صفحة 1 من 2 12 أخيرأخير
النتائج المعروضة من 1 الى 20 من مجموع 27

موضوع: يوميات باحث عن عروسة ... بارت وان

ردود: 27 | زيارات: 2588
  1. #1
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585

    يوميات باحث عن عروسة ... بارت وان

    "يا سلام ... الراحة طعمها حلو"

    قفزت هذه الجملة إلى خاطري وأنا ممدد على الكنبة يوم الجمعة في تكاسل لذيذ ... أغمضت عيني في استمتاع وتتابعت الأفكار كشلال وجد طريقه بين صخور جبل أبو علبة :
    " هي دي العيشة ولا بلاش ... الواحد خلص دراسة, وخد تأجيل من الجيش , وفي وظيفة محترمة .... مش ناقص حاجة تاني إلا إني أبقى وزير .... لا لا لا ... الوزير شغلانة متعبة .... وكيل وزارة أحسن ... ساعتها هبقى إنسان متسلط ورخم كده أذل الناس و ... "

    قطع حبل أفكاري إحساسي بقبلة على رأسي .... فتحت عيني في بطء كمن يرفع 50 كيلو حديد لأول مرة في حياته ... لقيتها الحاجة بتبتسم ابتسامتها الساحرة ... رددت الابتسامة في محبة ورجعت تاني لتلك الأفكار السادية وأنا بفكر في أحسن طريقة أعذب بيها المواطنين و أودي .............. ثواني ... في حاجة مش طبيعية ...

    فتحت عيني نص فتحة وبصيت من طرفها لأجد الحاجة جالسة على الكرسي بجانبي باتسامتها التي لم تفارقها ناظرة إلي ...

    أخذت نفسا عميقا ثم زفرت في تكاسل مغمضاً عيني وقد أدركت ما ترمي إليه ...

    أنا : خير يا حاجة ... شكلك عايزة تقولي حاجة ...

    الوالدة: لا يا حبيبي أبدا ... أنا بس بطمن عليك ...

    - يا أمي .... يا أمي ... ده أنا عارفك وفاهمك ... قولي بس عاوزة إيه ؟؟؟

    - أبدا يا تامر ... ولا حاجة ....

    - طيب أنا هنام بقى ...

    - اتفضل يا حبيبي ...

    - .................

    - بقولك إيه يا تيتو ... هوه انت مش ناوي ؟؟؟

    باغتني السؤال مسببا لي مغصاً معوياً... خصوصاً مع هذا الـ "تيتو" اللي متطمنش ... فتحت عيني وبصيت ليها ورددت في قلق :

    ناوي على إيه يا حاجة ؟؟؟

    الوالدة : مش ناوي تعمل زي محمود ابن خالتك ؟؟؟

    فكرت في سرعة ... محمود جاب شقة .... رجله اتكسرت ... اتخانق مع أبوه ... قفشوه بيضرب بانجو ...

    أنا : ممكن ... البانجو مش وحش برضه ...

    -نعم ؟؟؟

    -لا ... مش قصدي ... انت عايزاني أعمل زيه ازاي يعني ؟؟

    -يعني ... زي معمل الجمعة اللي فاتت ...

    -إيه ... صلى الجمعة يعني ؟؟؟

    -يوووووووه على دماغك القفل دي ... قصدي تتأهل ... تكبر كده و .... و ... وتتجوز

    اتنفضت من على الكنبة في غضب :

    -أيوه بقى قولي كده ... احنا رجعنا للموال ده تاني ... وبعدين هوه الواحد لازم يتجوز عشان يبقى كبير عندكو يعني ؟؟؟

    -ما هو يا تامر أنا لازم أفرح بيك ...

    عدت إلى وضع الاسترخاء على الأريكة محاولا تأجيل الموضوع بأي شكل :

    -طيب طيب ... لما أخلصدراسة ...

    -يابني مانتا خدت الليسانس !!!

    -آه ... قصدي لما أشوف موضوع الجيش ...

    -انت يا تيتو مش خدت تأجيل ؟؟؟

    -صحيح ... خلاص لما أجيب شقة يبقى ربنا يحلها ...

    -أومال الشقة اللي أبوك اتشحطط وجابهالك من إسكان الشباب بالعافي دي بتاعة مين ...

    اتعدلت في القعدة وأنا بهمهم :
    -يادي الهم والقرف ... هوه الواحد لحق يتمتع بحياته ...

    -أفندم ؟؟؟

    -ولا حاجة يا أمي ... بصراحة ... أنا مبفكرش في الجواز دلوقتي ...

    -ليه يابني بس ... ده الجواز ستر وغطا ...

    -ستر وغطا ... ستر وملاية ... أنا مش عايز يا ستي ...

    اقتربت وجلس بجانبي على الكنبة ووضعت يدها على كتفي وعلى وجهها تلك الابتسامة الساحرة :

    -ولا حتى عشان خاطرماما حبيبتو ؟؟؟
    -يا حاجة متضغطيش عليا ... أنا مش عاوز أتنيل على عيني دلوقتي ...

    رفعت يديها من على كتفي وابتسامته تتلاشى ... واديتني جنب ....

    في سري " آآآآآه .... هنبتدي "

    اغرورقت عيناها بالدموع ثم انفجرت باكية :

    -يا تامر ما هو العمر بيجري ... وأنا نفسي أفرح بيك قبل ما أموت ... هوه ده كتير عليا ؟؟؟

    يا قلبي اللي عامل زي الخساية المستوية ... مقدرتش أستحمل ... خدتها في حضني وطبطبت عليها :

    -يا حاجة إيه لازمته الكلام ده بس ... ربنا يخليكي لينا ... أومال مين اللي هيعملي صينية البطاطس ؟؟؟

    ابتعدت عني قليلا ونظر ت إلي وقد توقفت عن البكاء :

    -يا سلام .... يعني هوه ده كل اللي همك ... صينية البطاطس ...

    -أكيد لأ يا حاجة ... أنا بهرج ...

    -آآآآه ...

    -انتي برضه بتعملي محشي تحفة ...

    -تصدق إنك أرخم عيل في ولادي ...

    -تصدقي إنك أحلى أم في الدنيا ...

    ابتسمت ابتسامتها الملائكية وقالت :

    -يعني خلاص .... هتتجوز

    -ما دام ده يرضيكي يا حاجة يبقى أجوز البلد كلها لو تحبي

    -لا ياخويا ... بطلوا بقى العين الفارغة بتاعتكو ... هنجوزك واحدة بس ...

    رددت مبتسما باستسلام :

    -اللي تؤمر بيه يا جميل ....

    -طيب العروسة جاهزة عندي ...

    بدأت أقلق ... وقلبي يعمل طاخ بوم ... طاخ بوم :

    -عندك عروسة ... ودي تطلع مين إن شاء الله ؟؟؟

    -سحر ... سحر بنت خالتك ...

    -سحر ؟؟ .... البت سحر ؟؟؟ ... العيلة دي .؟؟؟

    -عيلة إيه يابني ... انت عارف عندها كام سنة دلوقتي ؟؟؟ ... 20 سنة

    -إيه ده ؟؟ .... هيا بتاكل السنين ولا بتاخد هرمونات ؟؟؟

    -متبطل استظراف ... منتا من ساعة ما اشتغلت وانتا ولا بتبص على حد من قرايبك ...

    -معلش يا أمي منتي عارفة ظروف الشغل ...

    -ماشي ياخويا ... ظروف الشغل ولا ظروف الصياعة ... المهم .. أنا خدتلك ميعاد ... هنروحلهم الخميس الجاي

    التفت فجأة في دهشة :

    -ميعاد ؟؟ .... وانتي إيه اللي عرفك إذا كنت هوافق ولا لأ ؟؟؟

    ردت وعلى وجهها ابتسامة ماكرة :

    -عيب عليك ... ده أنا أمك يا ولد ... وكمان أنا عارفة إزاي أجيب آخرك ...

    قامت لتخرج وأنا أردد :

    -دانتي يا حاجة طلعتي !!! ... آخر مرة بجد أقع في الاشتغالة دي تاني ...

    ضحكت بصوت عالي وقالت :

    -مانتا كل مرة بتقول كده يا واد يا خيبة ...

    -ربنا يهدينا ويهديكي يا حاجة ...

    -الخميس الجاي إن شاء الله .... فاهم ؟؟؟

    -حاضر ... ربنا يستر ... !!!!!


    - - - - - - - - - - - - - - - - - - - - - - - - - - - - - - - - - - - - - - - -




  2. #2
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    "استنى يابني أعدلك أم الكرافتة ... انت فاكرنفسك رايح تجيب كشري من عند أم تفيدة ؟؟؟"



    بصيت لأسامة أخويا الصغير وهو بيعدل الكرافتة :



    - خلص يا عم الظريف ... بدل مجيبلك بقك ده في قفاك ...



    "يلا يا تيتو ... هنتأخر يا حبيبي"



    - حاضر يا أمي .... قال يعني انتو خلصتو ...



    خرجت الصالة حانقا وأنا بمشي في قرف لأفاجأ بمحمد بيبصلي وعلى وجهه ابتسامة ماكرة :



    - إيه الحلاوة دي .... مامتك عارفة إنك خارج لوحدك ...



    مزاجي لا يسمح بالتهريج ... نظرت إليه بقرف :



    - أيوه ... وبتقولك متنساش تبقى تاخد الرضعة بتاعتك من الدولاب ...



    " متيلا يا تاااااااااااامر "



    - يحرق أم سنين تامر .... حاضر يا أمي جاي ...



    نزلنا وركبنا التاكسي وتوجهنا إلى بيت خالتي .... يااااااااااه ... الواحد فعلا بقاله كتير ... كتييييييير أوي مجاش هنا ...



    طلعنا فوق حيثاستقبلتنا خالتي بالأحضان وملصت وداني مخرقة جنابي بكلام زي السم بسبب انقطاعي عنهم ... ما شاء الله ... فعلا هي دي أخت أمي ...



    قعدنا في الصالون وبعدين دخل أبويا وعمي بعد الـ "يا ساتر" المشهورة .... وقعدنا كلنا



    - منورينا يا أختي (خالتي مخاطبة أمي)



    - بنورك يا حبيبتي ( أمي مخاطبة خالتي)



    - لا بجد منورينا يا جماعة (عمي مخاطبا إيانا)



    - بنورك يابوحسن (والدي مخاطبا عمي)



    - مفيش كوباية ميه ؟؟؟



    التفت الجميع إلي فجأة لدرجة جعلتني أحس أني تفوهت بلفظ قبح ... وفجأة هتفت خالتي :



    - ياعين أمك ياخويا ... معلش الواحد سرح ... يا سحر .... سحاااااااااااااااااار ... هاتي الشربات



    "شربات ؟؟ .... هوه احنا لسه اتفقنا على حاجة ؟؟؟"



    شوية ودخلت سحر ... وطبعا من كسوفها حطت العصير على الترابيزة وهمت بالخروج ... راحت أمي منادية عليها ومقعدها جنبها (ياه ... زي الأفلام العربي تمام)



    قعدت البنت قصادي ... وكانت مكسوفة جدا ... بصيتلها وحسيت ببعض الراحة ... مش جايز يبقى الجواز مش وحش أوي في الآخر برضه ؟؟؟



    أخذ الكل يدخل في رغي جانبي حتى بدأت أمي الكلام فسكت شهريار ... أقصد جميع من في الغرفة ... وقالت :



    - احنا يا أم حسن يشرفنا ويآنسنا إننا نطلب إيد بنتكو سحر لابننا تامر ...



    - وده يشرفنا يا أم تامر .... ابنك ابن حلال مصفي ومتربي ...



    - خلاص ... يبقى على بركة الله (زغرودة من الطرفين)



    " إيه ده ... بكل بساطة كده ؟؟؟ ... هوه احنا طرش في الزفة ؟؟؟ "



    قطع عمي الزغاريد بقوله :



    - طيب مش هنتفق الأول يا أم حسن مع الناس ؟؟؟



    ردت خالتي :



    - أكيد يابو حسن تامرمش هيتأخر عليها بحاجة ... ولا إيه ؟؟



    توجهت الأنظار كلها إلي ... فازدرت ريقي بصعوبة ... وخلرجت كلماتي بصوت مبحوح ... :



    - إيه ؟؟؟ ... أكـ ..... احم ... أكيد ... طبعا ... بس ...



    خالتي : على خيرة الله ... يبقى عايزين شبكة بـ 20 ألف .... ما هي البنت غالية علينا طبعا ...



    اسبهللت ومنطقتش ...



    - وطبعا الشقة اللي هوه هيجيبها دي حاجة احتياطي ... يعني ربط كلام ... البت لازم تخش في شقة واسعة متشطبة سوبر لوكس ... ويا سلام لو تكون في المعادي زي أختها ...



    هممت بالتكلم هذه المرة لولا أن سبقتني الحاجة :



    - يا أم حسن مانتي عارفة إن تامر لسه خريج ويادوب بيقبض على قده ...



    - ماهو يا أم تامر لازم أضمن مستقبل البنت



    - محدش قال حاجة يا أم حسن ... بس برضه خفي علينا شوية يا أختي



    - ماهو أنا كده خافة عليكو أوي عشان انتي أختي ... حد غيركو كنت خليته يدفع مهر وشبكة وشقة كبيرة من دلوقتي ويكون معاه عربية ووظيفته تكون مدير فما فوق ... أومال ؟؟؟ ... هي سحر قليلة ؟؟؟



    - لا يا خالتي ... جوزيها لوزير الصحة أحسن ...



    رمقتني أمي بنظرة جانبية كأني عيل صغير قطع كلام الكبار ... وحاولت تلمحلي أسكت ... لكن على مين ... أنا اتكلمت على طول :



    - يا جماعة احنا عايزين الدنيا تمشي وأنا مش هقدر على الحاجات دي كلها ... فالحل إننا نسأل العروسة ..

    والتفت في ثقة إلى سحر وسألتها :



    - ها يا سحر ... ترضي اني أجيب الحاجات دي كلها وأنا لسه بادئ حياتي .... اتكلمي متتكســ .....



    - لأ طبعا



    فاجئني ردها السريع ... بس أثلجت صدري كبطيخة بقالها اسبوع في الديب فريزر .... ثم أكملت سحر :



    - طبعا مينفعش ... أنا ولاء صاحبتي جالها مهر 50 ألف جنيه ...



    اتسعت عيناي مع هذا الرد الغريب وماسورة الكلام لا تزال تنبعث من فمها :



    - ومحاسن بنت عمي جوزها معاه عربية بي إم الجديدة .... وهدى أختي ساكنة في المعادي ... أنا مش أقل منهم .... ولا إيه يا مامي ؟؟؟



    رددت عليها بكل عفوية :



    - أكيد لا يافندم ... حضرتك محتاجة أمير على حمارة عرجة ....



    وقفت وتوجهت للباب وأنا بقول للحاجة :



    - يلا يا أمي نلحق نركب اليخت عشان نروح الفيلا فبل ما طيارتنا توصل .....



    وخرجنا معلنين نهاية هذا الحوار ....



    - - - - - - - - - - - - - - - - - - - -





    ممددا على الكنبة وفي إيديا كوباية النعناع وسرحان مع نفسي و ..... الحاجة دخلت عليا ...



    - خير يا أمي ... في إيه تاني



    - يابني متزعلش نفسك ....



    - أنا زعلان عشان تفكير البنت نفسها يا أمي ... خلاص ... كل حاجة بقيت بيت وفلوس بالعبيط وكلاكس بيب بيب ؟؟؟



    - خلاص يابني متزعلش نفسك بقه



    - وأزعل نفسي ليه ... ؟؟؟ .... الحمد لله أنا معنديش مشاكل ...



    - ................................



    - بقولك إيه يا تامر ....



    - خير يا أمي ...



    - مش هنفرح بيك بقه يا ضنايا ؟؟؟



    - تاااااااااااااااااااااااااااااااني ؟؟؟؟؟

  3. #3
    عضو متميز
    صور رمزية rekapidesign
    تاريخ التسجيل
    Jun 2007
    المنطقة
    between two edges
    ردود
    1,408
    هههههههههههههههههههههههههه
    لا حول ولا قوة الا بالله
    يا عم الدنيا اتغيرت لو حصل الموضوع ده معاك حقيقي يبقي اكيد قريبك دول مش عايشين في الدنيا
    البنات دلوقتي بيرضو باي حاجة والاهالي برضه الغلا قطم وسط الجميع الناس بقت حاسة ببعض اكتر
    ربنا ميحرمناش من مواضيعك الجامدة يا عم يوسف يا جامد
    Edge Loop
    ...........................
    ولدى نصحتك لما صوت اتَنَبح
    ما تخافش من جِنِّى ولا من شَبَح
    وإن هبّ فيك عفريت قتيل إسأَله
    ما دافعش ليه عن نفسه يوم ما اندبح ؟

    ........................

    عينى رأَت مولود على كتف أُمه
    يصرُخ تهنِّن فيه يصرخ تضمُّه
    يصرخ تقول يا بْنى ما تنطق كلام
    ده اللى ما يتكلمش يا كتر همُّه
    عجبى!!

    ......................................................
    تأبط شرا

  4. #4
    عضو قدير
    صور رمزية esamdrsh
    تاريخ التسجيل
    May 2005
    المنطقة
    أبو ظبي
    العمر
    32
    ردود
    8,607
    ربنا يخليلك الحاجه .....


    موضوع جامد يا توتو .. قصدي يا يوسف ..

    وفي انتظار الجزء التاني

  5. #5
    عضو متميز
    صور رمزية AHMAD-MAX
    تاريخ التسجيل
    Nov 2007
    المنطقة
    الاردن
    ردود
    2,478
    ههههههه روعه ...
    لازم تزورنا كل يوم يا يوسف مواضيعك ممتعه ^_^
    ... ...
    الحرية هي التوحيد ..
    عكس الحرية الشرك بالله تعالى ..
    تحرر من عبادة الاشياء حتى عبادة النفس والهوى وصرفها لله وحده ..
    وتمرد على كل قانون غير قانون الله ..
    ان لم تعبد الله وحده ... سوف تكون عبدا لملايين الاشياء ..

  6. #6
    مشرف منبر عرض و نـقــد
    صور رمزية Jassar
    تاريخ التسجيل
    Oct 2006
    المنطقة
    بانتظار عودة الخلافة
    ردود
    8,389
    هههههههه!
    حلوة جدا

    الله يجوزنا .... والله يسترنا من تفكير بعض البنات!
    في النظام الديمقراطي (والذي هو مخالف للإسلام قلبا وقالبا), يسمح للشواذ أن يتزوجوا رسميا
    وكل حاكم يحكم بهذا النظام, وإن ادعى أنه إسلامي, فهو يؤمن بهذه الحرية..

    موقعي الشخصي | صفحة الفيسبوك الرسمية

  7. #7
    عضو نشيط
    صور رمزية Shisha
    تاريخ التسجيل
    Jun 2004
    المنطقة
    مصر.. القاهره..
    العمر
    36
    ردود
    373
    جميييييييييييييييييييييله...
    المحتوى جميل والأسلوب اجمل فى سرد القصه

    على فكره والله لسه حاصله فى واحد صاحبى من شهر او شهرين
    قعد يحب البنت بينه وبين نفسه 4 سنين
    ولما ظروفه بقت تسمح له بالزواج اتقدم لها... وأمها صديقة امه واقرب لها من اختها

    ابوها طلب شبكه ب20 الف وشقه تمليك كبيره... والواد لسه بيبدأ حياته
    وكانت نفس النهايه

    الواد قرر مايتجوزش قبل ما يبقى عنده كل حاجه ويكون جاب كل حاجه ممكن يحتاجها والعروسه تكون آخر حاجه يفكر فيها

    واشترى بفلوس الشبكه كمبيوتر


  8. #8
    مشرف منبر عرض و نـقــد
    صور رمزية Jassar
    تاريخ التسجيل
    Oct 2006
    المنطقة
    بانتظار عودة الخلافة
    ردود
    8,389
    على فكرة, في نكتة أجنبية مضحكة حابب أكتبها ( معلش أخي يوسف مش قادر أقاوم!!! ) :
    لماذا المسدس أفضل من الزوجة؟؟؟؟







    لأنه باستطاعتك أن تضيف له كاتم صوت!!!
    في النظام الديمقراطي (والذي هو مخالف للإسلام قلبا وقالبا), يسمح للشواذ أن يتزوجوا رسميا
    وكل حاكم يحكم بهذا النظام, وإن ادعى أنه إسلامي, فهو يؤمن بهذه الحرية..

    موقعي الشخصي | صفحة الفيسبوك الرسمية

  9. #9
    عضو نشيط
    صور رمزية AM3D
    تاريخ التسجيل
    Jul 2008
    المنطقة
    الاردن
    العمر
    34
    ردود
    508
    جميل ....
    اسلوبك ممتع والقاراء اذا بدأ يتمنى ان لاينتهي من القراءه
    .....
    مجموعه من اعمالي على هذا الرابط
    ....
    MObil: 0962 79 75 155 64

  10. #10
    awlan
    rabna ye7'alelak al 7aga
    second...
    ur ant gonna call ur mother soon arrange for anther session..
    للاستماع و تحميل القرآن الكريم برابط واحد للشيخ اللذى تحب و بصوت عالى الجوده :
    http://www.tvquran.com/

    Join me on Facebook
    https://www.facebook.com/rabieart.fanpage
    https://www.facebook.com/MCC4P

  11. #11
    عضو نشيط
    صور رمزية وائل محمد
    تاريخ التسجيل
    Dec 2007
    المنطقة
    مصر
    العمر
    25
    ردود
    318
    موضوع شيق :::البنات دلوقتى بيتوزعوا مع بطاقية التموين

  12. #12
    عضو نشيط
    صور رمزية dmo3
    تاريخ التسجيل
    Jun 2008
    المنطقة
    بلاد مسلمة
    ردود
    364
    هههههههههههههه
    واللق استمتعت جدا بقراءة المدونة

  13. #13
    عضو نشيط
    صور رمزية dmo3
    تاريخ التسجيل
    Jun 2008
    المنطقة
    بلاد مسلمة
    ردود
    364

    Wink

    اقتباس الموضوع الأصلي كتب بواسطة jassar معاينة الرد
    على فكرة, في نكتة أجنبية مضحكة حابب أكتبها ( معلش أخي يوسف مش قادر أقاوم!!! ) :
    لماذا المسدس أفضل من الزوجة؟؟؟؟







    لأنه باستطاعتك أن تضيف له كاتم صوت!!!
    هههههههههههههههههههههههههههههههههههههههه
    فعلا المراة كالمذياع
    مذياع ايه المذياع افضل المذياع افصل الكهربا يسكت بس المراءة ..............

  14. #14
    عضو متميز
    صور رمزية A.yousf
    تاريخ التسجيل
    May 2004
    ردود
    3,301
    جميل جدا لو كنت في مصر
    لكن تعالي اقعد معنا هنا وهتعرف ان الله حق
    www.DEEPEFFECTS.COM

    أخوكم عبد الرحمن يوسف

  15. #15
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة rekapidesign معاينة الرد
    هههههههههههههههههههههههههه
    لا حول ولا قوة الا بالله
    يا عم الدنيا اتغيرت لو حصل الموضوع ده معاك حقيقي يبقي اكيد قريبك دول مش عايشين في الدنيا
    البنات دلوقتي بيرضو باي حاجة والاهالي برضه الغلا قطم وسط الجميع الناس بقت حاسة ببعض اكتر
    ربنا ميحرمناش من مواضيعك الجامدة يا عم يوسف يا جامد
    متشكر يا جميل ... بس لعلمك ... الكلام ده بيحصل ...
    أنا الحمد لله مدخلتش في مشاوير الجواز دي .... بس شفت مواقف يشيب لهولها الولدان

    اقتباس الموضوع الأصلي كتب بواسطة esamdrsh معاينة الرد
    ربنا يخليلك الحاجه .....


    موضوع جامد يا توتو .. قصدي يا يوسف ..

    وفي انتظار الجزء التاني
    هههههههههههه .... على فكرة يا عصام ... الموقف ده محصلش معايا ... والحاجة عندنا أعقل من كده ....
    بس السلسلة دي تجميعة لكام موقف كده ... وربك يستر

    اقتباس الموضوع الأصلي كتب بواسطة AHMAD-MAX معاينة الرد
    ههههههه روعه ...
    لازم تزورنا كل يوم يا يوسف مواضيعك ممتعه ^_^
    ربنا يكرمك يابوحميد .... أنا لو عليا أبات معاكو على طول
    اقتباس الموضوع الأصلي كتب بواسطة Jassar معاينة الرد
    هههههههه!
    حلوة جدا

    الله يجوزنا .... والله يسترنا من تفكير بعض البنات!
    هههههههههه .... إن شاء الله نفح فيك قريب يا جسار .... متنساش تبقى تعزمنا بس ^_^
    اقتباس الموضوع الأصلي كتب بواسطة Shisha معاينة الرد
    جميييييييييييييييييييييله...
    المحتوى جميل والأسلوب اجمل فى سرد القصه

    على فكره والله لسه حاصله فى واحد صاحبى من شهر او شهرين
    قعد يحب البنت بينه وبين نفسه 4 سنين
    ولما ظروفه بقت تسمح له بالزواج اتقدم لها... وأمها صديقة امه واقرب لها من اختها

    ابوها طلب شبكه ب20 الف وشقه تمليك كبيره... والواد لسه بيبدأ حياته
    وكانت نفس النهايه

    الواد قرر مايتجوزش قبل ما يبقى عنده كل حاجه ويكون جاب كل حاجه ممكن يحتاجها والعروسه تكون آخر حاجه يفكر فيها

    واشترى بفلوس الشبكه كمبيوتر
    هههههههههههه .... هي دي الناس اللي بتفهم .... على الأقل الكومبيوتر مبيطلبش طلبات ...

    على فكرة يا شريف .... أنا مش لاقي موضوعك بتاع الجيش ... لمحته بس, ولما جيت أقراه ملقيتوش ... هوه راح فين ؟؟؟
    اقتباس الموضوع الأصلي كتب بواسطة Jassar معاينة الرد
    على فكرة, في نكتة أجنبية مضحكة حابب أكتبها ( معلش أخي يوسف مش قادر أقاوم!!! ) :
    لماذا المسدس أفضل من الزوجة؟؟؟؟







    لأنه باستطاعتك أن تضيف له كاتم صوت!!!
    جامدة جدا .... أعتقد كمان المسدس ممكن يعمل دوشة ... بس بييجي عليه وقت ويسكت ... ^_^
    اقتباس الموضوع الأصلي كتب بواسطة AM3D معاينة الرد
    جميل ....
    اسلوبك ممتع والقاراء اذا بدأ يتمنى ان لاينتهي من القراءه
    جزاك الله كل خير .... سعيد بمرورك
    اقتباس الموضوع الأصلي كتب بواسطة m.ramdan معاينة الرد
    awlan
    rabna ye7'alelak al 7aga
    second...
    ur ant gonna call ur mother soon arrange for anther session..
    ربنا يباركلك يابوحميد ... تفتكر فعلا لسه في أمل ... هما واقعين للدرجادي ؟؟؟ ^_^

    اقتباس الموضوع الأصلي كتب بواسطة وائل محمد معاينة الرد
    موضوع شيق :::البنات دلوقتى بيتوزعوا مع بطاقية التموين
    هههههههههه .... ساعتها محدش هيجيب بطايق تموين ....



    اقتباس الموضوع الأصلي كتب بواسطة dmo3 معاينة الرد
    هههههههههههههه
    والله استمتعت جدا بقراءة المدونة
    ربنا يكرمك يا غالي .... نحن نسعى دائما لراحتكم ^_^

    اقتباس الموضوع الأصلي كتب بواسطة الجرح معاينة الرد
    جميل جدا لو كنت في مصر
    لكن تعالي اقعد معنا هنا وهتعرف ان الله حق
    أنا على فكرة يا عُبد عشت فترة في السعودية وأنا صغير ... فكنت بسمع برضه عن شوية بلاوي .... لكن هناك ربنا يزيد ويبارك الناس معاها ... لكن هنا ... وي ويل بي باي باي ^_^

  16. #16
    عضو متميز
    صور رمزية mmnoor
    تاريخ التسجيل
    Nov 2007
    المنطقة
    ساكن فين ؟؟ انت مخبر ولا ايه ؟؟؟
    العمر
    31
    ردود
    6,588
    جامدة جداً يا باشا فينك من زمان وأخبارك إيه؟؟
    (وَإِذَا قِيلَ لَهُمُ اتَّبِعُوا مَا أَنزَلَ اللَّهُ قَالُوا بَلْ نَتَّبِعُ مَا وَجَدْنَا عَلَيْهِ آبَاءنَا أَوَلَوْ كَانَ الشَّيْطَانُ يَدْعُوهُمْ إِلَى عَذَابِ السَّعِيرِ) لقمان :21

    الرد على من قال بحل المعازف

    http://www.abumishari.com/

  17. #17
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    جامدة جداً يا باشا فينك من زمان وأخبارك إيه؟
    ربنا يكرمك يا حبيب قلبي ... أنا الحمد لله تمام بس شوية ضغط في الشغل

  18. #18
    عضو متميز
    تاريخ التسجيل
    Mar 2008
    المنطقة
    palestine-gaza
    العمر
    26
    ردود
    1,916
    ههههههههههههههههههههههههه
    بصراحة انا حسيت كان الشئ قدامي

    انتا فعلا مبدع وقدرت تشدني في القراءة لاخر كلمة

    لا تحرمنا من مواضيعك يا تامر ..........قصدي يا يوسف

    شكرا

  19. #19
    عضو نشيط
    صور رمزية زند الاسى
    تاريخ التسجيل
    Dec 2006
    المنطقة
    مصر بتتقدم بينا (!!!!!!!)^100
    ردود
    897
    بقولك ايه يا يوسف

    مش هنفرح فيك بقى ياضنايا ؟
    بيـــــــــــسٌ
    ☺☺




  20. #20
    عضو متميز
    صور رمزية ALSOODY
    تاريخ التسجيل
    Aug 2007
    المنطقة
    السعودية-جدة
    العمر
    28
    ردود
    1,779
    قصة رائعة استمتعت بها كثيرا ..الله لا يقطعنا من هذا الإبداع الفكري .
    كن كالطير يحب العلو

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل