في ناس الله يهديهم يرسل لك إيميل فيه ملف docx وبعض هالناس هم مديري جماعة أو جمعية يعني قاعد ابو الشباب يرسل ملفات ماتنفتح إلا ببرنامج واحد وإصدار واحد من هالبرنامج وهو وورد 2007.

ماأريد من الموضوع هذا إلا أفضفض عصبيتي من هالحركة الغبية..

إذا انت مدير جمعية لازم تفهم أنك تتعامل مع ناس والناس هذي تختار نظام التشغيل والبرامج اللي تشغلها.. لما ترسل ملف docx مانريد نقول انك تجاهلت كل مستخدمي برامج أوفيس غير مايكروسوفت أوفيس، ومانريد نقول أنك كنسلت من قائمتك كل الناس اللي تشتغل على أنظمة تشغيل لم يصدر لها مايكروسوفت أوفيس مثل لينيكس لأن الناس بعدين تقول ليش قاعد تستخدم نظام تشغيل متخلف أو برامج متخلفة (هذا اللي يظنه طبعا).
لكن ياأخي شنو ذنب اللي عنده ويندوز وأوفيس بس يختار أنه يستخدم أوفيس أقدم من 2007 لأي سبب من الأسباب، سواء حجمه على ال hard disk أو متطلباته اللي تحتاج انك تغير كمبيوترك اللي لسا ممكن يكون مفيد، أو واجهة استخدامه أو أو.. الخ

سمعت في شركة كبيرة في السعودية جربت وندوز فيستا على أساس تطور أنظمتها بعدين كنسلت الفكرة من أساسها لأنهم اكتشفوا أنهم لازم يغيرون كل كمبيوترات الشركة (اللي يوصل عددها لأكثر من مية ألف) عشان يشتغل فيستا..

لذلك لازم الناس تفهم أنك تقدر تختار نظام التشغيل وتقدر تختار قدرات الجهاز اللي عندك أو اللي تريد تشتريه وأنك تقدر تختار البرامج اللي تشغلها.. في ناس لسا مو مستوعبة أن الخيار موجود وبس تقول ماأريد أحدث جهازي ينعتونك بالمتخلف وكمبيوترك من العصر الحجري ومامنه فايدة والعالم كله راح لل docx وانت بعدك على أنواع ملفات قديمة..

هذا كله تعودت عليه نسبيا لكن القشة اللي قصمت ظهر الحمار أن الملفات اللي تنرسل مافيها أي خاصية تستدعي أن الملف يخزن مو بس بصيغة docx أصلا ولا doc.. كل اللي عامله كاتب كم كلمة في صفحة ومخزنها وراسلها.. يعني لو استخدم ال Notepad كان أسرع له وكان قدر يوصل لشريحة أكبر لأن ملفات ال txt مافي كمبيوتر مايقدر يفتحها.. فمو راضي يستوعب أن الناس تقدر تختار ولاهو قاعد يستفيد من خصائص تستدعي أن الملف يخزن بصيغة docx..

أحيانا بس أصادفه وانا طالع من العمل ودي أدوسه بسيارتي، بس هذا حيجيب وجع راس من نوع ثاني وانا اللي فيني مكفيني