صفحة 1 من 3 123 أخيرأخير
النتائج المعروضة من 1 الى 20 من مجموع 45

موضوع: فانتازيا فرعونية - بناء الهرم

ردود: 45 | زيارات: 3517
  1. #1
    عضو متميز
    صور رمزية فلاشــــــــــاوي
    تاريخ التسجيل
    Jan 2006
    المنطقة
    مـــــصــــــر
    العمر
    33
    ردود
    3,802

    فانتازيا فرعونية - بناء الهرم

    فانتازيا فرعونية - بناء الهرم

    مفيش كلام إن الملك خوفو فرح جدا وكان بوده يرقص عشرة بلدي - او بلده هو - عندما فرشوا له ورقة البردي الهائلة التي تتضمن رسما هندسيا للهرم الاكبر المزمع بناءه .. ذلك الرسم الذي تفتقت عنه عبقرية مهندس صغير يفترض المؤرخون أن إسمه حور .

    الشخصيات
    حور - مهندس الهرم
    سمنخرع - كبير الكهنة
    توت - المقاول اللي إتكلف ببناء الهرم !
    خوفو - الملك طبعا


    حور : المساحة يا مولاي 13 فدان .. فدان ينطح فدان .. وطول كل ضلع من أضلاع الهرم الأربعة 233 متر والإرتفاع 145 متر .. وعدد الاحجار 2.3 مليون حجر .. تقريبا يعني . متوسط وزن الحجر 2.5 طن .. والعبقرية بقى يا مولاي إننا مش هنستخدم حديد تسليح خالص .. وبالتالي هنوفر فلووس بالهيل بعد ما شركة عز - رع للحديد خلت طن الحديد بـ 8000 جنيه ومش موجود غير في السوق السودة .. !!

    سمنخرع : وكمان يا مولاي غرفة الدفن هتبقى على البحري .. عشان الهوا المنعش يدخل عليك وانت ميت !! .. والاهم عشان تبقى مواجهة للنجم القطبي الذي لا يغيب ابدا رمز للخلود اللي مستني جنابك في جنات أوزوريس إن شاء رع !!


    توت : والميزانية يا مولانا ملمومة خالص وحاجة على الأد .. مش هتستنزف موارد الدولة ولا حاجة .. هما كلهم 10 مليون جنيه !! .. طبعا مولانا عارف وهو سيد العارفين .. أن مشروع زي ده لا ممكن يتكلف أقل من كده .. وحياة رع العملية دي مخسرة معايا أصلا !!



    خوفو : طب وده يخلص على إمتى ده ؟؟

    حور : مش قبل خمس سنين يا مولا....

    توت : خمس سنين إيه .. معلش يا مولاي أصل حور لسه صغير .. وشرفك يا مولاي أنا أخلصهولك في سنة واحدة بس أنت إدفع العشرة مليون وبعدي يبقى يحلها رع !!

    سمنخرع : وببركة رع ممكن يخلص قبل سنة كمان !!

    حور : إنتوا بتتكلموا إزا...

    توت و سمنخرع : إخرس إنتا !!

    خوفو : بس انت مش شايف يا توت أن 10 مليون كتيير حبتين ؟ .. في الواقع كتيير 3 حبات !!

    توت : إزاي كتير يا مولاي .. طب ده حضرتك سيد العارفين إن مشروع زي ده محتاج مش أقل من خمسين ألف عامل .. وبما إن الهرم هيتبني في الجيزة فأحنا محتاجين ننقل ملايين الاحجار من الشاطيء الشرقي للنيل للشاطي الغربي .. إتخيل بقى حضرتك كم الزوارق والمراكب اللي محتاجينها .. دانا هبني إسطول زوارق مخصوص .. وبعدين متنساش العمال اللي هتقطع الجارة اصلا .. وكل العمال دي مش محتاجة أكل .. ده كل عامل من دول ما يسدش جوعة غير وجبة كنتاكي مع واحدة بيبسي كانز على الاقل .. ومع ذلك .. حتى لو قضيناها عيش وخص وبصل .. برضو محتاجين فلوس كتيير يا مولاي .. طب ده أحنا كمان عايزيـــ ....

