـيض حـلمـاتي وتمـلا الـتـرع
    وتسـقـي البـشـر كلهـم والغـيـطان
    أنـا ربـة الحـب حتـحـور أنـا
    أنـا السيـدة المـنـجدة المـغـرميـن
    وكـم مـن محـب ف هـواه انـضـنى
    دعـاني وطيـبـت خـاطـره الحـزيـن
    أنـا طـيبـة انمـا طـبـعي صـعـب
    وديعـه .. ولـو ثـرت بـطشـي مـهـول
    ما اشـوفش اللي قدامي لو ألف شعب
    أدوسـهـم وتجـري دمـاهـم سيـول
    ويـوم رع ما فـات بسنـاه في السـما
    وكل العيـون خايفـة تنـظر اليـه
    وجـالـه القمـر خلقتـه معتـمة
    وعـدى قصـاده .. وضـلم عـليه
    يا ويـل الـلي فتـح في ابـويا العـظيم
    يا ويل من تطاول يا ويل من ضحك
    يا ويـلك يا مصـر مصيرك الـيم
    أنا اللي اسمي حتحور انا ح امسحك
    يحـاول يهـديني رع ما اسمـعـوش
    وادمـر واطـيـح في البلاد والعبـاد
    أنـا الـطيبـه .. كنت زي الوحـوش
    سفـكـت دماء البـنـات والـولاد
    دبـحت المحبـين في عـز القبـل
    هـدمت المعابد على المنشدين
    قلبت على النحـاتين الجبل
    حرقت الغيـطان هم والفلاحين
    لحد ما رع نـادى ع الآلهة
    وقال صـبوا في النهر كل النبيذ
    وشفت الميـاه حمرا ومزهزهة
    وظنيتها دم الضحايا الـلذيذ
    شربت انتقامـاً شربـت شربـت
    وأنا بالـعن المفتـري والغبـي
    وحبـة بحبـة عن الوعـي غبت
    ونمت على النيل في ضي أبي
    وقمت .. بكيت من فؤاد أم ثكلى
    ونهنهت فوق صدر مصر العريض
    على العالم المبدورين جنبي قتـلى
    وكان دمعي ينصب في النيـل يفيض
    واقول ليه يا مصـر ولادك كـده
    يا إمـا المذله يا يتـجبـروا
    يا خوفـي يا فـرحة قـلوب الـعدا
    ويا نـدمـي لو ما يتغيـروا
    ومن يـومها والنيـل في نفس المعاد
    يفيض كل عام قبل فصل الخـريف
    بلون حمرة الـدم يملا البلاد
    ويملا النسـأيـم بعـطر مخـيف
    بعطري أنا الـلي اسمي حتحور أنـا
    وعـطري مخـيف وحـنون وطـري
    يفـرح بس مـرة في كـل سنة
    ويهمس يا مصر اذكـري .. واحـذري
    نهايته يا مصر اللي كانت أصبحت وخلاص
    تمثال بديع وانفه في الطين غاص
    وناس من البدو شدوا عليه حبال الخيش
    والقرص رع العظيم بقى صاج خبيز للعيش
    وساق محارب قديم مبتورة ف أبو قرقاص
    ما تعرف اللي بترها سيف والا رصاص
    والا الخراب اللي صاب عقل البلد بالطيش
    قال ابن خلدون أمم متفسخة تعيش ليش
    وحصان صهل صحى جميع الجيش
    على اسم مصر




    Moustafa NOBY
    ...........


  2. #2
    عضو متميز
    صور رمزية N.O.B.Y
    تاريخ التسجيل
    Sep 2006
    المنطقة
    Cairo, Egypt, Egypt
    ردود
    1,415
    على اسم مصر
    الجزء الثانى
    كتبه صلاح جاهين
    بعد عودته من موسكو
    عام 1971
    ولم يكتمل
    أنا الذي مشيت ادوٌر باشتياق وحنين
    على مصر .. والمشي خدني من سنين لسنين
    لحد ماسنيـنهـا وسنـيني بقم واحد
    وعاصرتها يوم بيوم لم فاتني يوم واحد
    وحضرت شاهد عيان مولد وموت ملايين
    مازعلت من كلمة قد البركة في الجايين
    مين هم دول يا جدع .. ما توحد الواحد
    البركة فينا وفي السامعين بالواحد
    أنا قلتها بنرفزة .. من غيرة الواحد

    على اسم مصر

    مصر الرمال العتيقة وصهدها الجبار
    والنيل كخرطوم حريقه وحيد في وسط النار
    في إيدين بشر نمل رايحه وجاية ع الضفة
    فيهم مطافي وفيهم كدابين زفة
    وفيهم اللي تعالى وقال أنا حكمدار
    وكل باب م البيبان مقفول على اسرار
    وكل سر بحريقة عايزة تتطفا
    من أهلي تندهلي وتقوللي تعا اتدفا
    أنا اللي عمري انكتب إلى يوم ما اتوفى

    على اسم مصر

    على اسم مصر ارفعوا الانخاب واملولي
    شدوا الوتر ع القمر يا شباب وغنولي
    نسكر على حبها بالفن والاحساس
    نسكر ودمع الحماس يملا لنا تاني الكاس
    احنا يا حلوه الفدا بس اطلبي وقولي
    يا سمره بعيون كده وسنتك لولي
    وغنوه الحب تعلا ويسمعوا الحراس
    يصفروا ويحضروا بفرقة طبول ونحاس
    ويتقفل سجن مصر امام عيون الناس

    على اسم مصر

    والمطبعة تدور وتخطف كل إيد منشور
    عيش لسة م الفرن طالع ريحته ريحة النور
    يا فلاحين يا جنود يا طلبة يا عمال
    عدوكم حلف لاستعمار ورأس المال
    عاش الطريق لشتراكي قوم يا شعب وثور
    وحكمكم حكم اقطاعي عميل مأجور
    عاش الكفاح بالسلاح إلى القنال يا رجال
    خلوا حياه لنجليز المستقرة محال
    والشمس نامت ليلتها وفكرها شغال

    على اسم مصر

    القاهرة في اكتئاب والأنس عنها غاب
    من عتمة تدخل لعتمة كأنها ف سرداب
    أو قرية مرمي عليا ضل هجانة
    الحظر م المغربية بأمر مولانا
    ومصر في الليل بتولد والبوليس ع الباب
    صبية ولاٌدة يابا ولحمها جلاب
    طلع الصباح زغرطت في السكة فرحانه
    على كتفها مولودتها لسه عريانه
    وف لحظة كانت جميع الدنيا دريانة

    على اسم مصر

    على كتفها مولودتها وتجري وتنادي
    ياولادي من يوم ميلاد الأرض ياولادي
    ينهض لها امحتب بدواه يقويها
    وبنتاؤر ينشد الاشعار يهنيها
    وسعد زغلول يكح يزلزل الوادي
    وعرابي يهمس ومصر ترد بتمادي
    تقوله آه برضه ثورة جيش وح احميها
    بالدم بالروح بكل حياتي ح افديها
    اما الأسامي معنديش غير اسمها

    على اسم مصر

    مولودة كبرت وشبت في تلات تيام
    من هبة هبت .. لثورة لبت الاحلام
    والعرش عام راح ايطاليا بعيد ورا البراميل
    يا هلترى دي حقيقة والا وهم جميل
    ومصر من إمتى كانت حظها بسام
    ظهر قميص العرق متشمر الاكمام
    أنا شفته عقلي برق وبدأ لصاحبه يميل
    نقشت له ف قلبي احلى وأروع التماثيل
    بدراعي والمطرقة وبإيدي والأزميل


    على اسم مصر .
    Moustafa NOBY
    ...........

  3. #3
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    32
    ردود
    2,260
    ياااااااااااااااااااااااااااااااااااااااااااااااااااااااااااااااه طويله اوي اوي اوي

    انا قريت المطلع و بكره اكملها ان شاء الله

    علي العموم شكرا يا عم نوبي
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  4. #4
    عضو متميز
    صور رمزية althaer
    تاريخ التسجيل
    Jun 2005
    المنطقة
    أينما ذكر اسم الله
    العمر
    36
    ردود
    2,192
    جامده جدا

    روح يا شيخ







    وتعالي تاني بسرعه
    دا وانتي مطلعه عيني ... بحيك مووت

  5. #5
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    32
    ردود
    2,260
    اقتباس الموضوع الأصلي كتب بواسطة noby 3d معاينة الرد

    وحكمكم حكم اقطاعي عميل مأجور

    ايه ده ؟ هوه تنبأ منين الراجل ده بالي حيحصلنا؟؟؟؟؟؟؟؟؟؟؟؟؟؟مش هو مات من زمان باين
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  6. #6
    طالب / مدرسة الأنيميشن
    تاريخ التسجيل
    Jun 2006
    المنطقة
    مصر
    ردود
    7,061
    انت بتصدق الكلام ده













    بهرج طبعا مصر هي أمي وانا أبنها
    شكرا يا نوبي يا عسل

  7. #7
    عضو نشيط
    صور رمزية Nana_Max
    تاريخ التسجيل
    Nov 2006
    المنطقة
    قلب الوطن العربي
    العمر
    32
    ردود
    643
    اقتباس الموضوع الأصلي كتب بواسطة noby 3d معاينة الرد



    باحبها بعنف وبرقة وعلى استحياء

    داااااا حالي مع بلدي
    رضا الناس غايه لا تدرك
    ضحكت فقالوا : الاتحتشم :: :: بكيت فقالوا : الا تبتسم .
    بسمت فقالوا يرائي بها :: :: عبست فقالوا : بدا ما كتم.
    صمت فقالوا : كليل اللسان :: :: نطقت فقالوا : كثير الكلام.
    حلمت فقالوا : ضعيف جبان :: :: ولو كان مقتدرا لانتقم.
    بسلت فقالوا : لبطش به :: :: ولو كان مجترئا لو حكم .
    فأيقنت أني مهما أرد :: :: رضي الناس لابد أن أذم.
    اللهم اغفر لي ما لايعلمون واعصمني مما يقولون واجعلني افضل مما يظنون

  8. #8
    عضو متميز
    صور رمزية N.O.B.Y
    تاريخ التسجيل
    Sep 2006
    المنطقة
    Cairo, Egypt, Egypt
    ردود
    1,415
    اقتباس الموضوع الأصلي كتب بواسطة حسام ماهر معاينة الرد
    جامده جدا

    روح يا شيخ







    وتعالي تاني بسرعه
    هههههههههههههههههههه
    المهم تكون عجبتك يا حسام
    اقتباس الموضوع الأصلي كتب بواسطة mansy1985 معاينة الرد
    ايه ده ؟ هوه تنبأ منين الراجل ده بالي حيحصلنا؟؟؟؟؟؟؟؟؟؟؟؟؟؟مش هو مات من زمان باين
    اه مات من زمان
    بس كان شكله بيتنبأ
    يأما هو كان عايش اوضاع مشابهه
    اقتباس الموضوع الأصلي كتب بواسطة shady sobhy معاينة الرد
    انت بتصدق الكلام ده













    بهرج طبعا مصر هي أمي وانا أبنها
    شكرا يا نوبي يا عسل
    ماتهرجش ياعم فى مواضيعى
    هنلعب بقى ولا ايه
    ههههههههههههه

    العفو يا شادى بيه
    هههههههههههههه

    اقتباس الموضوع الأصلي كتب بواسطة Nana_Max معاينة الرد
    داااااا حالي مع بلدي
    شكرا على مرورك نانا
    وده حالنا كلنا
    بيبان فينا حبنا
    فى عنينا دمعنا
    ينزل على خدنا
    ينزل ويقولنا
    بنحب مصر بجد
    وده حالنا كلنا
    وده حالنا كلنا
    Moustafa NOBY
    ...........

  9. #9
    عضو متميز
    صور رمزية N.O.B.Y
    تاريخ التسجيل
    Sep 2006
    المنطقة
    Cairo, Egypt, Egypt
    ردود
    1,415
    شكل القصيده معجبتكومش
    معلش يا عم صلاح يا جاهين
    زمانهم هايدخولوا يقروها
    Moustafa NOBY
    ...........

  10. #10
    عضو متميز
    صور رمزية N.O.B.Y
    تاريخ التسجيل
    Sep 2006
    المنطقة
    Cairo, Egypt, Egypt
    ردود
    1,415
    قريبا فى مدونتى الرقميه
    للتحميل
    وبالتوفيق
    Moustafa NOBY
    ...........

  11. #11
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    32
    ردود
    2,260
    انا عاجباني القصيده اوي اوي اوي

    و لذلك ارفعها للفائده


    up up up up
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  12. #12
    عضو نشيط
    صور رمزية Nana_Max
    تاريخ التسجيل
    Nov 2006
    المنطقة
    قلب الوطن العربي
    العمر
    32
    ردود
    643
    up up up up
    رضا الناس غايه لا تدرك
    ضحكت فقالوا : الاتحتشم :: :: بكيت فقالوا : الا تبتسم .
    بسمت فقالوا يرائي بها :: :: عبست فقالوا : بدا ما كتم.
    صمت فقالوا : كليل اللسان :: :: نطقت فقالوا : كثير الكلام.
    حلمت فقالوا : ضعيف جبان :: :: ولو كان مقتدرا لانتقم.
    بسلت فقالوا : لبطش به :: :: ولو كان مجترئا لو حكم .
    فأيقنت أني مهما أرد :: :: رضي الناس لابد أن أذم.
    اللهم اغفر لي ما لايعلمون واعصمني مما يقولون واجعلني افضل مما يظنون

  13. #13
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    32
    ردود
    2,260
    up up up up tany
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  14. #14
    عضو نشيط
    صور رمزية Nana_Max
    تاريخ التسجيل
    Nov 2006
    المنطقة
    قلب الوطن العربي
    العمر
    32
    ردود
    643
    اقتباس الموضوع الأصلي كتب بواسطة mansy1985 معاينة الرد
    up up up up tany
    ........
    رضا الناس غايه لا تدرك
    ضحكت فقالوا : الاتحتشم :: :: بكيت فقالوا : الا تبتسم .
    بسمت فقالوا يرائي بها :: :: عبست فقالوا : بدا ما كتم.
    صمت فقالوا : كليل اللسان :: :: نطقت فقالوا : كثير الكلام.
    حلمت فقالوا : ضعيف جبان :: :: ولو كان مقتدرا لانتقم.
    بسلت فقالوا : لبطش به :: :: ولو كان مجترئا لو حكم .
    فأيقنت أني مهما أرد :: :: رضي الناس لابد أن أذم.
    اللهم اغفر لي ما لايعلمون واعصمني مما يقولون واجعلني افضل مما يظنون

  15. #15
    عضو متميز
    صور رمزية N.O.B.Y
    تاريخ التسجيل
    Sep 2006
    المنطقة
    Cairo, Egypt, Egypt
    ردود
    1,415
    up up up up
    Moustafa NOBY
    ...........

  16. #16
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    32
    ردود
    2,260
    اقتباس الموضوع الأصلي كتب بواسطة mansy1985 معاينة الرد
    up up up up tany
    again and again and again
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل