مسرحية المنابر

[فلاشــــــــــاوي]

مسرحية المنابر
-----------------------------------------
في يوم من الأيام .. قرر العضو "متفائل جدا" أن يطرح فكرة مشروعه الذي اعد له كثيرا على أعضاء المنابر لتكوين فريق صغير لعمل هذا المشروع .. المشروع عبارة عن فيلم قصير لطفل في الصف الثاني الإبتدائي يتعرض لموقف في مدرسته يجعله في مأزق بين الإختيار بين الإسلام ووطنيته وولاءه لبلده .. ومع أحداث القصة نفاجأ بان الفتى الصغير جاء بحل رائع يجعله يخرج من المأزق دون التضحية باي الامرين ويثبت للجميع أنهما ليسا متعارضين بل أن الوطنية جزء من الدين .. هكذا دخل إلى المنابر .. بدأ بتسمية الله ثم ضغط على ذلك الزر اللعين "أضف موضوع جديد" .... وهنا بدأت الأحداث ..
( ملحوظة .. أسماء الاعضاء المستخدمة هنا من خيالي..وإن صادف وشابه أحدها عضو هنا ..فهو من قبيل المصادفة ليس إلا )

:: متفائل جدا ::
السلام عليكم يا شباب ..
عندي مشروع لعمل فيلم قصير .. أعددت القصة وكمان تصميم الشخصيات على الورق وعملت story board مبدأية يمكن التعديل عليها فيما بعد .. القصة لطفل في الصف الثاني الإبتدائي يواجه موقف في مدرسته جعله في مأزق بين الإختيار بين الإسلام ووطنيته وولاءه لبلده .. ومع أحداث القصة نفاجأ بان الفتى الصغير جاء بحل رائع يجعله يخرج من المأزق دون التضحية باي الامرين ويثبت للجميع أنهما ليسا متعارضين بل أن الوطنية جزء من الدين ..
أنا كما أخبرتكم بدات في الموضوع ..وأريد تكوين فريق من سبعة أفراد أنا وستة أخرين ..يوزع العمل كالتالي ..

1 موديلير للشخصيات من البلو برنتس الجاهزة عندي ..هناك ثلاث شخصيات في القصة ..
1 موديلير للبيئة من بناء المدرسة وفناءها وبعض التفاصيل الاخرى ..
1 لإخراج العمل من الماتيريالز والإضاءه وعمل ريندير
1 لعمل ريجينج للشخصيات ( انا )
2 أنيماتورز ..
1 فيديو إديتور وكمان تركيب للصوت ...
البرنامج المستخدم هو الماكس .. فياريت اللي هيشتركوا يكون بيستخدموا الماكس مش برامج تانية ..يا ترى مين فيكم حابب يشارك معايا لعمل الفيلم ده ... مستنيكم لتكوين الفريق ..

::تلميذ فالح ::
جميل جدا .. أنا معاك ..انا بشتغل فوتوشوب وبور بوينت كويس خالص ..

::متفائل جدا ::
شكرا على الرد .. لكن مظنش اننا هنحتاج حد فوتوشوب أو بور بوينت ..أحنا بنعمل فيلم قصير حضرتك ..

::تلميذ فالح ::
وماله ..ده البور بوينت جامد جدا .. ده بيعمل حاجات حلوة قوي ..

::متفائل جدا ::
شكرا يا استاذ تلميذ فالح ..اول ما هنحتاجلك هنطلبك ..

::تلميذ فالح ::
هتطلبوني إمتى ؟؟

::متفائل جدا :
أما نحتاجلك يا استاذ تلميذ فالح هنطلبك ...وياريت كفاية كده عشان باقي الأعضاء تهتم بالموضوع ..

::نسر الدين ::
تصميم ذوات الأرواح حرام يا اخي .. أنجو بنفسك يوم لا ينفع مالا ولا بنون ..

::متفائل جدا ::
شكرا يا اخي نسر الدين على النصيحة .. ولكني اخذت بالرأي الاخر للعلماء بجواز هذا .. والقصة كما ترى تخدم الدين ..بارك الله فيك على النصيحة على كل حال ..

::نسر الدين ::
وسيعلم الذين ظلموا أي منقلب ينقلبون ..!!

::متفائل جدا ::
ليه كدا بس يا استاذ نسر ... ظلموا إيه بس ..دا انا واخد باراء علماء كبار ..

::أبو صلاح ::
إقتباس (وسيعلم الذين ظلموا أي منقلب ينقلبون ..)
بارك الله فيك يا اخي نسر الدين .. واضيف من عندي قوله تعالى "الزانية والزاني فاجلدوا كل واحد منهما مائة جلدة " ..

:: متفائل جدا ::
أستاذ أبو صلاح .. إيه علاقة الزانية والزاني بموضوعنا هنا .. مفيش اي علاقة .. وقولنا يا جماعة أن إحنا خدنا بالرأي اللذي يجيز هذا ..فياريت منتكلمش في موضوع الحرمانية ..ونتكلم في المشروع الفعلي ..

::أبو صلاح ::
إقتباس (إيه علاقة الزانية والزاني بموضوعنا هنا .. مفيش اي علاقة)
أعوذ بالله من غضب الله .. انت كمان مش عاجبك كلام ربنا ..!!

:: علام ::
إسمحلي يا استاذ متفائل جدا .. القصة سخيفة جدا .. دين ووطنية مع ولد في تانية إبتدائي .. إيه العقد دي .. أنتو لازم تحشروا الدين كدا في كل حاجة .. لو عاوز تعمل فيلم حلو يبقى تخلي الولد ده مثلا بيحب البنت زميلته في الفصل ..وبحاول يظهر نفسه قدامها وكده .. حتة أمريكاني يعني .. العيال هيموتوا في الفيلم .. وسيبكوا بقى ما الدين ووجع الدماغ ده هتعقدو الاطفال الصغيرين حرام عليكم ..

:: نسر الدين ::
إقتباس (وسيبكوا بقى ما الدين ووجع الدماغ ده)
كيف تسمح إدارة الموقع لمثل هذا العلماني القذر بان يضع مثل هذا الرد ..

:: علام ::
أنا قذر يا إرهابي ..جاتكوا القرف مليتوا البلد ..

:: ابو صلاح ::
صدقت يا اخي نسر الدين .. لقد كثر الخبث في المنتدى .. يبدو أن إدارة المنتدى يعجبها هذا الحال ..

:: مشرف ::
تم عمل ban للعضو علام .. نياهاهاهاههاهاهاهاههههههههااااا (ضحكة الأشرار في افلام الكارتون )

:: متفائل جدا ::
يا استاذ ابو صلاح ..انا مقولتش ان الاية مش عجباني حاشا لله ..انا بقول أن ده مش مكانها ..
يا أستاذ علام .. أنا بحاول اعمل فيلم ليه هدف نافع ..اللي انت بتقول عليه ده فن هدام ..

:: بن ناس ::
أحييك على الفكرة يا أستاذ متفائل .. بس ياريت تدي الفيلم طابع إسلامي اكتر .. ومتخفش تصميم الشخصيات مش حرام .. بالرغم من أني شايف انك لو حطيت موسيقى تصويرية في الفيلم هتبقى حرام ..عشان شايف ان الموسيقى حرام بس تصميم الشخصيات مش حرام ..عشان انا بحب تصميم الشخصيات جدا ..

:: متفائل جدا ::
شكرا يا أستاذ بن ناس .. بس مش فاهم يعني إيه أدي الفيلم طابع إسلامي أكتر .. ممكن توضح .. وهل حضرتك مستعد أنك تكون أول مشترك معانا في الفريق ..

:: بن ناس ::
يعني الولد بطل القصة يكون ملتحي مثلا ..

:: فلاشاوي ::
يعني يا بن ناس أنت شايف تصميم الشخصيات مش حرام بس الموسيقى حرام .. أنت بتاخد اللي على مزاجك يعني ولا إيه ..

:: أكرم ::
وانت مالك يا فلاشاوي يا بارد بتدخل نفسك في ما لا يعنيك ليه .. هو حد كان وجهلك أنت الكلام .. ده انت مستفذ ..

:: فلاشاوي ::
وانا تاعبك في إيه يا استاذ اكرم .. هو انا كنت كلمتك انت .. لو أنا أدخلت نفسي فيما لا يعنيني ..فانت عملت نفس الموضوع بكلامك ليا ..

:: متفائل جدا ::
فلاشاوي واكرم .. أنتوا جايين تتخانقوا في موضوعي .. من فضلكم أحترموا الموضوع ..فين المشرفين ..؟؟؟

:: مشرف ::
إحنا موجودين .. ومفيش حد خالف القوانيين ..خليك في نفسك أحسن لك بدل ما أعملك ban إنت كمان ..نياهاهاهاههاهاهاهاههههههههااااا (ضحكة الأشرار في افلام الكارتون )

:: متفائل جدا ::
........... رد محذوف من قبل المشرف .........

:: متفائل جدا ::
ممكن أعرف أنت حذفت ردي ليه ؟

:: مشرف ::لا مش ممكن ... نياهاهاهاههاهاهاهاههههههههااااا (ضحكة الأشرار في افلام الكارتون )

:: أكرم ::
فلاشاوي .. انت حالة ميئوس منها ..أنا أنسحب من النقاش ..

:: فلاشاوي ::
أحسن إنك إنسحبت .. فانت لا تجيد النقاش اصلا ..

:: أكرم ::
طب أنا رجعت تاني هأو هأو هأو ( ضحكة محمود المليجي في فيلم رصيف نمرة خمسة )

:: متفائل جدا ::
إقتباس ( يعني يكون الولد بطل القصة يكون ملتحي مثلا ..)
يا أستاذ بن ناس ..بطل القصة ولد في تانية إبتدائي ..هيبقى ملتحي إزاي بس ..؟؟!!

:: بن ناس ::
أنت بتتلكك ...طب خلاص بقى بالعند فيك ..تصميم الشخصيات حرام ..حرام ..حرام ..

:: أبو صلاح ::
إقتباس (...طب خلاص بقى بالعند فيك ..تصميم الشخصيات حرام ..حرام ..حرام ..)
عودا حميدا أخي بن ناس .. نجيت نفسك من المهالك ..

:: متفائل جدا ::
يا نااااااااااس ياهووووووووو ..حرام عليكم إحنا أتكلمنا في كل المواضيع ما عدا الموضوع الأساسي .. عاوز اعمل الفيلم حرام عليكم ..

:: فلاشاوي ::
بعد عشر ساعات من دروس السباحة نجح فقط في أن يتعلم (عدم الغرق) !

:: متفائل جدا ::
قصدك إيه يا أستاذ فلاشاوي ..؟؟

:: أكرم ::
إقتباس (قصدك إيه يا أستاذ فلاشاوي ..؟؟)
متخدش في بالك .. هو فلاشاوي كده بيتمنظر بكلمتين عارفهم مالهمش لازمة .. في كل موضوع يدخل يقول كلمتين ويطلع وعامل فيها حكيم زمانه ..

:: مكساوي جامد ::
أنا مستعد أشترك معاك في المشروع يا استاذ متفائل جدا .. انا بستخدم الماكس ..النهاردة أخيرا قدرت اثبت البرنامج وادخله السيريال صح .. ونزلت كام درس حلوين وهبتدي اتعلم النهاردة ..استناني انت بس وهتشوف العجب ..

:: متفائل جدا ::
انا شفت العجب خلاص يا استاذ مكساوي .. بس مظنش اننا هنقدر نستناك أما لسه هتتعلم .. يمكن في مشاريع مستقبليه إن شاء الله

:: مكساوي جامد ::
يعني انتوا بدأتوا محترفين على طول .. إيه الغرور ده ..عموما أنتوا الخسرانيين

:: مشرف ::
أستاذ متفائل جدا ..إحترم باقي الأعضاء حتى المبتدأين منهم ..وإلا ساضطر لحذف ردودك أو إيقاف عضويتك ..وإذا لزم الامر ..ربما تفجير جهازك عن بعد .. نياهاهاهاههاهاهاهاههههههههااااا (ضحكة الأشرار في افلام الكارتون )

:: ابو قمر ::
الماكس اصلا برنامج فاشل .. ولا يقارن بالسينما فور دي بأي حال ..

:: متفائل جدا ::
أستاذ ابو قمر .. كل برنامج وليه مميزاته ..مفيش داعي نناقش المقارنة بين البرنامجيين هنا ..

:: أبو قمر ::
طبعا مفيش داعي للمناقشة ..لان المناقشة محسومة أصلا لصالح السينما من قبل أن تبدأ ..

:: متفائل جدا ::
طيب .. براحتك يا سيدي ..الله يحرق الماكس على اللي بيستخدموه سوا ..

:: ابو صلاح ::
إقتباس (..الله يحرق الماكس على اللي بيستخدموه سوا ..)
الف مرة ..!!

:: ميدو ::
يا له من موضوع جميل يا أخي .. ويالك من عضو رائع .. هدأ أعصابك أخي .. أشرب فنجاناا من القهوة ..او كوبا من الليمون مع أني لا احب هذا الاخير ..خذ هذه

:: صاحب ميدو ::
فرحت بمشاركتك يا ميدو ..كم انت تحب الاخرين وتحب ان تنصحهم يا اخي ..خذ هذه

:: جار ميدو ::
ميدو يا ريت متركنش عربيتك قدام باب بيتنا يا اخي ..ما تركنها قدام بيتكم ...خذ هذه

:: بن خال ميدو ::
هنزوركم النهاردة على الفطار ..يا ريت تكونوا محضرين اكل كويس ..خذ هذه

--------------------------------------------------
أثناء هذه المحادثة .. سقط العضو متفائل جدا مغشيا عليه أمام جهازه وكانت حالته خطرة جدا ..مكث في المستشفى ثلالث ايام ثم عاد ..وحينما عاد وجد موضوعه ما زال نشطا ..!!
--------------------------------------------------

:: قريب ميدو من بعيد ::
الأقلام الرصاص لا تصلح أبطالا لافلام الكارتون فعلا يا ميدو .. يالك من رائع

:: علوان ::
يا ريت نفرق بين الدين وبين علماء الدين يا جماعة ..

:: نسر الدين ::
إقتباس (يا ريت نفرق بين الدين وبين علماء الدين يا جماعة ..)
كشفت عن وجهك القبيح أخيرا ... أي الإدارة وكيف تسمح للعلمانيين بأن يصولوا ويجولوا في المنتدى ..

:: مشرف ::
تم عمل BAN للعضو علوان .. نياهاهاهاههاهاهاهاههههههههااااا (ضحكة الأشرار في افلام الكارتون )

:: متفائل جدا ::
يااااه أنتوا لسه بتتكلموا في الموضوع ... !!

:: ابو عبدو ::
إقتباس (يااااه أنتوا لسه بتتكلموا في الموضوع ... !!)
وهو حضرتك مين اصلا ..

:: متفائل جدا ::
أنا صاحب الموضوع ..!!

:: ابو عبدو ::
ياااااااااه .. هو الموضوع اصلا كان عن إيه عشان أنا جيت متأخر ..!!

:: متفائل جدا ::
الموضوع كان عن الشكليته .. هاهاهاهاهاههاهاهاهااووووووووووو (ضحكة شمشون قل ان يهوى على رأسه المعبد )

:: مشرف ::
إقتباس (الموضوع كان عن الشكليته .. هاهاهاهاهاههاهاهاهااووووووووووو)
تم عمل BAN للعضو متفائل جدا ..لعدم إحترامه لباقي الأعضاء ولمواضيعه التي تثير الجدل والفتنة بين الأعضاء ..نياهاهاهاههاهاهاهاههههههههااااا (ضحكة الأشرار في افلام الكارتون ).


أسدل الستار .... يا ستااااااااااااااار ..

[فلاشــــــــــاوي]

الفكرة مقتبسة من موضوع قديم لحسام ماهر

[ابوبدر]

وصلت الرسالة وكل لبيب بالاشارة يفهم

[Dimension]

رائع.
خمس نجوم على الموضوع.
~sion

[althaer]

هههههههههه

عملتها يا برادعي
------------------------------
مع الأسف مسرحية متكررة

لكن طريقة تثبيت البرازيل غابت عن السيناريو

[mo3allem]

موتني على نفسي من الضحك حرام عليك ... نيااااهاهاااااهاههههههه ( لا ديه ضحكة عادية ) .

[Qemum]

"الزانية والزاني فاجلدوا كل واحد منهما مائة جلدة " ..

-

يعني الولد بطل القصة يكون ملتحي مثلا ..

-

(...طب خلاص بقى بالعند فيك ..تصميم الشخصيات حرام ..حرام ..حرام ..)

-

النهاردة أخيرا قدرت اثبت البرنامج وادخله السيريال صح

-

يا له من موضوع جميل يا أخي .. ويالك من عضو رائع .. هدأ أعصابك أخي .. أشرب فنجاناا من القهوة ..او كوبا من الليمون مع أني لا احب هذا الاخير ..خذ هذه

-

:: جار ميدو ::

nice parody flashawy

8 stars

[aktoom]

مسرحية المنابر
-----------------------------------------


:: أكرم ::
وانت مالك يا فلاشاوي يا بارد بتدخل نفسك في ما لا يعنيك ليه .. هو حد كان وجهلك أنت الكلام .. ده انت مستفذ ..




أسدل الستار .... يا ستااااااااااااااار ..

هههههههههههههههههههههههههههه
عجبتني كثير
بس هذا إسمي الحقيقي وعالمكشوف
بس الآراء مش بتاعتي

أعتبره تشابه أسماء
فلاشاوي صدقني بحبك
خذ هذه

[y@sser]

نياهاهاهاههاهاهاهاههههههههااااا (ضحكة الأشرار في افلام الكارتون )

[إبن يس]

طب و ليه كده يا فلاشاوى ^_^
مين إبن ناس ده
على فكرة أنت عايز الناس يا معاك فى كل حاجة يا عليك فى كل حاجة ^_^
معلش أنا فهمت كده من مسرحيتك
أعذرنى على فهمى القاصر ^_^

[Qemum]

مين إبن ناس ده

فضحت حالك ..... يا بلندراوي ! لول ...

طبعا في بيني وبينك مزح صح ؟

[althaer]

المسرحية القديمة ...
http://www.maxforums.net/showthread.php?t=37863

[زند الاسى]

هههههههههههههههههه
موتنى من الضحك والله
اضحك الله سنك

بس لو لسه فى مكان ممكن اشترك معاكوا فى الفيلم ؟؟؟

[عامر]

فيه شخصيتين تشابه شخصيتي


فلاشاوي انتا منحاز لرأي واحد ...

والعياذ بالله

[EXPHINE]

عيوني دمعت من الضحك
أحلى حاجة ::مشرف:: و ::ميدو:: و ::جماعة ميدو::