موضوع: من ملفات أمننا القومي, للي عنده أمن قومي

ردود: 12 | زيارات: 1149
  1. #1
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585

    من ملفات أمننا القومي, للي عنده أمن قومي

    المكان : المقر السري لجميع الأبطال السريين الذين يعملون في سرية تامة (هتلاقي إعلان عن المقر في القناة التانية)

    الزمان : أواخر "القرن" العشرين وبدايات "القرن" الحادي والعشرين بتوقيت عزية "أبو قرن"

    الحدث : تهديد جديد للبشرية ... برعي بتنجانة يهدد بتفجير سلطانية مسقعة وسط ميدان رمسيس سابقا (الفاضي حاليا)

    ---------------------------------------

    كان المقر كله يعج بالنشاط والتوتر في نفس الوقت , بسبب تهديدات سيد بتنجانة أحد الهاربين من "مستشفى العباسية لعلاج المهلبية"

    وهناك أمام لوحة عملاقة تحمل خريطة مصر - وقد تراصت عليها العديد من النقاط الحمراء والخضراء والصفراء في نظام يشبه خط قمل في شعر واحدة قرعة - وقف شخص ضخم الجثة عريض المنكبين .. من الآخر كده "فتوة ابن بلد" يرمق الخريطة في صمت أشبه بقبور السيدة عائشة الساعة تلاتة بليل ...

    فجأة .... رن الهاتف الذي يجاوره ... فضربه بكف يده في براعة ... لتطير السماعة ناحيته فيمد يده ليلتقطها و .............


    طااااااااااااااخ ...

    أصابت السماعة رأسه الضخمة في الصميم لتنطلق من فمه كلمات كالشلال :

    - آه يا بنت حمير مصر كلهم في package واحدة ... ده أنا ممكن أعصر رقبة أمك وأوديكي في ستين داهيـــــ ............

    - إيه يا فهلوي الألفاظ السكر ديه ... انت تقصد مين ياض انت ؟؟؟

    أجفل فهلوي فجأة حين سمع ذلك الصوت الأنثوي ووجد فمه ملاصقا للسماعة بينما تنطلق ألفاظه كصواريخ لا تعرف هدفها ....

    أمسك السماعة بسرعة وهو يقول في توتو :

    - لا مؤاخذة يا معلمة سونيا ... أنا كنت بكلم السماعة ...

    سونيا : سماعة ؟؟؟ .... سماعة إيه يا راجل يا سماعة ....... نهايته يا عم الأهتم ... إيه آخر التطورات ؟؟؟

    فهلوي : مشاكل يا ريسة ... مشاكل ... حاولت أكلم الرجالة زي ما قلتيلي

    - وإيه اللي حصل ؟؟

    - الواد باتمان بيقول ميقدرش يخرج غير بليل عشان ظروف نظره ... وعم بانيشر بيصفي 3 عصابات مافيا في بوركينا فاسو

    - والواد سبايدر زفت

    - سبايدر مان مسكته شركة مكافحة حشرات ... ومش عايزين يصدقوا غنه بني آدم لابس عنكبوت ... عايزين ورقة عليها ختم النسر عشان يسيبوه

    - ستين ختم على دماغ اللي خلفتهم ... أنا هوريهم بعد ما نخلص ... طب وفانتاستيك فور ؟؟

    - الراجل الطويل أبو تيلة بيقول مش هيقدر يسيب المخفية عشان هي حامل ... والواد المولع جاله برد فمبيطلعش نار ... أم عمنا الحجر جاتله ليونة في العظام

    سونيا : بلوة إيه دي يا ربي ... اومال الصعاليك دول بياخدوا فلوس على إيه من الحكومة ؟؟؟

    فهلوي : طب والحل يا معلمة ؟؟

    - أووووووووف ... مفيش قصادنا حل غيره

    - انتي متأكدة ... ده مرة خلى النيل كله ملوخية ومرة تانية عمل برج القاهرة إيريال تلفزيون ...... ده غير إنه آخر مرة كان هيفرقع السد العالي وهوه بيسلك المجاري

    - ماهو مفيش حل تاني ... اتصل بيه على موبايله خلينا نخلص ... أوكي ؟

    - أوكي يا معلمة ... ممكن .... ممكن أسألك سؤال ؟؟

    - قول يله خلينا نخلص ...

    - أخبار أدهم البوي فريند بتاعك إيه ... مسمعتش حسه من فترة ...

    - متفكرنيش ... أصله اتنيل فاق وافتكر إنه مصري ... قمت رزعاه قلم خلاه ينسى ودانه اليمين فين .... وبعدين ده وقت يا منيل ... اخلص واتصل بالواااااااااااد ...

    - حاضر حاضر يافندم ... هدي الجمجمة وأنا هجيبه لحد عندك ...


    -----------------------------------------------------------

    المكان : عربية فول في دار السلام

    فرغلي : اخلص يا عم حربي وربك ... خلينا نروح شغلنا

    عم حربي : متستنى يا أستاذ ... الله .... عالم عُجلية صحيح

    فرغلي : يا عم لا عُجلي ولا حاجة ... بس أنا هيتخصملي لو اتأخرت .. ولو اتخصملي هقعد بقية الشهر بآكل من أم العربية دي

    عم حربي : هههههههههههه .... خلاص ... خليك ... أهو هنستفاد من جيبك العفر ... هههههههههههعععععععععع

    كاد فرغلي يشمر عن ساعديه ليجعل هذا الـ "عم حربي" يحس بعسر في الهضم وتمزق في شرايين العنق من يديه عندما يخنفه

    لكن فجأة ... وجد يدا قوية تربت على كتفيه ...

    - هدي أعصابك يا فرغلي بك ... مش عاوزينك تتهور

    لمح فرغلي الرجل ذي البدلة السوداء والنظارة السوداء والتي تحمل شعارا أسود مكتوب عليه بالأسود م.س.ج.أ.س.ذ.ي.ف.س.ت وتحتها بلون أسود برضه بس بفونت كبير شوية (المقر السري لجميع الأبطال السريين الذين يعملون في سرية تامة)

    أخذ منه الراجل اللي كله أسود في أسود النص جنيه اللي كان في إيده ومد يده إلى عم حربي وقال له : هاتله بنص جنيه فول يا عم حربي عشان مجبلكش الصحة تقفلك الليلة دي

    ازدرد عم حربي ريقه كمن وقفت في حلقه بطيخة قرعة ... ثم ناوله الفول بيد مرتعشة .. وفرغلي يتابعه وهو يردد "آه يا راجل يا ناقص ... متجيش غير بالعين الكاروهات "

    ناوله الرجل كيس الفول المزيت وهو يقول : ياريت تشرفنا شوية يا أستاذ فرغلي

    ردد فرغلي باستسلام :" حاضر يا سيدي ... بس ... هوه كان لازم يعني تاخد النص جنيه ؟؟؟ "


    -------------------------------------------------------------

    المكان : رجعنا المقر تاني

    جلس فرغلي على كرسي أمام شاشة كبيرة تحمل صورة المعلمة سونيا وهي تردد :

    -أستاذ فرغلي ... ويلكم باك

    - أهو انتي ... ومش عايز غلط بعد إذنك

    - طيب طيب يا عم الدهل ... المهم ... عايزينك في مهمة

    - خير ؟؟؟ .... مش انتو كنتو رفدتوني وشيلتوا التأمينات الاجتماعية مني ... عايزيني ليه دلوقتي ...

    - معلش ... وقت العوزة , تحلى الموزة ....

    - مش فاهم !!!!!!!!!!!!!!!!!

    - وانت من امتى بتفهم ... نهايته ... هنرجعك تاني ... بس عايزينك في قضية برعي بتنجانة

    - بخصوص سلطانية المسقعة ؟؟

    - أيوه ... مش عايزينه يفجرها ...

    - ليه ؟؟؟ ... ده الشعب هياكل ويتبسط ...

    - ياكل ؟؟؟ .... يتبسط ؟؟؟ .... انت اتجننت يا راجل انت ... ناقص تقولي ... ويفكر !!!!!!!

    - وإيه المشكلة ...

    - المشكلة يا روح طنط إنه لو فكر ... الميغة والفل اللي احنا فيه هيطير في الهوا شاشي ...

    - طيب طيب .... المهم تميغيني معاكو وتبعيديني عن عم حربي اللي كفَّر سيئاتي ...

    - طيب .... عايزينك تزنق برعي بتجانة .... وتخلصنا منه ... وبعدها, هتعيش في عزبة العز طوووووووووووول عمرك ...

    -----------------------------------------------

    المكان : ميدان رمسيس سابقا (الفاضي ابن الفاضي حاليا)

    الحدث : برعي بتنجانة يهدد بتفجير السلطانية إياها وعناصر الأمن تحاصر المكان ومن ورائها الشعب يهتف بحياة برعي وبطولته

    برعي في المايك : لازم الحكومة تستجيب للمطالب ... وإلا هفجر السلطانية دي للشعب الجعان

    وزير الداخلية في المايك التاني : اعقل يا برعي ... وقولنا إيه طلباتك

    برعي : رغيف عيش محترم ... مرتب كويس ... شقة يعيش فيها البني آدم ويفضل بني آدم

    الشعب : يا بتجانة يا بتنجانة .. احنا معاك وانت معانا

    الوزير : طلبك صعب جدا .... ممكن نعملكوا حل مبدئي .... أقراص عيش تصرفوها من الصيدلية ... مع حفظ الحق المادي للسرقة للسادة المسئولين ...

    برعي بأسف : مفيش فايدة في أمكو ... أنا هفجر السلطانية

    الشعب : فجر فجر فجر ... خلي الشعب يسكر

    فجأة .... ينقض أحدهم كالبرق على برعي ... يخطف جهاز التفجير ويلقيه بعيدا ... ثم يخطفه بعيدا عن الأنظار .... راسما ورائه غبارا يحمل حرفه الأول

    ف

    فرغلي

    فرغلي القرني

    ---------------------------------------------

    الصحف الحكومية في اليوم التالي :

    "وفاة برعي بتنجانة مسلوقا بعد فشل مخططه الإرهابي "

    " تكريم فرغلي القرني لبطولته في التخلص من برعي"

    "الشعب سعيد بوفاة برعي ... ويقول : برعي ده راجل وحش ... ربنا يخليلنا الحكومة"

    "الشعب يتوجه للرز بلبن كبديل صحي لعيش الجمعية "








    تمــــــــــــــــــــــــــــــــــــــــــــــــت


  2. #2
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    32
    ردود
    2,260
    اقتباس الموضوع الأصلي كتب بواسطة maxspider معاينة الرد
    الشعب : يا بتجانة يا بتنجانة .. احنا معاك وانت معانا


    ---------------------------------------------


    "الشعب سعيد بوفاة برعي ... ويقول : برعي ده راجل وحش ... ربنا يخليلنا الحكومة"

    هههههههههههههههههههههههههههه جامده موت بس دي احلي حته
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  3. #3
    جميل جدا أخي يوسف المصررين شعب مميذ .


  4. #4
    ضياء الدين
    صور رمزية diaaking
    تاريخ التسجيل
    May 2004
    المنطقة
    مصر
    العمر
    30
    ردود
    3,679
    ههههههههههههههههههههههههههههههههههههههههه
    ماشي انا هبعت الموضوع ده علي السيت بتاع عم حربي ...
    وشوف مين بعد كدا هيديك فول
    الحياة ألم يخفيه أمل
    أمل يحققه عمل
    وعمل ينهيه أجل
    ثم يجزى كل امرئ بما فعل

  5. #5
    عضو قدير
    صور رمزية esamdrsh
    تاريخ التسجيل
    May 2005
    المنطقة
    أبو ظبي
    العمر
    32
    ردود
    8,607
    هههههههههههههههههههههههه
    روعه يبني والله اسلوبك خطير
    ومدي شويه على اسلوب نبيل فاروق

    سؤال كده .. ايه هي السلطانيه دي؟

  6. #6
    عضو متميز
    صور رمزية y@sser
    تاريخ التسجيل
    May 2003
    المنطقة
    جوانتانامو مصر
    ردود
    10,884
    برعي : رغيف عيش محترم ... مرتب كويس ... شقة يعيش فيها البني آدم ويفضل بني آدم
    برعي ده طماع اوي
    سؤال كده .. ايه هي السلطانيه دي؟
    السلطانيه لفظ يطلق في مصر علي وعاء للطعام يشبه خوذه الجنود في العصور الوسطي
    وحاليا بيلبسه المجانين في دماغهم
    يعطي ايحاء بأنك سلطان
    بلاد الكوارث
    حيث جميع الشعب وجلاديه يبحثون عن العقل والقلب والشجاعه المفقودين
    لكن للاسف لاوجود للساحر اوز
    وتنتهي القصه بفقد الحذاء الاحمر
    وتبقي اليس في بلاد الكوارث للابد

    مدونتي

  7. #7
    عضو قدير
    صور رمزية esamdrsh
    تاريخ التسجيل
    May 2005
    المنطقة
    أبو ظبي
    العمر
    32
    ردود
    8,607
    السلطانيه لفظ يطلق في مصر علي وعاء للطعام يشبه خوذه الجنود في العصور الوسطي
    وحاليا بيلبسه المجانين في دماغهم
    يعطي ايحاء بأنك سلطان
    __________________
    ااااااه
    ههههههههههههههههههههه فكرته مكان في مصر ..
    شكرا ليك ياسر

  8. #8
    عضو متميز
    صور رمزية maya-max
    تاريخ التسجيل
    May 2005
    المنطقة
    مصر-المنصورة
    العمر
    35
    ردود
    1,889
    مين المعلمه سونيه؟
    والشعب قال !!!!!!!!!!!! كلمه مش قادر اصدقة ولا هصدقها
    الناس الى بتتكلم متأجره أو خايفه وبتحاول تتطول اى حاجه

    التقييم بعد لما نعرف مين سونيا
    كتابى لتعليم برنامج مايا بالعربى
    http://aegypt72.googlepages.com/1.doc
    تعلم الانجليزية على ضمانتى
    http://maxforums.net/showthread.php?t=120347&page=2
    إسطونات محادثه(جمل+قطع) إنجليزى عربى
    http://maxforums.net/showthread.php?t=139351
    أكثر من مائة جملة للغة الانجليزية تساعدك على التحدث
    http://maxforums.net/showthread.php?t=108633

  9. #9
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة mansy1985 معاينة الرد
    هههههههههههههههههههههههههههه جامده موت بس دي احلي حته
    تسلم يا منسي ... وسلملي على الكشك إياه ^_^
    اقتباس الموضوع الأصلي كتب بواسطة samran معاينة الرد
    جميل جدا أخي يوسف المصررين شعب مميذ .
    متشكر يابو سمرة ... سعيد أنها أعجبتك ^_^

    اقتباس الموضوع الأصلي كتب بواسطة diaaking معاينة الرد
    ههههههههههههههههههههههههههههههههههههههههه
    ماشي انا هبعت الموضوع ده علي السيت بتاع عم حربي ...
    وشوف مين بعد كدا هيديك فول
    لااااااااااااااااااااااااااااااااا .... اعمل في معروف ومتبعتش الله لا يسيئك ... انت عايزنا ننقرض O_o

    اقتباس الموضوع الأصلي كتب بواسطة esamdrsh معاينة الرد
    هههههههههههههههههههههههه
    روعه يبني والله اسلوبك خطير
    ومدي شويه على اسلوب نبيل فاروق

    سؤال كده .. ايه هي السلطانيه دي؟
    متشكر يا عصام ... أعتقد فعلا إني متأثر بأسلوب د.نبيل ... وأظن ياسر جاوب على سؤالك
    اقتباس الموضوع الأصلي كتب بواسطة y@sser معاينة الرد
    برعي ده طماع اوي

    السلطانيه لفظ يطلق في مصر علي وعاء للطعام يشبه خوذه الجنود في العصور الوسطي
    وحاليا بيلبسه المجانين في دماغهم
    يعطي ايحاء بأنك سلطان
    أنا برضه قلت كده يا عم ياسر ... برعي ده شكله مش من البلد دي ^_^

    اقتباس الموضوع الأصلي كتب بواسطة esamdrsh معاينة الرد
    ااااااه
    ههههههههههههههههههههه فكرته مكان في مصر ..
    شكرا ليك ياسر
    هوه مكان برضه في مصر ... هتلاقيه في العباسية حيث أعقل المجانين

    اقتباس الموضوع الأصلي كتب بواسطة maya-max معاينة الرد
    مين المعلمه سونيه؟
    والشعب قال !!!!!!!!!!!! كلمه مش قادر اصدقة ولا هصدقها
    الناس الى بتتكلم متأجره أو خايفه وبتحاول تتطول اى حاجه

    التقييم بعد لما نعرف مين سونيا
    سونيا بتاعة أونكل أدهم ... وكفاية لحد كده ... احنا بنربي ولايا

  10. #10
    عضو متميز
    صور رمزية ehabrashad
    تاريخ التسجيل
    May 2005
    المنطقة
    مصر
    ردود
    2,414
    فكرتني لماذا اخترع الشعب المصري الأرجوز
    كل اناء بما فيه ينضح
    إذا جائتك الضربات من اليمين ومن اليسار فاعلم انك من أهل الوسط

  11. #11
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    أهم حاجة يا هوبة إن برعي ما يكونش ليه دخل ... كفاية التهم اللي عليه ^_^

  12. #12
    مشرف منبر عرض و نـقــد
    صور رمزية Jassar
    تاريخ التسجيل
    Oct 2006
    المنطقة
    بانتظار عودة الخلافة
    ردود
    8,389
    هههههه, كمان جزء من سلسلة يوسف!
    أفكارك جهنمية فعلا
    في النظام الديمقراطي (والذي هو مخالف للإسلام قلبا وقالبا), يسمح للشواذ أن يتزوجوا رسميا
    وكل حاكم يحكم بهذا النظام, وإن ادعى أنه إسلامي, فهو يؤمن بهذه الحرية..

    موقعي الشخصي | صفحة الفيسبوك الرسمية

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل