موضوع: عـــــــــــــــــــــــــاوز شقـــــــــــــــــــــــــــة

ردود: 19 | زيارات: 3891
  1. #1
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585

    عـــــــــــــــــــــــــاوز شقـــــــــــــــــــــــــــة

    قصة كنت قد شاركت بها في مسابقة

    ---------------------------

    عــــــــــــــــــــــــــاوز شقـــــــــــــــــــــــــــة




    وقفت أعدل من هندامي مبتلعاً ريقي بصعوبة وأنا أتطلع إلى هذا الباب أمامي والذي يحمل لوحة ضخمة تبدو ذات ثمن باهظ من فحوى عبارتها "قسم الوحدات السكنية بجهاز المدينة" , ابتلعت ما تبقى من ريقي بصعوبة أكبر وأنا أجزم أن بحيرات فيكتوريا كلها لن ترطب فمي الجاف من التوتر .... طرقت على الباب بهدوء ممزوج بالتردد .... ثم انتظرت ... ولكن لا رد !!


    طرقت مرة أخرى بصوت أعلى .... لا رد .... رفعت صوت الطرقات قليلا لأفاجأ بسرينة إسعاف :

    - ما قلنا خش يا عم الحاج .... انتو طرش ولا إيه ؟؟؟؟

    تراجعت في خوف وأنا أستعد لأطلق ساقي لرياح الخماسين لولا أن عبر بمخيلتي طيف خطيبتي وأهلي ومستقبلي و الشرف والواجب والأمانة و ..... حسناً, لا بد من المحاولة .... نفس عميق آخر ثم دلفت إلى الداخل ...



    لمحت في سرعة ثلاثة مكاتب ... على أولها جلست امرأة في أواخر الثلاثينات أو الخمسينات - حسنا أنت تعلم كيف هو من الصعب تخمين سن امرآة على وجه الأرض – ممسكة بموبايل وهي ترغي بسرعة الصوت , وعلى المكتب الثاني الموظف الحكومي المثالي بنظارته الأنيقة ونظرته التي تجمع بين اليأس والغل والسادية وكوب الشاي العروسة إياه , وموجهاً بصره إلى المكتب الثالث متظاهراً بالاستماع إلى ذلك الموظف الشاب الذي يتكلم عن فساد التعليم وضياع الفرصة في الوظائف والحكومة والمعارضة والانتخابات والماتش وسونيا بتاعة الليمون ...



    فكرت في جزء من عشرة أجزاء من الثانية بسرعة يحسدني عليها أدهم صبري نفسه , وخمنت أن الموظف الشاب سيكون أكثر تفهما لوضعي ... توجهت نحوه وأنا أرسم ابتسامة الموناليزا وأقول :

    - السلام عليكم ... لو سمحت انا كنت بسأل عن الــ ....

    قاطعني بإشارة من إصبعه نحو عشماوي ... أقصد الموظف السابق ذكره وهو يردد :

    - أي حاجة اسأل الأستاذ عبد المتجلي .... هوه هيفيدك أكتر ...

    حاولت استعطافه :

    - بس أنا بسأل على موضوع إسكان الشباب اللي ....

    قاطعني بصوت هادر :

    - يا أستاذ يا محترم قلتلك روح المكتب ده .... ده أهوه اللي هناك ... متحسسنيش إنك هتخبط مشوار لرمسيس ... إنتو هتقرفونا في عيشتنا ليه ؟؟؟

    "آه يا بن الإيه ... اومال إيه الحكومة والتعليم والشهادات .... ده أحسن حاجة أبلغ عنك أمن الدولة ييجو يظبطوك "

    هتفت بالكلمات في سري في حنق ورمقته بنظرة بغض وكره تكفي لتلويث عيد الحب ثلاث سنوات متتالية ... وتوجهت إلى مكتب الموت ... أقصد مكتب عبد المتجلي بيه ...



    رسمة موناليزية أخرى .... مع تحية ظريفة :

    - السلام عليكم ... صباح الخير يا جميل ....

    - .............................

    - كنت قاصد حضرتك في خدمة يا عبد المتجلي بيه

    - .........................

    - هوه حضرتك سامعني ؟؟؟

    - ..........................

    - لا حول ولا قوة إلا بالله .... الراجل مات يا جدعان ... مات وهوه بيأدي واجبه الوطني ... مات وهو بيحمل رسالة ... هي دي مصر ... وهما دول رجالة مصر... ولو لم أكن ...

    صرخ في الموظف الشاب :

    - لو لم اكن إيه ووددت إيه يا عم مصطفى كامل .... فوق بقى وبطل التربتيتة اللي انت بتعملها دي ... بدل والله ما أناديلك الأمن يرميك في العباسية نفسها ...

    - بس ... بس ... الراجل بجد مبيردش ... لا يكون حصله حاجة

    - حصله إيه بس الله يخرب بيتك ... هوه بس تلاقيه مهنج ...

    - مهنج ؟؟ !!!!

    - هز كوباية الشاي اللي في إيده وهتلاقيه فاق وبقى معاك زي الحلاوة ...

    مددت يدي في توتر كمن هو على وشك نزع فتيل قنبلة نابالم ... وبيد مرتعشة هززت الكوب و ....

    فجأة تحرك عبد المتجلي والتقط القلم ثم نظر إلى عيني مباشرة و .... :

    - حيوان معندوش دم وبينام بالنهار بيتكون من أربع حروف ...

    - نعم ؟؟؟؟

    - قصدك نعامة .... بس ده طائر مش حيوان ...

    لمحت الجريدة والكلمات المتقاطعة فأدركت كل شئ .... ضغطت على أعصابي بجزمة فولاذ وقلت :

    - لو سمحت يا أستاذ عبد المتجلي ... تسمحلي أقطع وقت سعادتك الثمين .... وأستأذنك في كام سؤال ؟؟؟

    - يووووووووه .... هوه احنا مش هنرتاح خالص في الشغلانة الهباب دب ؟؟؟

    - معلش يافندم ... كلك ذوق وأنتكة .... استحملونا ... شباب صغير بأه ...

    - شباب صغير ؟؟؟ .... طب قول يا عم الكتكوت .... عايز إيه ؟؟؟

    - كنت بسأل يعني على وحدات الإسكان للشباب ....

    - ثواني يا محترم ... أبصلك في الدفاتر إيه "المتواجد"

    بينما يبحث الأسطى في عدته ... أقصد الموظف في دفاتره ... استرقت نظري إلى موظفة المكتب الأول .... ما شاء الله ... لسه بتتكلم ... أمنية حياتي أن أعرف من أين يأتون بهذا الكم من المواضيع ؟؟؟

    قطع أستاذ عبد المتجلي أفكاري وهو يقول :

    - للأسف يافندي .... مفيش

    رددت ببلاهة :

    - مفيش إيه بالضبط ؟؟

    - مفيش عيش ... مفيش بنص جنيه فول ........ أكيد بقولك مفيش شقق ... خلاص ... بح ... فنشنا ...

    - ازاي يافندم .... ده أنا لسه قاري الإعلان وبيقول ...

    - وحدات سكنية للشباب ..... عارف .... بس خلصت ...



    وقفت مسبهلاً وكأن على رأسي طائر العنقاء ذاته .... ولعابي يكاد يتساقط من فمي في بلاهة ... خلصت ازاي ... الإعلان قرأته من يومين فقط .... والحل ؟؟؟ .... والعمل ؟؟؟ ... والـــ ....



    - الله يا أستاذ عبد المتجلي .... متفرفش شوية ...

    التفت إلى صاحبة الصوت ... كانت الموظفة وقد انتهت من عصر التليفون ومص دماغ من على الطرف الآخر .... وهي تكمل :

    - ما تبحبح على الراجل شوية ... دول لسه شباب صغير ... زي تامر ابنك كده ...

    وأشارت إلى الموظف الشاب الذي كان يغط في نوم عميق .... "بقى كده ... دول عصابة ومقسمينها بقى"

    أكملت شهرذاد ... قصدي الست الموظفة :

    - تعالى هنا يابني ... أنا هخلصلك الموضوع ...

    تهللت أساريري وأنا اتوجه نحوها في عجلة ... وشلال من الشكر يخرج من فمي :

    - ربنا يكرم أصلك ويعمر بيتك ... مش عارف أشكر حضرتك إزاي ... أنا ممتن جدا ... ربنا يكتر من أمثالك ...

    - على إيه يابني .... ده شغلنا ...

    - يا سلاااااااااام ... وكمان تواضع .... ياريت ستات مصر كلهم زيك .... مكناش هنستورد حنان من بره خالص

    - حنان اتجوزت

    - ما نا قلت برضه البت دي لازم ترسى وتعقل شوية

    - نعم ؟؟؟

    - ولا حاجة ... حضرتك قلتي إنك ممكن تخلصيلي الموضوع ...

    - أيوه .... في كام شقة كده بيبقوا هنا ولا هنا ...هشوفلك واحدة

    - ياما انت كريم يا رب

    انكبت على حاسبها لتقوم بالبحث وأنا اطرق على المكتب في توتر وأنقل بصري بين عبد المتجلي "اللي شكله هنج تاني" وبين تامر تيتو ننوس عين أمه والريالة تنزلق من فمه مغرقة سطح مكتبه ...

    - لقيتها ....

    التفت في سرعة :

    - بــ .... بجد

    - أيوه .... سكن لمحدودي الدخل ...

    - كمان ... يعني أسعار لذيذة ...

    - المساحة 62 م مربع

    - مش مهم ... أهي أي حاجة على ما تفرج

    - المقدم 50 ألف جنيه ....

    - إيه ؟

    - القسط 850 جنيه شهرياً ...

    - إيييههه؟؟

    - بزيادة 30% كل شهر .....

    - إييييييييييييييييههههههههههه ....

    لم أنتبه كيف كانت الـ "إيه" الأخيرة عالية إلا بعد أن وجدت رسالة على موبايلي من أختي في فرنسا "بتطمن عليا عشان سمعتني بزعق" ...

    تمالكت ما تبقى من بقايا أعصابي المحترقة وأنا أقول :

    - إيه الأرقام الخرافية دي ؟؟ واسمها لمحدودي الدخل ؟؟ ... دي لحرامية الدخل ...

    - هي دي الأسعار اللي موجودة ...

    - طيب مفيش حاجة تانية يا .....

    - عفت

    - يا مدام عفت

    فجأة ... تجمدت أصابعها على الكيبورد ... ونظرت إلى بعينين محشرجتين ... وصرخت ..:

    - مدام إيه جاك ستين مو في عيشتك .... أنا مادموزيل يا محترم ...

    - بس النوع ده خلص من السوق من زمان ...

    - نعم ؟؟؟؟

    - لا .... قصدي ... أنا آسف ... معلش .... حقك على دماغي من فوق يا آنسة ...

    - عالم بجحة ...

    رددت في سري " عيشي على قفايا ... تلاقيكي راسمة على البوي فريند بتاعك"



    عادت الأستاذة تبحث من جديد .... وراحت تمرر أصابعها ببطء شديد كمن لا يزال يتعلم النقش على جدران المعابد ... ثم التفت إلي :

    - للأسف مفيش حاجة تانية ... هوه ده كل اللي موجود ...

    اجتمعت كل ملامح الحزن والكآبة كما صورها فيلم البؤساء على وجهي وأنا أكلم نفسي :

    - طيب أعمل إيه دلوقتي ... أفسخ الخطوبة ولا أدور على تلات شغلانات بعد الظهر ولا أنفض لأم الجواز ....

    - هوه ....... احتمال في حل ...

    انتفضت بسرعة وأنا أمسح عماص الحزن من عيني وأردد :

    - بجد بجد يا مدا ....

    نظرة متوعدة من عينيها أرجعتني إلى صوابي ....

    - قصدي ..... يا مادموزيل آنسات جميلة جميلات الجيارة ؟؟؟ بجد ؟؟؟

    انتشت بهذا التعبير الفلسفي المجرد وردت :

    - أيوه .... في شقة 92 م

    - جميل ... بس دي أكيد هتبقــ ....

    - ومقدم 25 ألف

    رددت في شك :

    - والقسط ؟؟؟

    - حاجة عبيطة .... 180 جنيه بدون زيادة ...

    كدت أقفز من مقعدي لألتصق في السقف كسبايدر مان .... ووضعت يدي على قلبي لأجده يسابق أحد فهود شيتا في أحراش أفريقيا ... وتكلمت وأنا غير مصدق ...

    - بجد؟ .... بجد بجد؟؟ .... ولا .... بجد ؟؟؟

    - أيوه بجد (مع ابتسامة أموية لطيفة)

    - يا الله .... يابركة دعاكي يا حاجة ....

    - بس ....

    تلاشت ابتسامتي .... وتنحت عيناي .... وبدأ خدي في إصدار حركات عصبية ....

    - احم .... بس .... إيه؟

    مالت ناحيتي كمن سيهمس لي بسر اغتيال كينيدي ... وقالت :

    - انت عارف يعني .... لازم تراضي الناس

    - ناس مين ؟؟؟

    - ما هو أنا مش هعرف أجيبلك حاجة لقطة كده إلا لما أأكل الناس اللي حواليا

    - آآآآآآآآآآآآآآآآآآآآآآآآآآه .... ماشي ماشي .... طيب إيه المطلوب ؟؟؟

    - يعني .... عشرين لكل واحد ...

    - ومعاكو البرطة اللي ملوش لزمة اللي اسمه توتي ده ؟؟؟

    - أيوه طبعا ... عشان يغطي معانا ...

    زفرت في قرف ... ومددت يدي في جيبي وأخرجت ستين جنيها ووضعتها أمامها وأنا اقول :

    - حلال عليكو ....

    تراجعت عفة فجأة وهي تنظر إلى في دهشة ... ثم "رقعت" ضحكة من ضحكات الستات إياها :

    - إيه ده يا أستاذ ...

    - الله ... الستين جنيه اللي حضرتك قلتي عليهم

    - ستين جنيه إيه ؟؟؟ .... أنا قصدي عشرين ألف لكل واحد

    - ......................

    - يعني ستين ألف جنيه ....

    - .................



    نظرت مسبهلا .... مسبهلاً فعلاً .... وأحسست كأنما كلمة Game Over تلوح أمامي على الشاشة ... وبدأ فكي في السقوط ...

    - في إيه يا أستاذ ... ؟؟؟

    قمت من مكاني ...

    - يا أستاذ ....

    توجهت ناحية مكتب عبد المتجلي أفندي وصوت عفت يردد :

    - إنت يا محترم ... أنا مش بكلمك ...



    هززت كوب الشاي الخاص بأستاذ عبد المتجلي .... فلمعت عيناه وبدأ بالاستجابة ... فبادرته :

    - حضرتك بتسأل عن حيوان معندوش دم وبينام بالنهار بيتكون من أربع حروف ؟؟؟

    رد في سعادة :

    - أنت عرفته ولا إيه ؟؟؟

    - أيوه ..... موظف ...


  2. #2
    عضو متميز
    تاريخ التسجيل
    Oct 2007
    المنطقة
    FORGOTTEN CITY
    ردود
    4,893
    جامده طحن يابرنس
    درس راوتر{نمذجة+خامات+إضاءة} هنـــــــا

    درس سيف{نمذجة} هنـــــا

    تولة طيب{ نمذجة+خامات+إضاءة} هنــــا

    اصنع مكتبة خاماتك بنفسك
    هنــــا
    غائب للابد

  3. #3
    عضو متميز
    صور رمزية y@sser
    تاريخ التسجيل
    May 2003
    المنطقة
    جوانتانامو مصر
    ردود
    10,884
    والله يا يوسف تتعمل انمي تكسرالدنيا
    فكر في الموضوع بجد
    بلاد الكوارث
    حيث جميع الشعب وجلاديه يبحثون عن العقل والقلب والشجاعه المفقودين
    لكن للاسف لاوجود للساحر اوز
    وتنتهي القصه بفقد الحذاء الاحمر
    وتبقي اليس في بلاد الكوارث للابد

    مدونتي

  4. #4
    عضو متميز
    صور رمزية Limponi_3d
    تاريخ التسجيل
    Mar 2005
    المنطقة
    شمال السودان شرق ليبيا غرب السعودية جنوب فلسطين
    العمر
    33
    ردود
    1,388
    بصراحة روعة يا يوسف....
    النهاية تحفة....

  5. #5
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة العقرب77 معاينة الرد
    جامده طحن يابرنس
    ههههههههههه ... انت اتعديت من المصريين يا جدع ^_^

    اقتباس الموضوع الأصلي كتب بواسطة y@sser معاينة الرد
    والله يا يوسف تتعمل انمي تكسرالدنيا
    فكر في الموضوع بجد
    حبيبي وحبيبي و ..... حبيبي والله
    والله يا ياسر الموضوع بقى مجموعة كتيرة من الأفكار ... بس فين الوقت وفين التنفيذ وفين الخبرة وفين المعرفة و ...... شكلها هتتلم في كراسة صغنطوطة مع اخواتها في الآخر

    اقتباس الموضوع الأصلي كتب بواسطة Limponi_3d معاينة الرد
    بصراحة روعة يا يوسف....
    النهاية تحفة....
    ميرسي جدا يابوحميد ... انت فين يا جدع ... ؟؟؟ ... مبشوفكش غير تخاطيفي

    إييييييييييييييييييه .... فاكر أحمد موبينيل ومحمود 3d وأيام جمعية محبي تصميم السيارات ؟؟؟

    كانت أيام يا جدع

  6. #6
    و الله قصة روعة
    عن عبدالله بن عمرو بن العاص قال: قال رسول الله

    صلى الله عليه وسلم: (ما على الأرض أحد يقول:

    لا إله إلا الله، والله أكبر، ولا حول ولا قوة إلا بالله العلى العظيم

    إلا كفرت ذنوبه ولو كانت مثل زبد البحر) يعنى التحقق بذلك
    ----------
    معرض اعمالي

    http://www.4shared.com/file/123293016/12465153/067.html

  7. #7
    عضو قدير
    صور رمزية nazzal
    تاريخ التسجيل
    Oct 2005
    المنطقة
    المملكه الاسلاميه المتحده
    ردود
    2,939
    مش عارف اقولك ايه.................جامده موت وراكبه معايا لبس يا ريس
    انا كنت قاعد بقلب في النت علي اخبار الشقق للشباب والاحلام دي.....ومشروع اوراسكوم اللي في اكتوبر....والهجص اللي احنا عايشين فيه
    قلت اروق دماغي شويه من كميه الالفات اللي اترصت ادام عيني المسكينه وادخل افرفش شويه في المنابر.........
    لقيت موضوعك ........... سبحان الله فعلا

    كل سنه وانت طيب ورمضان كريم

    قل إن شاء الله وليس إنشاء

    محمد راغب ( نزال)
    .................................................
    اللهم ارحم احمد واجمعنا معه في جنه الخلد بلا سابقه عذاب

  8. #8
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة زكرياء معاينة الرد
    و الله قصة روعة
    جزاك الله كل خير ... وشكرا على مرورك الفاضل ^_^

    اقتباس الموضوع الأصلي كتب بواسطة nazzal معاينة الرد
    مش عارف اقولك ايه.................جامده موت وراكبه معايا لبس يا ريس
    انا كنت قاعد بقلب في النت علي اخبار الشقق للشباب والاحلام دي.....ومشروع اوراسكوم اللي في اكتوبر....والهجص اللي احنا عايشين فيه
    قلت اروق دماغي شويه من كميه الالفات اللي اترصت ادام عيني المسكينه وادخل افرفش شويه في المنابر.........
    لقيت موضوعك ........... سبحان الله فعلا

    كل سنه وانت طيب ورمضان كريم
    والله يا جميل مش انت بس ... كلنا مطحونين في المواضيع دي ..... وياما بنشوف أو نسمع قصص خرافية .... ربنا يرزقنا بحاجة تلمنا بجد

  9. #9
    بصراحة , روعة والله . .
    ماشاء الله عليك يا أخي , الموهبة مصقولة لديك .
    AL-KETBI™ | all copyrights© reserved 2007-2014 - maxforums.net

  10. #10
    عضو متميز
    صور رمزية MAXIOS
    تاريخ التسجيل
    May 2007
    المنطقة
    Cairo, Egypt
    ردود
    1,938
    جامده جداً
    543212345
    خالد ماهر
    ـــــــــــــــــــــــــــــــــــــــــــــــــــــــــــــــــــ
    My Animations



  11. #11
    master 3D
    صور رمزية jagalinho
    تاريخ التسجيل
    Jun 2008
    المنطقة
    الـــــمـــــغـــرب بالخصوص في تطوان
    العمر
    23
    ردود
    3,541
    جااااامد جدا جدا
    بلاد الحر طبتي يا بلادي *** ملاذا طاب عيشك في فؤادي

    blender for ever

  12. #12
    عضو متميز
    صور رمزية mmnoor
    تاريخ التسجيل
    Nov 2007
    المنطقة
    ساكن فين ؟؟ انت مخبر ولا ايه ؟؟؟
    العمر
    31
    ردود
    6,588
    اقتباس الموضوع الأصلي كتب بواسطة AL-KETBI معاينة الرد
    بصراحة , روعة والله . .
    ماشاء الله عليك يا أخي , الموهبة مصقولة لديك .
    مصقولة من الهم اللي احنا فيه - ما تزعلشي مني يا أستاذ يوسف - بس بصراحة الواحد بقى من همه بيضحك

    القصة جامدة وواقعية جداً
    (وَإِذَا قِيلَ لَهُمُ اتَّبِعُوا مَا أَنزَلَ اللَّهُ قَالُوا بَلْ نَتَّبِعُ مَا وَجَدْنَا عَلَيْهِ آبَاءنَا أَوَلَوْ كَانَ الشَّيْطَانُ يَدْعُوهُمْ إِلَى عَذَابِ السَّعِيرِ) لقمان :21

    الرد على من قال بحل المعازف

    http://www.abumishari.com/

  13. #13
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة AL-KETBI معاينة الرد
    بصراحة , روعة والله . .
    ماشاء الله عليك يا أخي , الموهبة مصقولة لديك .
    ربنا يكرمك أخي ... الحمد لله إنها عجبتك

    اقتباس الموضوع الأصلي كتب بواسطة MAXIOS معاينة الرد
    جامده جداً
    ميرسي يا جميل ^_^

    اقتباس الموضوع الأصلي كتب بواسطة jagalinho معاينة الرد
    جااااامد جدا جدا
    متشكر جدا يافندم ^_^

    اقتباس الموضوع الأصلي كتب بواسطة mmnoor معاينة الرد
    مصقولة من الهم اللي احنا فيه - ما تزعلشي مني يا أستاذ يوسف - بس بصراحة الواحد بقى من همه بيضحك

    القصة جامدة وواقعية جداً
    يا عم وأزعل ليه ... كلنا في الهوا سوا

  14. #14
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    32
    ردود
    2,260
    جامده جدا يا زعيم

    انت فنان
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  15. #15
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة mansy1985 معاينة الرد
    جامده جدا يا زعيم

    انت فنان
    متشكر يابوحميد ... أخبارك إيه يا ريس في الإمارات ؟؟؟

  16. #16
    م.احمد منسي
    صور رمزية mansy1985
    تاريخ التسجيل
    Mar 2006
    المنطقة
    مصر-بورسعيد-الامارات العربيه المتحده-ابو ظبي
    العمر
    32
    ردود
    2,260
    انا تمام حتي الان الحمد لله

    المهم انت عملت ايه في المسابقه؟؟
    Junior Architect-Ahmed Abdel Aziz
    Mansy

    إن من يختلف معك فكريًا في العالم العربي هو على الأرجح ملحد أو عميل أو شاذ جنسيًا،




  17. #17
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    لسه ياريس .... النتيجة النهاردة الساعة عشرة ونص

    بس أحب أطمنك ... مش أنا اللي يفوز يا عم الحاج ... انت عايز تبهدل سمعتنا ... احنا آخرنا المشاركة الشرفية ... والكلام ده بجد على فكرة ^_^

  18. #18
    عضو قدير
    صور رمزية esamdrsh
    تاريخ التسجيل
    May 2005
    المنطقة
    أبو ظبي
    العمر
    32
    ردود
    8,607
    ههههههههههه
    ما شاء الله اسلوبك خرافي فعلا
    انت المفروض تتخرج من مصر على بكسار عطول .. مش هيلاقوا زيك 2

  19. #19
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    ياريت يا عصام ... بس أملي الوحيد في بيكسار أروح أحكي حواديت لولاد كارلوس بينا ونيل بليفينس ... ويمكن أمسح أرضية المطبخ وأجهز العشا ...

    غير كده .... "أي ويل نوت سارفايف إني مووور" ^_^

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل