Unconfigured Ad Widget

**maxspider** · 12 / 08 / 2008, 09:11 PM

"استنى يابني أعدلك أم الكرافتة ... انت فاكرنفسك رايح تجيب كشري من عند أم تفيدة ؟؟؟"

بصيت لأسامة أخويا الصغير وهو بيعدل الكرافتة :

- خلص يا عم الظريف ... بدل مجيبلك بقك ده في قفاك ...

"يلا يا تيتو ... هنتأخر يا حبيبي"

- حاضر يا أمي .... قال يعني انتو خلصتو ...

خرجت الصالة حانقا وأنا بمشي في قرف لأفاجأ بمحمد بيبصلي وعلى وجهه ابتسامة ماكرة :

- إيه الحلاوة دي .... مامتك عارفة إنك خارج لوحدك ...

مزاجي لا يسمح بالتهريج ... نظرت إليه بقرف :

- أيوه ... وبتقولك متنساش تبقى تاخد الرضعة بتاعتك من الدولاب ...

" متيلا يا تاااااااااااامر "

- يحرق أم سنين تامر .... حاضر يا أمي جاي ...

نزلنا وركبنا التاكسي وتوجهنا إلى بيت خالتي .... يااااااااااه ... الواحد فعلا بقاله كتير ... كتييييييير أوي مجاش هنا ...

طلعنا فوق حيثاستقبلتنا خالتي بالأحضان وملصت وداني مخرقة جنابي بكلام زي السم بسبب انقطاعي عنهم ... ما شاء الله ... فعلا هي دي أخت أمي ...

قعدنا في الصالون وبعدين دخل أبويا وعمي بعد الـ "يا ساتر" المشهورة .... وقعدنا كلنا

- منورينا يا أختي (خالتي مخاطبة أمي)

- بنورك يا حبيبتي ( أمي مخاطبة خالتي)

- لا بجد منورينا يا جماعة (عمي مخاطبا إيانا)

- بنورك يابوحسن (والدي مخاطبا عمي)

- مفيش كوباية ميه ؟؟؟

التفت الجميع إلي فجأة لدرجة جعلتني أحس أني تفوهت بلفظ قبح ... وفجأة هتفت خالتي :

- ياعين أمك ياخويا ... معلش الواحد سرح ... يا سحر .... سحاااااااااااااااااار ... هاتي الشربات

"شربات ؟؟ .... هوه احنا لسه اتفقنا على حاجة ؟؟؟"

شوية ودخلت سحر ... وطبعا من كسوفها حطت العصير على الترابيزة وهمت بالخروج ... راحت أمي منادية عليها ومقعدها جنبها (ياه ... زي الأفلام العربي تمام)

قعدت البنت قصادي ... وكانت مكسوفة جدا ... بصيتلها وحسيت ببعض الراحة ... مش جايز يبقى الجواز مش وحش أوي في الآخر برضه ؟؟؟

أخذ الكل يدخل في رغي جانبي حتى بدأت أمي الكلام فسكت شهريار ... أقصد جميع من في الغرفة ... وقالت :

- احنا يا أم حسن يشرفنا ويآنسنا إننا نطلب إيد بنتكو سحر لابننا تامر ...

- وده يشرفنا يا أم تامر .... ابنك ابن حلال مصفي ومتربي ...

- خلاص ... يبقى على بركة الله (زغرودة من الطرفين)

" إيه ده ... بكل بساطة كده ؟؟؟ ... هوه احنا طرش في الزفة ؟؟؟ "

قطع عمي الزغاريد بقوله :

- طيب مش هنتفق الأول يا أم حسن مع الناس ؟؟؟

ردت خالتي :

- أكيد يابو حسن تامرمش هيتأخر عليها بحاجة ... ولا إيه ؟؟

توجهت الأنظار كلها إلي ... فازدرت ريقي بصعوبة ... وخلرجت كلماتي بصوت مبحوح ... :

- إيه ؟؟؟ ... أكـ ..... احم ... أكيد ... طبعا ... بس ...

خالتي : على خيرة الله ... يبقى عايزين شبكة بـ 20 ألف .... ما هي البنت غالية علينا طبعا ...

اسبهللت ومنطقتش ...