    خوفو : .. خلاص .. خلاص ... أمرنا بـ 10 مليون جنية ..

    - فأمتلأت الحجرة بالرياح نتيجة لتنهدات الإرتياح التي ملأت الحجرة ..

    خوفو : وهتبدأوا الشغل إمتى ؟

    توت : من بكرة يا مولاي طبعا

    سمنخرع : على بركة رع !

    - وفي الحقول والقري نودي على الفلاحين .. انهم ليس عليهم أن يبقوا بدون عمل خلال الفترة التي يمتنع فيها الزراعة بسبب موسم الفيضان .. فهناك مهم جليلة يمكنها ان تبقيهم على عمل دوام العام .. مهمة بتشييد أعظم بناء عرفه التاريخ .. الهرم الخالد الذي سيكون مثوى لجسد الملك الإله ..

    وبعد مرور الفترة التي حددها توت .. ذهب الملك لرؤية الهرم ... لكنه طبعا أصيب بخيبة أمل كبيرة ...حيث انه لم يجد حتى خمس الهرم قد تم إنجازه !!

    خوفو : يا ولاد الجزمة ... بتستكردني يا توت أنت وسمنخرع .. أنتوا مش قايلينلي سنة وهايكون خلص !!

    توت : المهمة مش سهلة يا مولاي .. دول تقريبا إتنين ونص مليون حجر !

    خوفو : وحياة أمك .. !! .. ما أنت عارف ده من زمان .. !

    - هنا تدخل سمنخرع لتهدئة الوضع .. خاصة وان الملك بدأ يفقد السيطرة على ألفاظه .. !!

    سمنخرع : تجهيز حجرة الدفن ليك يا مولاي وحده أخد 6 شهور على الاقل .. أحنا عاوزين حاجة تلييق بمقامك .. أنت متاخدش أقل من 6 أشهر .. !!

    خوفو : بتقول إيه ..!!

    سمنخرع : قصدي حجرة دفن حضرتك متاخدش اقل من 6 اشهر إهتمام يا مولاي ..

    خوفو : أااه .. أنا أفتكرتك تقصد حاجة تانية !

    - هنا أنتهز توت لحظة هدوء الملك وقال ..

    توت : وبعدين الميزانية خرمت شوية يا مولاي ... الـ 10 مليون مبقوش ينفعوا ...!!

    خوفو : بتقول إيه يا خويا !!

    توت : يا مولاي هناك اشياء إستجدت لم تكن في الخطة .. .. كل حاجة غليت يا مولاي .. الحديد غلي .. والبنزين غلي .. و ...

    خوفو : أنت هتستعبط يا توت .. إحنا فراعنة لسه معرفناش البنزين ياد .. !!

    توت : أ.. قصدي .. الدقيق غلي يا مولاي .. والعيش بقى ما يكفييش خالص .. ده غير إننا بنينا للعمال عنابر يعيشوا فيها .. وغير المصاريف الإدارية .. أصل إحنا عملنا لجنة للإحصاء تنبثق منها عدد لجان خاصة بإحصاء الأحجار واخرى للعمال واخرى للغذاء وهكذا .. ده غير مصاريف الكرابيج !!

    خوفو : كرابيج !! .. كرابيج إيه ؟

    سمنخرع : اللي انت متعرفوش يا مولاي إن في موجة ألحاد أنتشرت في عدد كبير من العمال وبدأوا يتساءلون عن القيمة الدينية لهذا كله .. اليس مجرد قبر .. فلماذا لا يدفن الملك في قبر مثل باقي القبور !! ... لكن متخافش يا مولاي .. دول كانوا قلة قليلة مندسة !! .. وإحنا إحتاجنا الكرابيج عشان نقنعهم بالقيمة الدينية لهذا كله !! ..

    خوفو : طب خلاص خلاص .. عاوزين كام ؟

    توت : كمان 10 مليون ...

    خوفو : أه يا إبن الـــ ...

    سمنخرع : .. الكرابيج يا مولاي الكرابيج .. أنت نسيت ولا إيه .. !!

    خوفو : طيب خلاص .. أمرنا بــ 10 مليون كمان ... وهتخلصوا إمتى إن شاء رع

    توت : بعد سنتين يا مولاي ..

    سمنخرع : على بركة رع !!

    - وبما أننا نعرف تماما أن بناء الهرم إستغرق 20 عاما فلك ان تدرك ان خوفو كان له كل الحق في أن يتشكك في أن رع له اي بركة على الإطلاق !! ..

    وبعد مرور المدة ذهب خوفو ليتفقد حالة الهرم .. فوجدهم مازالوا في البداية ... وهكذا أخذ يسب ويلعن ويتفوه بألفاظ لا تخرج من فرعون من حواري شبرا .. ولا تليق ابدا به هو الملك الإله ..

    خوفو : يا ولاد الحرامية ... لغاية دلوقت مخلصتوش ..

    حور : وكمان الميزانية بتاعتهم خرمت كمان مرة ومحتاجين كمان 10 مليون ..!!

    خوفو : @$##%$^#@!@^&%& ( شتيمة قبيحة !! )

    توت : إحنا حرامية يا مولاي .. طب وحياة رع العالي أبو صقر .. وامون الخفي .. وأوزوريس الحي .. وإيزيس الطاهرة .. وحورس اللي خد بتار ابوه .. وخنوم اللي خلقنا من طين .. وجحوتي اللي خلقنا بكلمة .. ومسخنت حبيبة الحبالى .. وتوت وتفنوت .. وجب وشو .. ونفتيس وسخمت .. وأبيس وانوبيس .. ومولانا اللي محلفش بيه باطل ابدا .. .. - لحظة ليسترد نفسه - .. إن الشغلانة دي ماهي جايبة تمنها خالص .. يا مولاي ما أنت شايف .. الحديد غلي والبنزيـــ .. قصدي الدقيق غلي .. هنعمل إيه يا مولاي بس .. !!

    سمنخرع : ومتنساش كمان يا مولاي أن حجرة الدفن على البحري !!

    - وهكذا وجد خوفو نفسه أمام أمر واقع لا يمكن تغييره بالسب او اللعن ..

    خوفو : عاوزين كام ؟

    توت : اللي يطلع من ذمة مولانا .. نقول 10 مليون !!


    خوفو : هستلم منكم الهرم إمتى .. ؟

    توت : بص يا مولاي .. انت متتعبش نفسك ولا تشغل بالك .. إحنا أما نخلص هنبقى نقولك .. !!


    وقبل أن يرد خوفو .. صرخ سمنخرع ...

    سمنخرع : على بركة رع !!


    وبعد مرور الكثير من السنين حتى اتمت المدة 20 عاما تم إستدعاء الملك ليشاهد اعظم بناء في التاريخ .. هرم خوفو .. الهرم الأكبر ..

    وبالتأكييد .. عندما شاهد خوفو الهرم نسى كل ما دفعه من مال ومن حرقة دم .. فامامه بناء لم ولن يرى أحد مثله .. بناء ذهبي لامع وسط ضوء الشمس ..


    سمنخرع : ومتنساش أن حجرة الدفن على البحري !!

    توت : أنا سمعت يا مولاي أنك أنجبت ولد ..

    خوفو : دا صحيح ..

    سمنخرع : وهتسميه إيه ؟

    خوفو : هسميه على إسمي .. خف.

    سمنخرع : هتسميه خف حاف كده ؟!

    خوفو : .. خلاص خليها .. خفـــ .... رع .. خفرع !

    توت : وده مش محتاج هرم هو كمان !!


    تمت














  2. #2
    عضو متميز
    صور رمزية فلاشــــــــــاوي
    تاريخ التسجيل
    Jan 2006
    المنطقة
    مـــــصــــــر
    العمر
    33
    ردود
    3,802
    إقتبست الفكرة بشده من إحدى روايات العبقري محمد عفيفي ..

  3. #3
    عضو متميز
    صور رمزية y@sser
    تاريخ التسجيل
    May 2003
    المنطقة
    جوانتانامو مصر
    ردود
    10,884
    هههههههههههههههههههههههههه
    فلاشاوي ضحكتني وانا مش عايز اضحك
    فعلا لو فكرنا حاليا في بناء الهرم هو ده الي هايحصل بالظبط
    بلاد الكوارث
    حيث جميع الشعب وجلاديه يبحثون عن العقل والقلب والشجاعه المفقودين
    لكن للاسف لاوجود للساحر اوز
    وتنتهي القصه بفقد الحذاء الاحمر
    وتبقي اليس في بلاد الكوارث للابد

    مدونتي

  4. #4
    عضو متميز
    صور رمزية أبو عبد الكريم
    تاريخ التسجيل
    Jan 2005
    المنطقة
    مسحتها تأكيدا للهويه الأسلاميه
    ردود
    3,701
    بسم الله

    ايه هو الي ( على بركة رع و حياة رع )

    اتقى الله يا يا اخى






    الحمد لله
    .
    سبحان الله وبحمده سبحان الله العظيم

    أحب الصالحين ولست منهم لعلي أنـال بهـم شفاعـة

    وأكره من تجارته المعاصى و لو كلنا سواء في البضاعة



    .

  5. #5
    عضو نشيط
    صور رمزية عمرو
    تاريخ التسجيل
    Apr 2007
    المنطقة
    مكان أحبه كثيرًا
    ردود
    675
    عبقري يا علي ! عندك موهبة لا تضيعها
    http://blog.amr-g.com

    إن امتلاك الحياة الدنيا عن قدرة وخبرة هو السبيل الأوحد لنصرة المبادئ والمذاهب... *محمد الغزالي*

  6. #6
    عضو متميز
    صور رمزية rekapidesign
    تاريخ التسجيل
    Jun 2007
    المنطقة
    between two edges
    ردود
    1,408
    ههههههههههههههههههههههههههههههههههههههههههههههههههههههه
    معلم والله انا موت من الضحك
    Edge Loop
    ...........................
    ولدى نصحتك لما صوت اتَنَبح
    ما تخافش من جِنِّى ولا من شَبَح
    وإن هبّ فيك عفريت قتيل إسأَله
    ما دافعش ليه عن نفسه يوم ما اندبح ؟

    ........................

    عينى رأَت مولود على كتف أُمه
    يصرُخ تهنِّن فيه يصرخ تضمُّه
    يصرخ تقول يا بْنى ما تنطق كلام
    ده اللى ما يتكلمش يا كتر همُّه
    عجبى!!

    ......................................................
    تأبط شرا

  7. #7
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    31
    ردود
    2,260
    القصه بنائيا ظريفه جدا

    لكن من الناحيه الشرعيه-علي بركه رع و حياه رع الخ الخ-سيئه جدا

    كرأي شخصي يعني
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  8. #8
    ضياء الدين
    صور رمزية diaaking
    تاريخ التسجيل
    May 2004
    المنطقة
    مصر
    العمر
    30
    ردود
    3,679
    هههههههههههههههههههههههههههههههههههههههههههه
    بحب الاسلوب جامد موت ... ياريت متحرمانش من حكاية بناء هرم خفرع ...
    الحياة ألم يخفيه أمل
    أمل يحققه عمل
    وعمل ينهيه أجل
    ثم يجزى كل امرئ بما فعل

  9. #9
    عضو متميز
    صور رمزية فلاشــــــــــاوي
    تاريخ التسجيل
    Jan 2006
    المنطقة
    مـــــصــــــر
    العمر
    33
    ردود
    3,802
    بسم الله

    ايه هو الي ( على بركة رع و حياة رع )

    اتقى الله يا يا اخى






    الحمد لله
    .
    اللهم أجعلني من المتقين !

    القصه بنائيا ظريفه جدا

    لكن من الناحيه الشرعيه-علي بركه رع و حياه رع الخ الخ-سيئه جدا

    كرأي شخصي يعني
    هو للدرجة دي يا منسي القصة مش باين أنها في عصر الفراعنة اللي هما مكانوش مسلمين .. لو قريت في كتاب عن الصحابة أن عمر بن الخطاب كان بيشرب الخمر قبل الإسلام.. او كتاب بيتكلم عن العرب قبل الإسلام في حياتهم اليومية وجابهم وهم بيحلفوا ببعض الأصنام اللي عندهم ... هتقوله حرام عليك ولا إيه اللي انت كاتبه ده .. الراجل بيحكي واقع قبل الإسلام ... هي معقولة مش واضحة للدرجادي !!!!!

  10. #10
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    31
    ردود
    2,260
    اقتباس الموضوع الأصلي كتب بواسطة فلاشــــــــــاوي معاينة الرد
    هو للدرجة دي يا منسي القصة مش باين أنها في عصر الفراعنة اللي هما مكانوش مسلمين .. لو قريت في كتاب عن الصحابة أن عمر بن الخطاب كان بيشرب الخمر قبل الإسلام.. او كتاب بيتكلم عن العرب قبل الإسلام في حياتهم اليومية وجابهم وهم بيحلفوا ببعض الأصنام اللي عندهم ... هتقوله حرام عليك ولا إيه اللي انت كاتبه ده .. الراجل بيحكي واقع قبل الإسلام ... هي معقولة مش واضحة للدرجادي !!!!!

    وجهه نظر برضه
    انا قلت في رايي الشخصي يعني ما قولتش حلال و حرام

    عامه الله اعلم الموضوع ده صح و لا غلط
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  11. #11
    عضو متميز
    صور رمزية steel
    تاريخ التسجيل
    Aug 2007
    ردود
    2,818
    ويل له ثم ويل له
    تبكي الحنيفيةَ البيضاءُ من أسفٍ = = = كما بكى لفـراق الإلـفِ هيمـانُ
    على ديار مـن الإسـلام خاليـة = = = قد أقفرت ولهـا بالكفـر عُمـرانُ

  12. #12
    عضو نشيط
    صور رمزية anas talat
    تاريخ التسجيل
    Nov 2006
    المنطقة
    مصر
    العمر
    34
    ردود
    944
    الراجل لم يقر بالوهية رع !!!!!!!!!!!!!!!!!!
    لماذا الاخذ بالظاهر لهذه الدرجة
    الكلام واضح ومفهوم جدا ياجماعه دا بيتكلم عن قصه في خياله زمن ناس كان الههم اسمه رع يعني لو اتعمل فيلم عن صدر الاسلام وشخص مثل دور ابو لهب وقال " واللات والعزى " يبقى حرام !!!!!!!!!!!؟؟؟؟؟؟؟؟؟
    هذا رأيي الشخصي

    أما الموضوع ففعلا ما شاء الله مواضيعك جميله جدا وممتعه وتجبر الواحد انه يقراها للنهاية ... من فتره قرأت لك موضوع لماذا لا اكون بطل واعتقد ان لديك من المواهب الجميله ما يعوضك عن هذا النوع من البطوله يعني كل واحد ربنا اداه حاجات كويسه وحاجات مش كويسه ولو واحد اخد البطوله ومعاها كدر العيش او اي شئ أخر اكيد هتلاقي في حياتك حاجات لا تقبل انك تستبدلها ببطولته زي موهبتك دي ... ما شاء الله ... ننتظر بقية القصة

  13. #13
    عضو متميز
    صور رمزية ehabrashad
    تاريخ التسجيل
    May 2005
    المنطقة
    مصر
    ردود
    2,414
    اقتباس الموضوع الأصلي كتب بواسطة فلاشــــــــــاوي معاينة الرد
    سمنخرع : على بركة رع !!

    - وبما أننا نعرف تماما أن بناء الهرم إستغرق 20 عاما فلك ان تدرك ان خوفو كان له كل الحق في أن يتشكك في أن رع له اي بركة على الإطلاق !! ..
    أظن من قرأ تلك العبارة يتفهم بما لا يدع مجال للجدال قصد الأخ فلاشاوي


    بجد يا علي أنت تثبت لي أن جينات المصريين قابعة في أعماق الشعب المصري .. السخرية من الحال فالفنتازيا المضحكة .. محاولة للتأقلم مع الوضع وتفادي الإصابة بالجلاطات القلبية والسكتات الدماغية بإدخال المرح على النفس ولو من باب إضحاك الذات
    وفوق كل هذا الإبداع في رسم الصورة أكانت تلك الصورة رسومية او كتابية
    كل اناء بما فيه ينضح
    إذا جائتك الضربات من اليمين ومن اليسار فاعلم انك من أهل الوسط

  14. #14
    عضو متميز
    صور رمزية فلاشــــــــــاوي
    تاريخ التسجيل
    Jan 2006
    المنطقة
    مـــــصــــــر
    العمر
    33
    ردود
    3,802
    وجهه نظر برضه
    انا قلت في رايي الشخصي يعني ما قولتش حلال و حرام

    عامه الله اعلم الموضوع ده صح و لا غلط
    لو رأيك الشخصي أنا مليش إعتراض يا منسي - وإن كان برضه محتاج تدي أسباب منطقية لرأيك - لكن إنت بدأت كلامك بـــ "من الناحية الشرعية " !!

    المهم .. حصل خير يا باشا ولا يهمك


    أنس طلعت .. ربنا كرمك .. وشكرا على المجاملة ..

    مستر إيهاب رشاد .. البعض يعتبر شراءك لفوطة صفرا دليل كافي على أنك اصبحت سائق تاكسي !! .. أزيك يا باشا .. أخبارك

  15. #15
    عضو متميز
    صور رمزية أبو عبد الكريم
    تاريخ التسجيل
    Jan 2005
    المنطقة
    مسحتها تأكيدا للهويه الأسلاميه
    ردود
    3,701
    بسم الله

    هناك امور هزلها جد و جدها جد

    مثل الزواج و الطلاق و الكفر


    بمعنى انك لو بتهزر مع واحد صاحبك و قلت له جوزنى بنتك و قالك موافق
    خلص انت كده اتجوزتها و تستحق المهر

    الممثلين الجهابز الي بيطلعوا في التمثليلات ينطقون بكلمة الكفر
    فقد نطقو بها

    و الله اعلى و اعلم

    و بعدين القصه كان ممكن تمشى بدون وحياة رع و على بركة رع

    انا شايف انها قصه كويسه بس بدون الكلام السبق

    يعنى لو استبدلت و حياة رع ب و ربنا يا مولاى مفيهاش حاجه و لن تغير من المعنى شئ بالعكس هتكون مستساغه و سليمه شرعيا



    الحمد لله
    .
    سبحان الله وبحمده سبحان الله العظيم

    أحب الصالحين ولست منهم لعلي أنـال بهـم شفاعـة

    وأكره من تجارته المعاصى و لو كلنا سواء في البضاعة



    .

  16. #16
    عضو خيالي جدا
    صور رمزية Yas2eR
    تاريخ التسجيل
    Jun 2005
    المنطقة
    موشن جرافيك
    العمر
    31
    ردود
    956
    هههههههههههههههههه

    جميلة جدا ... بجد .. فنان ...فكرتني بالقصة اللى كتبتها عن ( ماريو ) اللعبة الشهيرة .. نفس الطريقة

    اعجبني جدا .. حتت ..البنزين
    انت هتستعبط يا توت .. هو في بنزين عندنا ههههههههه
    http://www.facebook.com/group.php?gid=5786949845
    ////
    /////////////////////////////////////
    Thinking / Building
    mind set
    this is thinking business , if thinking makes you tired
    , then you at wrong place

  17. #17
    عضو متميز
    صور رمزية فلاشــــــــــاوي
    تاريخ التسجيل
    Jan 2006
    المنطقة
    مـــــصــــــر
    العمر
    33
    ردود
    3,802
    بمعنى انك لو بتهزر مع واحد صاحبك و قلت له جوزنى بنتك و قالك موافق
    خلص انت كده اتجوزتها و تستحق المهر

    الممثلين الجهابز الي بيطلعوا في التمثليلات ينطقون بكلمة الكفر
    فقد نطقو بها

    و الله اعلى و اعلم
    أنت بتتكلم بجد يا عاطف ؟! ... لا فعلا ده سؤال مني ... أنت بتتكلم بجد ؟؟

    ﴿ قَالَ لَهُمْ مُوسَى أَلْقُوا مَا أَنْتُمْ مُلْقُونَ (43) فَأَلْقَوْا حِبَالَهُمْ وَعِصِيَّهُمْ وَقَالُوا بِعِزَّةِ فِرْعَوْنَ إِنَّا لَنَحْنُ الْغَالِبُونَ (44) فَأَلْقَى مُوسَى عَصَاهُ فَإِذَا هِيَ تَلْقَفُ مَا يَأْفِكُونَ (45) فَأُلْقِيَ السَّحَرَةُ سَاجِدِينَ (46) قَالُوا آمَنَّا بِرَبِّ الْعَالَمِينَ (47) رَبِّ مُوسَى وَهَارُونَ (48) ( الشعراء )


    ليه القرأن ذكر الحلف بعزة فرعون .. ؟؟ ... طبعا عندي امثلة للصبح من ايات قرأنية تانية زي قول اليهود بان الله فقير مثلا .. وعشرات من السنة الصحيحة .. لكن عمر المشكلة ما كانت في صحة الدليل .. المشكلة طول عمرها في العقل اللي بيفهم الدليل على مزاجه ويعتبره هو ده الصح وهو ده فهم السلف واللي يفهم بطريقة تانية يركب المجري !!

    أنا مش عارف أرد اقول إيه ... بقى أما واحد بيهزر مع واحد ويقوله جوزني بنتك وهو قله موافق .. بقيت مراته ؟؟!!! .. ولو ممثل بيمثل فيلم عن صدر الإسلام وكان بيقوم بدور ابو جهل مثلا .. وحلف باللات والعزة .. يبقى نطق كفر فعلا ؟؟!! ... أنت عايش حياتك إزاي ؟!!


  18. #18
    عضو نشيط
    صور رمزية black-wolf
    تاريخ التسجيل
    May 2008
    المنطقة
    مصر ___الامارات
    العمر
    24
    ردود
    840
    و الله فنانة
    جامدة اوي
    شكرا اوي على القصة
    لو عندك غير دول ممكن تجبلينا

  19. #19
    عضو متميز
    صور رمزية ALSOODY
    تاريخ التسجيل
    Aug 2007
    المنطقة
    السعودية-جدة
    العمر
    28
    ردود
    1,779
    هههههه أضحك الله سنك ..قصة وسناريو رائع ..موهبة قوية ما شاء الله ..
    كن كالطير يحب العلو

  20. #20
    عضو متميز
    صور رمزية ehabrashad
    تاريخ التسجيل
    May 2005
    المنطقة
    مصر
    ردود
    2,414
    وبدأت المعركة

    على الداخلين إلى هذا الموضوع لبس لامة الحرب من خوذة وقميص حتى لا يصيبك بعض القذائف القادمة من أحد المتناقشين
    كل اناء بما فيه ينضح
    إذا جائتك الضربات من اليمين ومن اليسار فاعلم انك من أهل الوسط

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل