موضوع تأخر كثيرا

[فلاشــــــــــاوي]

موضوع كنت أود الحديث فيه هنا منذ فترة وكنت أتكاسل أو أؤجله .. لكن اظن أنه لا يمكن تأجيله أكثر من هذا ...
الموضوع خاص بصغار السن في المنتدى تحديدا من هم اقل من او في حدود 18 سنة ...


بص يا حبيبي .. أنا أكبر منك بــ 5 سنوات على أقل تقدير وقد تصل للــ 10 سنوات لبعض الأعضاء ممن تصل اعمارهم إلى 13 عام فيا ريت تسمع مني ..
لو كنت فاكر أنك لسه صغير وما زال العمر قدامك طويل وتقارن نفسك بباقي أعضاء الكبار هنا وبتقول لنفسك أنا اكيد أما هبقى في سنهم هبقى أحسن كتيير تبقى أنت حتة عبيط بتضيع عمرك .. يا حبيبي فوووووق ... !!!

لازم تعرف اولا هو العمر في مجالنا ده بيتحسب إزاي .. لأنك واضح إنك فاهم الموضوع غلط خالص .. !!

عمرك في المجال بيتحسب من الوقت اللي اتوفرتلك فيه الظروف لدخول المجال يعني ممكن يكون عندك 16 سنة بس أتوفرلك كمبيوتر ونت ومعرفة إسم المجال وأنت عندك 13 سنة .. غيرك عمره 30 سنة لكنه لم تتوفر له هذه الظروف إلا من عامين .. لو أضفنا إلى هذا أن الأصغر سنا تكون قدرته على التركيز أكثر مع الأستيعاب .. ستعرف أنك أنت من يضيع منك العمر أكثر من الشخص الأكبر ..

فرصتك أنك تثبت نفسك وتوصل لمستوى يستحق قبل ما تكمل 20 ... لو كملت 20 من غير ما تعمل حاجة .. يبقى غالبا عمرك ما هتعمل حاجة ..!!

مش قصدي بــ "تعمل حاجة" .. إنك تنجز إنجاز كبيير .. لأ .. بس على ألأقل تكون عرفت وحددت المجال اللي هتكمل فيه عمرك ومشيت فيه عدة خطوات .. لكن مش كل شوية نبص ورا .. وانا هبقى مبرمج ..لا مصمم جرافكس .. لا ويب .. لا ديكور .. لا انيماتور .. لا مالتيميديا .. طب اجرب الأفتر إفيكتس .. طب السينما .. لا خلاص انا هرجع للماكس .. ولا أتعلم مايا .. ولا أسيب ده كله وادخل كلية طب..!! .. ده إسمه عبط ..عمرك يا مسكين .. لو بتقول لنفسك هستنى وأعمل بجد بعد إنتهاء الدراسة .. يبقى عمرك ما هتعمل بجد أبدا .. المفروض انك تخلص دراسة وتدخل على سوق العمل على طول .. مش لسه هتتعلم ..

ما تبصش للناس المعقدة اللي عمالين يرموا شماعات فشلهم على البلد اللي بايظة .. اه البلد بايظه .. واه الحكومة فاسدة .. بس أنت هتعاقبهم بأنك أنت تفشل !! هل ده أسلوب تفكيير .. يا سيدي أتعلم لنفسك مش للبلد .. أنجح لنفسك مش للبلد .. طظ في البلد .. في كلا الحالتين البلد بايظة ... فعلى الأقل إنفع نفسك ..

جميل إنك تكون متحمس .. خاصة وأنت لسه صغير .. ده شيء طبيعي .. بس في نوع من الحماس بيجييب لورااا .. إحلم بأن تصعد لقمة الجبل .. لكن ما تحلمش إنك تنقل الجبل من مكانه .. ما ينفعش .. وما تبقاش عبيط وتقولي لا بالعزيمة والإصرار هنقل الجبل من مكانه .. هتضيع عمرك وفي النهاية هتكتشف اللي كان مفروض تكتشفه من زمان .. هتكتشف إنه جبل ..!!


أنا بيتحرق دمي كل ما اشوف حد صغير ودماغه كويسه لكنه بيتفنن في تضييع عمره وعامل إن هو لسه قدامه العمر كله يجرب ويضيع زي ما هو عايز .. لإن كان نفسي تتوفرلي أنا الظروف لدخول المجال ده من زمان ... أنا لم أمتلك حاسب شخصي سوى من 6-7 سنوات .. لم أكن أعرف شيئا عن الكمبيوتر وقتها تقريبا .. ثم أجد أن هناك من توفر له الكمبيوتر وهو عنده 12 عاما .. تصيبيني غبطة .. لو كنت أنا هذا الشخص لكنت في مستوى أخر الان ..

إلى كل من يخصهم هذا النداء .. أمامك فرصة كبيرة أن تصبح أكثر من مجرد شخص ناجح .. فلا تضيعها ...

أخص بالذكر عضوين مصريين .. أضع فيهم أمل أن يفعلوا شيئا ...

mo3allem ... أشعر أنه ذكي فعلا .. أتمنى أن يستمر في تعلمه للسينما بدون إنقطاع البرنامج واعد بشكل لا يمكن تصوره .. فرصتك في أن تكون أفضل عربي يستخدم هذا البرنامج أراها متاحة جدا .. ربما تكون يوما مسؤلا عن مكتب ماكسون في الشرق الأوسط .. او ما هو أكبر .. نصيحتي .. أهتم بالدراسة ولا تترك السينما ابدا .. مووت نفسك في تعليمه .. تطرق للفروع التي لا يهتم بها الكثيرين .. كالكوفي والإكسبريسو .. حاول أن تختار في دراستك أقرب الكليات لهذا المجال .. وبالله عليك مهما حصل .. ما تدخلش طب ...!!

النصيحة التانية لو ليك أي علاقة بالمدعو عمرو جيتس إقطعها فورا .. الواد ده صحوبيته بتجييب لوراااا ..!!

عمرو جيتس ... دماغه حلو جدا أعترف .. لكن ساعات بحس إن فيك عرق عبط مش عارف ليه .. سرعة إستيعابك مذهلة وبتتعلم بسرعة .. قدرتك على أن تحصل على مجموع 98.3 % في الثانوية العامة بالرغم من أنك لا تترك الماسنجر لحظة فهي بالتأكييد تعني أنن تستطيع عمل الكثير في وقت قليل .. هذا طبعا لو إستبعدنا إنك جبت المجموع ده بالغش .. وده إحتمال وارد ..أنا ما أستبعدوش ..!!

سيب الماسينجر شوية حرام عليك .. وحاول تحدد المجال اللي هتكمل فيه عمرك .. صدقني ممكن تبقى حاجة ..

يا ريت تصاحب الواد mo3allem ممكن تستفادو من بعض كتيير .. بس غالبا هو هيرفض لإني أنا نصحته من سطرين فاتوا إن ما يصحباكش ..!!

[y@sser]

نسيت احمد المصري ويوسف 4 دي وغيرهم الكثير
ومن غير المصريين ابو دبابه
اعتقد ان الجيل الجديد فرصتة افضل كثير

[رغدوو]

أخي فلاشاوي موضوعك رائع وعن جد جاء في وقته بالنسبة لي
كلامك جدا رائع وبرضو تفكيرك ..
بس أنا مستغربة من حاجة وحدة.. ليش كاتب المنطقة (في القاع دائما)
حاسة في تناقض بين هدا وبين كلامك ..
ممكن توضح لي

[mohheader]

هههه ^_^

احنا خلاص عجزنا

بس بمناسبة الموضوع ده

اخي الصغير 10 سنوات ...
عندما رأاني وانا العب مع احدا برامج الثري دي
طلب تعلمه

وحاليا بحاول اعلمه
^_^

على رأي ياسر
فرصته احسن ^_^ ( بس يارب نهتم بيهم ... ) ^_^

سلام

[فلاشــــــــــاوي]

نسيت احمد المصري ويوسف 4 دي وغيرهم الكثير
ومن غير المصريين ابو دبابه
اعتقد ان الجيل الجديد فرصتة افضل كثير

أحمد المصري فعلا رائع بالنسبة لسنه .. لكن مش عارف ليه حاسس إن هو مش عايز .. في موضوع سابق ٌال إنه عاوز يبقى مهندس معماري .. كل مهاراته دي ملهاش إي علاقة بالهندسة المعمارية .. مش عارف .. أنا نفسي الولد ده فعلا يستغل مهاراته ويطورها .. لكن فعلا بحس إن هو مش عايز ..

في صغار سن كتيير .. فيهم من ترى فيه الأمل .. وفيهم من تعرف أن هذا هو أعلى ما وصل إليه ومنذ الان وصاعدا سيبدأ في الإنحدار .. الأمر لا يتوقف على مهارات فقط .. بل على طريقة تفكيير .. وهذا الشخص قرر أن يكون ذو أفق منغلق منذ البداية بالرغم من مهاراته في شيء معين .. لكنك تعلم أنها ثمرة وإن كان شكلها واعدا الإن إلا أنها لن تنضج أبدا ... هذا رأيي على كل حال

[فلاشــــــــــاوي]

بس أنا مستغربة من حاجة وحدة.. ليش كاتب المنطقة (في القاع دائما)
حاسة في تناقض بين هدا وبين كلامك ..

في واقع الأمر .. أنا شخص يحب السخرية دائما .. أكثر من الازم .. واعترف أنها لا تكون دائما في مكانها الصحيح لهذا يخطيء الكثيرون فهم ما اريد قوله .. لكي تفهمي كلامي لاحظي دائما علامات التعجب فيما أكتب .. أنا أكثر شخص في الكون يستخدم علامات التعجب ..!! ... إي لوحة مفاتيح موجودة على اي جهاز من التي اعمل عليها سواء في العمل أو المنزل ستجدين مفتاح علامة التعجب ممسوح تماما من كثرة الإستخدام ..!!

[رغدوو]

حتى لوكنت بتحب السخرية بس في المستقبل حتأثر فيك هدي الكلمة
ماني عارفة من أول مادخلت المنتدى وشفت هدي الكلمة حسيت إنك إنسااااااان محبط من الحياة
ههههههههه (لاتزعل هدا رأي فيك أول مادخلت بس موضوعك غير وجهة نظري)

[Social]

right , you should really stop using exclamation marks ,
they are everywhere
<no pun is intended>

[مجنون rigging]

فعلا الموضوع جيمل جدا اخي الحبيب انا شخصيا كنت متيما بالثري دي منذ الطفولة وكنت اقف امام شاشة التلفاز اشاهد الناس وهم يلعبون وانبهر بالثري دي ولا اضى ان اللعب عندما يطلب مني لأني كنت استمتع اكثر بالملاحضة واكتشاف هذا العالم دون تضيع الفرصة في البحث عن الحلول للعبة وكان لي اخ يدرس في المدرسة العليا للفنون وكان مفروض عليه ان يتعلم بعض الأشياء على الثري دي وبتالي كان يحضر معه بعض الكتب الخاصة بالثري دي ماكس حينها فقط بدأت ادخل هذا العالم ولم اكن املك كمبيوتر فوالدي يعتبره الة ترفيه ولا يريد ان نضيع وقتنا فيه لكني منذ ذالك الوقت احسست ان لي اندفاع غير عادي لثري دي وكنت اقرا الكتب الضخمة التي يحضرها اخي كاملة والمكتوبة بالفرنسية رغم اني لا افهم فيها شيئ وكان كل حلمي ان املك جهاز كمبيوتر حتى اني كنت اعمل في الصيف بكل جهدي لكي احصل بعض المال لعلي اشتري واحدا الى ان حصلة على واحد منذ عام ونصف تقريبا الكثيرون قالو لي انك ستفقد تلك الحماسة مع امتلاكك لواحد لكني كنت متاكد من العكس وفعلا كان العكس فقد تحولت الرغبة الى هوس ثم شيئ اخر فوق الهوس لدرجة اني احلم ثري دي ولا اجد تعبيرا ابلغ من هذا وبحمد الله استطعت ان اختصر الطريق بشكل كبير وان اعوض كامل الحرمان الذي عنيته من خلال تكثيف ساعات التعلم حتى غطة كل الساعات الموجودة في اليوم
انا اعتقد ان هذا الحرمان هو ما يساعد الأسنان لينطلق بعيدا جدا في اقصر الأوقات وان توفر جميع الضروف الملائمة والوقت الكبير سيكون عامل تثبيط اكثر منه عامل في صالح الفرد
انا لدي سرعة النت 128 اي اني احمل الديفيدي في اكثر من اسبوع وانتضر اسبوعا ليكتمل الذي بعده وانا سعيد جدا بهذا لأنه يدفعني لتعلم اكبر قدر ممكن من الديفيدي الأول في انتضار الثاني بينما الذي يملك سرعة النت 1و2ميجا لا اعتقد ان له الوقت ليستمتع بشيئ

[Steady Cam]

فقط تنويه اخي العزيز .. لك و للجميع .. يرجى الكتابة بالعربي الفصحى ليفهمك الجميع ..
لم افهم كيف تحولت كلمة ( كيف ) الى ( إزاي ) !

[shady sobhy]

أخي فلاشاوي
عندما ارى اسمك اقفل الفايرفوكس وافتح الماكس أو اشاهد دروس

بالعربي الفصيح اهو أخي احمد
حلوة كلمة (أهو)

[maya-max]

تنوية خالد المحروقى دخل مجال الجرافك وهو فى سن 27 او 28 تقريبا وهو انجح مصمم عربى فى وجهه نظرى
اما البداية المبكرة فهى جيده ولاكن الدراسه عائق كبير جدا من مذاكرة وامتحانات الى اخرة والجرافك لايحب الشراكة

ممكن انصح الشباب الصغير انه يركز فى الدورات الكبيرة مثل سيسكو او اى تى او ياخد دورات فى الادارة من الجامعات التعليم عن بعد كجامعه اكسفورد ويسبوا من التعليم الحكومى لان المهندسين تعبانين والدكاترة إلى اخرة سوق العمل عايز شهادات وخبرات ولا ينظر للشهاده الحكومية التعليم باختصار فاشل

[أحمد عابد]

عمرك في المجال بيتحسب من الوقت اللي اتوفرتلك فيه الظروف لدخول المجال

انا متوفر لى الكومبيوتر من و انا عندى 6 سنين و لم تتوفر لى
ظروف دخول مجال الثريدى الا و انا عندى 23 سنة !!

يعنى من كم شهر تقريبا .

[إبن يس]

ما تبصش للناس المعقدة اللي عمالين يرموا شماعات فشلهم على البلد اللي بايظة .. اه البلد بايظه .. واه الحكومة فاسدة .. بس أنت هتعاقبهم بأنك أنت تفشل !! هل ده أسلوب تفكيير .. يا سيدي أتعلم لنفسك مش للبلد .. أنجح لنفسك مش للبلد .. طظ في البلد .. في كلا الحالتين البلد بايظة ... فعلى الأقل إنفع نفسك ..

ديه عقيدة الأنانى الفاشل الذى لا يريد إلا نفسه ....
قوله أنجح و أنفع دينك و بلدك و أمتك ...
خلى عندك عقيدة ..الملاحدة عندهم عقيدة للنجاح لبلادهم و أحنا عندنا دينا بيقول لنا لازم نكون الأعلى و الأوائل فى كل شئ ..

و مش هدخل فى جدال ..لإنك أكيد فى النقطة ديه غلط ^_^

[MiND ViSiON]

الخبرة لا تقاس بعدد الايام والسنين الخبره تقاس بعدد التجارب وقوتها