- وطبعا الشقة اللي هوه هيجيبها دي حاجة احتياطي ... يعني ربط كلام ... البت لازم تخش في شقة واسعة متشطبة سوبر لوكس ... ويا سلام لو تكون في المعادي زي أختها ...

هممت بالتكلم هذه المرة لولا أن سبقتني الحاجة :

- يا أم حسن مانتي عارفة إن تامر لسه خريج ويادوب بيقبض على قده ...

- ماهو يا أم تامر لازم أضمن مستقبل البنت

- محدش قال حاجة يا أم حسن ... بس برضه خفي علينا شوية يا أختي

- ماهو أنا كده خافة عليكو أوي عشان انتي أختي ... حد غيركو كنت خليته يدفع مهر وشبكة وشقة كبيرة من دلوقتي ويكون معاه عربية ووظيفته تكون مدير فما فوق ... أومال ؟؟؟ ... هي سحر قليلة ؟؟؟

- لا يا خالتي ... جوزيها لوزير الصحة أحسن ...

رمقتني أمي بنظرة جانبية كأني عيل صغير قطع كلام الكبار ... وحاولت تلمحلي أسكت ... لكن على مين ... أنا اتكلمت على طول :

- يا جماعة احنا عايزين الدنيا تمشي وأنا مش هقدر على الحاجات دي كلها ... فالحل إننا نسأل العروسة ..

والتفت في ثقة إلى سحر وسألتها :

- ها يا سحر ... ترضي اني أجيب الحاجات دي كلها وأنا لسه بادئ حياتي .... اتكلمي متتكســ .....

- لأ طبعا

فاجئني ردها السريع ... بس أثلجت صدري كبطيخة بقالها اسبوع في الديب فريزر .... ثم أكملت سحر :

- طبعا مينفعش ... أنا ولاء صاحبتي جالها مهر 50 ألف جنيه ...

اتسعت عيناي مع هذا الرد الغريب وماسورة الكلام لا تزال تنبعث من فمها :

- ومحاسن بنت عمي جوزها معاه عربية بي إم الجديدة .... وهدى أختي ساكنة في المعادي ... أنا مش أقل منهم .... ولا إيه يا مامي ؟؟؟

رددت عليها بكل عفوية :

- أكيد لا يافندم ... حضرتك محتاجة أمير على حمارة عرجة ....

وقفت وتوجهت للباب وأنا بقول للحاجة :

- يلا يا أمي نلحق نركب اليخت عشان نروح الفيلا فبل ما طيارتنا توصل .....

وخرجنا معلنين نهاية هذا الحوار ....

- - - - - - - - - - - - - - - - - - - -

ممددا على الكنبة وفي إيديا كوباية النعناع وسرحان مع نفسي و ..... الحاجة دخلت عليا ...

- خير يا أمي ... في إيه تاني

- يابني متزعلش نفسك ....

- أنا زعلان عشان تفكير البنت نفسها يا أمي ... خلاص ... كل حاجة بقيت بيت وفلوس بالعبيط وكلاكس بيب بيب ؟؟؟

- خلاص يابني متزعلش نفسك بقه

- وأزعل نفسي ليه ... ؟؟؟ .... الحمد لله أنا معنديش مشاكل ...

- ................................

- بقولك إيه يا تامر ....

- خير يا أمي ...

- مش هنفرح بيك بقه يا ضنايا ؟؟؟

- تاااااااااااااااااااااااااااااااني ؟؟؟؟؟

**rekapidesign** · 12 / 08 / 2008, 09:35 PM

هههههههههههههههههههههههههه
لا حول ولا قوة الا بالله
يا عم الدنيا اتغيرت لو حصل الموضوع ده معاك حقيقي يبقي اكيد قريبك دول مش عايشين في الدنيا
البنات دلوقتي بيرضو باي حاجة والاهالي برضه الغلا قطم وسط الجميع الناس بقت حاسة ببعض اكتر
ربنا ميحرمناش من مواضيعك الجامدة يا عم يوسف يا جامد

**esamdrsh** · 12 / 08 / 2008, 09:56 PM

ربنا يخليلك الحاجه .....

موضوع جامد يا توتو .. قصدي يا يوسف ..

وفي انتظار الجزء التاني

**AHMAD-MAX** · 12 / 08 / 2008, 10:01 PM

ههههههه روعه ...
لازم تزورنا كل يوم يا يوسف مواضيعك ممتعه ^_^

**Jassar** · 12 / 08 / 2008, 10:08 PM

هههههههه!
حلوة جدا

الله يجوزنا .... والله يسترنا من تفكير بعض البنات!

**Shisha** · 13 / 08 / 2008, 12:37 AM

جميييييييييييييييييييييله...
المحتوى جميل والأسلوب اجمل فى سرد القصه

على فكره والله لسه حاصله فى واحد صاحبى من شهر او شهرين
قعد يحب البنت بينه وبين نفسه 4 سنين
ولما ظروفه بقت تسمح له بالزواج اتقدم لها... وأمها صديقة امه واقرب لها من اختها

ابوها طلب شبكه ب20 الف وشقه تمليك كبيره... والواد لسه بيبدأ حياته
وكانت نفس النهايه

الواد قرر مايتجوزش قبل ما يبقى عنده كل حاجه ويكون جاب كل حاجه ممكن يحتاجها والعروسه تكون آخر حاجه يفكر فيها

واشترى بفلوس الشبكه كمبيوتر

**Jassar** · 13 / 08 / 2008, 12:42 AM

على فكرة, في نكتة أجنبية مضحكة حابب أكتبها ( معلش أخي يوسف مش قادر أقاوم!!! ) :
لماذا المسدس أفضل من الزوجة؟؟؟؟

لأنه باستطاعتك أن تضيف له كاتم صوت!!!

**AM3D** · 13 / 08 / 2008, 12:59 AM

جميل ....
اسلوبك ممتع والقاراء اذا بدأ يتمنى ان لاينتهي من القراءه

**rabieart** · 13 / 08 / 2008, 01:03 AM

awlan
rabna ye7'alelak al 7aga
second...
ur ant gonna call ur mother soon arrange for anther session..

**وائل محمد** · 13 / 08 / 2008, 03:34 AM

موضوع شيق :::البنات دلوقتى بيتوزعوا مع بطاقية التموين

**dmo3** · 13 / 08 / 2008, 09:23 AM

هههههههههههههه
واللق استمتعت جدا بقراءة المدونة

**dmo3** · 13 / 08 / 2008, 09:25 AM

المشاركة الأصلية بواسطة jassar مشاهدة المشاركة

على فكرة, في نكتة أجنبية مضحكة حابب أكتبها ( معلش أخي يوسف مش قادر أقاوم!!! ) :
لماذا المسدس أفضل من الزوجة؟؟؟؟

لأنه باستطاعتك أن تضيف له كاتم صوت!!!

هههههههههههههههههههههههههههههههههههههههه
فعلا المراة كالمذياع
مذياع ايه المذياع افضل المذياع افصل الكهربا يسكت بس المراءة ..............

**A.yousf** · 13 / 08 / 2008, 01:01 PM

جميل جدا لو كنت في مصر

لكن تعالي اقعد معنا هنا وهتعرف ان الله حق

**maxspider** · 13 / 08 / 2008, 05:34 PM

المشاركة الأصلية بواسطة rekapidesign مشاهدة المشاركة

هههههههههههههههههههههههههه
لا حول ولا قوة الا بالله
يا عم الدنيا اتغيرت لو حصل الموضوع ده معاك حقيقي يبقي اكيد قريبك دول مش عايشين في الدنيا
البنات دلوقتي بيرضو باي حاجة والاهالي برضه الغلا قطم وسط الجميع الناس بقت حاسة ببعض اكتر
ربنا ميحرمناش من مواضيعك الجامدة يا عم يوسف يا جامد

متشكر يا جميل ... بس لعلمك ... الكلام ده بيحصل ...
أنا الحمد لله مدخلتش في مشاوير الجواز دي .... بس شفت مواقف يشيب لهولها الولدان

المشاركة الأصلية بواسطة esamdrsh مشاهدة المشاركة

ربنا يخليلك الحاجه .....

موضوع جامد يا توتو .. قصدي يا يوسف ..

وفي انتظار الجزء التاني

هههههههههههه .... على فكرة يا عصام ... الموقف ده محصلش معايا ... والحاجة عندنا أعقل من كده ....
بس السلسلة دي تجميعة لكام موقف كده ... وربك يستر

المشاركة الأصلية بواسطة AHMAD-MAX مشاهدة المشاركة

ههههههه روعه ...
لازم تزورنا كل يوم يا يوسف مواضيعك ممتعه ^_^

ربنا يكرمك يابوحميد .... أنا لو عليا أبات معاكو على طول

المشاركة الأصلية بواسطة Jassar مشاهدة المشاركة

هههههههه!
حلوة جدا

الله يجوزنا .... والله يسترنا من تفكير بعض البنات!

هههههههههه .... إن شاء الله نفح فيك قريب يا جسار .... متنساش تبقى تعزمنا بس ^_^

المشاركة الأصلية بواسطة Shisha مشاهدة المشاركة

جميييييييييييييييييييييله...
المحتوى جميل والأسلوب اجمل فى سرد القصه

على فكره والله لسه حاصله فى واحد صاحبى من شهر او شهرين
قعد يحب البنت بينه وبين نفسه 4 سنين
ولما ظروفه بقت تسمح له بالزواج اتقدم لها... وأمها صديقة امه واقرب لها من اختها

ابوها طلب شبكه ب20 الف وشقه تمليك كبيره... والواد لسه بيبدأ حياته
وكانت نفس النهايه

الواد قرر مايتجوزش قبل ما يبقى عنده كل حاجه ويكون جاب كل حاجه ممكن يحتاجها والعروسه تكون آخر حاجه يفكر فيها

واشترى بفلوس الشبكه كمبيوتر

هههههههههههه .... هي دي الناس اللي بتفهم .... على الأقل الكومبيوتر مبيطلبش طلبات ...

على فكرة يا شريف .... أنا مش لاقي موضوعك بتاع الجيش ... لمحته بس, ولما جيت أقراه ملقيتوش ... هوه راح فين ؟؟؟

المشاركة الأصلية بواسطة Jassar مشاهدة المشاركة

على فكرة, في نكتة أجنبية مضحكة حابب أكتبها ( معلش أخي يوسف مش قادر أقاوم!!! ) :
لماذا المسدس أفضل من الزوجة؟؟؟؟

لأنه باستطاعتك أن تضيف له كاتم صوت!!!

جامدة جدا .... أعتقد كمان المسدس ممكن يعمل دوشة ... بس بييجي عليه وقت ويسكت ... ^_^

المشاركة الأصلية بواسطة AM3D مشاهدة المشاركة

جميل ....
اسلوبك ممتع والقاراء اذا بدأ يتمنى ان لاينتهي من القراءه

جزاك الله كل خير .... سعيد بمرورك

المشاركة الأصلية بواسطة m.ramdan مشاهدة المشاركة

awlan
rabna ye7'alelak al 7aga
second...
ur ant gonna call ur mother soon arrange for anther session..

ربنا يباركلك يابوحميد ... تفتكر فعلا لسه في أمل ... هما واقعين للدرجادي ؟؟؟ ^_^

المشاركة الأصلية بواسطة وائل محمد مشاهدة المشاركة

موضوع شيق :::البنات دلوقتى بيتوزعوا مع بطاقية التموين

هههههههههه .... ساعتها محدش هيجيب بطايق تموين ....

المشاركة الأصلية بواسطة dmo3 مشاهدة المشاركة

هههههههههههههه
والله استمتعت جدا بقراءة المدونة

ربنا يكرمك يا غالي .... نحن نسعى دائما لراحتكم ^_^

المشاركة الأصلية بواسطة الجرح مشاهدة المشاركة

جميل جدا لو كنت في مصر

لكن تعالي اقعد معنا هنا وهتعرف ان الله حق

أنا على فكرة يا عُبد عشت فترة في السعودية وأنا صغير ... فكنت بسمع برضه عن شوية بلاوي .... لكن هناك ربنا يزيد ويبارك الناس معاها ... لكن هنا ... وي ويل بي باي باي ^_^

Unconfigured Ad Widget

إعـــــــلان

يوميات باحث عن عروسة ... بارت وان

يوميات باحث عن عروسة ... بارت وان

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق