صفحة 1 من 3 123 أخيرأخير
النتائج المعروضة من 1 الى 20 من مجموع 57

موضوع: يوميات باحث عن عروسة – بارت فور

ردود: 57 | زيارات: 6085
  1. #1
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585

    يوميات باحث عن عروسة – بارت فور

    لمن لم يطالع البارتات السابقة :
    يوميات باحث عن عروسة, بارت وان
    يوميات باحث عن عروسة - بارت تو
    يوميات باحث عن عروسة - بارت ثري

    يوميات باحث عن عروسة – بارت فور

    السابعة والنصف صباحاً ...

    ها أنا أجلس منذ صلاة الفجر كالعادة على حاسوبي العزيز, أقوم بإنجاز بعض الأعمال وتصفح الانترنت بين الفينة والأخرى, كوب نعناعي الساخن يمدني بالطاقة و"الدماغ" الكافيتان لإكمال مشوار التركيز ... غارقا في كل ذلك, إذا بيد حانية رقيقة تربت على ذراعي ... التفت, آه, إنها "حياة" أختي الصغرى بالصف الثالث الابتدائي ...

    لمن لا يعرفها ... هي ملاك رقيق, عليها ابتسامة تذيب القطب الشمالي وتحوله إلى حتة أيس كريم صغيرة, قبلة صغيرة منها تنسيك همومك ولو كنت رئيس منظمة "شايل طاجن سته" ... الغريب ان هذا ما تطالعه نهارا, أما ليلا عند قدوم ميعاد نومها, فهي تتحول إلى شيطان صغير يعيث في البيت صخبا ... أبي من النوع الذي يحب النقاش الهادئ, لذا فهو يرزعها كفاً سوبر تحيلها إلى كتلة من الصراخ التوتري المزعج على سريرها, حتى يغلبها النوم, فتنام مرتاحة, ويرسل أهالي المدينة المجاورة برقيات شكر لنا على انتهاء هذه الكارثة البكائية ...

    المهم, أنها كانت في حالتها الملائكية إياها, رغم بوزها العريض لعلمها أنها ستتوجه إلى معتقل التعذيب اليومي, المدرسة ... ابتسمت لها متسائلا :
    - خير يا "حياة" ... في حاجة
    - أيوه ... تعالى وصلني المدرسة عشان بابا نزل بدري وموصلنيش
    - مانتي شايفة يا ماما إن عندي شغل كتير ... روحي خلي "أسامة" يوصلك
    - قلتله ... قالي هوه مفيش مرمطون غيري في البيت ولا إيه ؟
    - ومحمد ؟
    - نطيت في كرشه تلات مرات ... بس مش عايز يصحى برضه, ده كان فاكرني حتة جاتوه وهياكلني, بس ربنا أنقذني ...
    - طيب يا غلباوية, أنا مش فاضي ... شوفيلك مواصلة تانية


    نظرت الفتاة إلي شزراً, ولولا أني أعلم أني أخوها الأكبر لركضت خوفا من أن تناولني "لكمية" محترمة, ثم نفخت هواءا ساخنا أول الغرفة لدرجة الشواء, وانطلقت تدب على الأرض مبرطمة بكلام من عينة "يارب خدني من البيت ده وريحني ... كان لازم يبقالي أخوات ... يا رب النت يولع"

    أمسكت أعصابي .. وأدركت أن الحوار لم ولن ينفع معها, حسنا , المرة القادمة سأستخدم أسلوب أبي الناجح مع هذا الجيل المتعفرت ..
    عدت بنظري إلى شاشة الجهاز وبدأت في العمل و ...

    - تامر
    - تااااااااااامر
    - تاااااااااااااااااااااااااااامررررررررررررررر

    آه ... أمي العزيزة ... لا زالت تصر على إيقاظ عم مرعي الأطرش الذي يسكن بالقرب منا ... قمت بسرعة متوجها لها قبل أن تصاب أسود الكونغو بالصمم, ونتكفل نحن بفواتير علاجها ...

    وصلت لها في غرفتها قبل أن تبدأ في وصلة تامرية أخرى ... سألتها :
    - خير يا حاجة
    - معلش يا تامر يا أخويا ... خد البنت أختك وديها المدرسة

    رمقت تلك العفريتة الصغيرة ذات البوز الملتوي بنظرة غل, ورددت :
    - مش هينفع يا أمي ... معايا شوية شغل
    - يابني روح بسرعة .. دول خطوتين
    - يا حاجة مبحبش أقطع تركيزي, سيبيني في حالي
    - معلش يا تامر ... مفيش حد غيرك
    - بصي يا حاجة ... أنا مش فاضي خالص, ومش هروح أوديها ...


    ---------------------------------


    أسير في الشارع بجانب تلك المزعجة موصلا إياها إلى المدرسة ... لا أعلم كيف انتهى بي الحال هكذا, لكنه انتهى على أي حال !!!
    - تامر ... انت جاي بالترنج والشبشب المقطوع ده ؟
    - أيوه يا أستاذة, فيها حاجة ؟
    - لأ يعني .... بس احنا رايحين المدرسة و ...
    - يعني رايحين حفلة تخرج ولا سهرة سواريه ؟ دي مدرسة ابتدائي كحيتي
    - تامر ... يعني إيه سواريه ؟
    - ده المكان اللي بيحطوا فيه العيال اللي بترخم على أخواتها الكبار, ويفضلوا يزغزغوا في رجليهم لحد ما سنانهم تقع
    - طيب طيب ... خلاص


    مشينا شوية ....
    - تامر ... متجيبلي عود قصب ...
    - أنا ممكن أجيب واحد أكسره على دماغك ... انجري يا بت على المدرسة ...
    - يووووه ... دي بقت حاجة صعبة, أنا هبقى أجيب واحد بعد المدرسة وأغيظك بيه
    - غيظي ياختي ... فاكرة نفسك جايبة عود دهب؟ .. ده حتى مسوس والراجل بخلان يحشيه ...


    وصلنا مدرستها المتهالكة وعبرنا بوابتها, الأطفال في كل ركن وكل زاوية, أطفال عند الباب, في الحوش, في الحمامات, فوق النخل, حتى أني أخرجت طفلا من بين قدمي كان يبحث عن "بلية" !!!

    وبينما أنا في هذا الهرج, تركت أختي يدي فجأة, وهي تجري منادية : ازيك يا ميس "هيام" ؟
    التفت إليها لأريها النجوم في عز الظهر ولأطلق قذائف "البونيات" التي سوف .....
    - ازيك يا حياة ؟

    احم ... وقفت كالتمثال, وتجمد كل ما حولي ... وأنا أطالع حياة تسلم على أستاذتها "هيام" وتضحك معها.
    كانت أستاذتها تلك ترتدي إسدالا, وتملك وجها مريحاً رقيقاً جذاباً , يشع منه نور آسر و ...
    - حضرتك أخوها ؟

    أفقت على سؤالها مكتشفا أني أنظر إلى عينيها مباشرة, أسرعت أغض بصري محاولا الرد :
    - نعم ؟ .... إيه ... آه .. أيوه أيوه ... أخوها ... هيهيهيه
    - بص يا تامر ... دي أبلة "هيام"
    - أيوه ... دي "حياة" بتحكي عنك كتير, بتقول : أنا مبفهمش العلوم إلا من ميس "هيام"
    - احم ... تامر, العلوم بتاعة ميس "رغدة", أبلة "هيام" مسئولة المكتبة ...
    - إيه؟ ... أيوه ... سوري ... أصل عندي زهايمر في الأسماء ... معلش
    أخذتُ أحاول مداراة الشبشب المقطوع, و مساواة شعري الذي يشبه "لفة سلك المواعين", وهي ترد :
    - ولا يهم حضرتك ... على فكرة , أختك "حياة" ممتازة جدا ... ربنا يخلهالكو
    - ماهو "تامر" اللي بيذاكرلي يا ميس
    - بجد, دي حاجة كويسة جدا انك تاخد بالك منها
    - يوه, دي حاجة بسيطة جدا ... أنا بحب دايما أخدم النشء الصغير, دول زي أولادنا برضه
    - ربنايكرمك ... طب نستأذنك عشان الطابور هيبتدي ... سلمي على أخوكي يا "حياة" عشان نمشي

    جرت العفريتة الصغيرة نحوي, انحنيت أقبلها وهي تردد :
    - زي أولادنا برضه؟! أقولها إنك موصلني بالعافية ؟
    - تظاهرت بالابتسام وأنا أضغط على أسناني :
    - خليكي جدعة, وهجيبلك قصب المرة الجاية
    - وكراسة رسم وكيس دوريتوز ... اتفقنا ؟
    - طيب يا مستغلة

    ضحكت وانطلقت إلى معلمتها, ثم اتجهتا معا إلى أرض الطابور بينما غادرت أنا المدرسة, ولكن ليس كما دخلتها ...

    ---------------------------


    أنهيت عملي في ذلك اليوم بين تركيز وتهييس, ثم انطلقت عائدا إلى البيت, تناولت العشاء على عجل ثم ناديت "حياة":
    - إيه يا توتة ... مش عايزاني اذاكرلك ؟
    توقف البيت كله فجأة, ونظر لي الكل في استغراب ... تنحنحت بحرج وأنا أردد :
    - أنا بس قلت الامتحانات قربت فلازم ناخد بالنا منها ...
    رفعت أمي حاجبا وخفضت الآخر مرددة :
    - خير ... خير ... هيه فعلا محتاجة حد يذاكرلها اليومين دول

    جاءت "حياة" ناظرة إلي من تحت لتحت قائلة :
    - آآآآه ... تذاكرلي ... ولّا عايز تعرف عن أســ ...
    كتمت فمها بسرعة, وربطتها, ثم أختها طيران على الصالون وأغلقت الباب من خلفي ... القيتها بعد أن عضت يدي, ثم هددتها :
    - عارفة لو استهبلتي وعملتي فيها ناصحة ... هرميك من السطوح عند الكلب بتاع الواد حمادة ....
    - لاااااااااااااااااا ... خلاص يا تامر ... عشان خاطري معلش ...
    - أيوه كده اتعدلي, عالم متجيش إلا بالعين الكاروهات
    ...


    تذكرت فجأة أني أنا من يحتاج إلى المعلومات, وأني في موقف الضعف, تذمرت من هذا الموقف الذي يجعلك لعبة في يد طفلة عفريتة في الصف الثالث الابتدائي لا تعرف الفرق بين الجامعة والجمعية ...
    انحنيت في عطف أبوي شديد, وفي صبر أقل من صبر أيوب قلت لها:
    - حيوته ... حبيب قلبي ... أنا يهمني مصلحتك ...
    - أكيد .. مانا عارفة
    - بقولك صحيح ... مين ميس "هيام" دي ؟
    - دي مسئولة المكتبة, أصلي في الفسحة والحصص الفاضية بروح المكتبة أقرا كتب, فهي عارفاني وسعات بتقعد تتكلم معايا
    - طيب بصي يا "حياة" ... أنا هطلب منك مهمة سرية ... توب سكريت يعني
    ...

    وانحنيت على أذنها أخبرها بتفاصيل خطتي الخاصة...

    -----------------------------------------


    استمر الموضوع أياما, كنت آخذ "حياة" إلى مدرستها يوميا, مرتديا ملابس العمل ومصففا شعري كـ "ألفيس بريسلي" هادفا إلى رؤية "هيام", في بعض الأحيان كنت أستطيع مقابلتها, وأحيانا أسألها عن أحوال أختي في الدراسة بحكم متابعتها لها, وعند عودتي من العمل أجد نفسي أستمع إلى أناشيد من عينة "زوجتي" و"أفراح وورود" و"ياجماله" بكثرة ... بل إني فسدت لدرجة أني أقرأ بعض الشعر الجاهلي خلسة !! ... ده الموضوع بقى خطير ...
    كل ذلك وأنا أكون قراري المصيري ...

    ----------------------------------------


    "تتجوز؟؟!"

    نطقت أمي بالكلمة في استغراب ونحن على مائدة الطعام, أخي يضحك بصوت عالٍ جدا, وأخي الآخر يغمز بعينيه مرددا :"ياواد يا لئيم" ... بينما أختي تسائلت : ومين دي بقى ؟ ... طبعا أبي لا يزال يطالع الجريدة ولم يكلف نفسه بمتابعتنا ...

    انحنيت على "حياة" لأخذ رأيها, تهامسنا قليلا, وأمي تنظر باستغراب :
    - شوف ياخويا العيال, انت بتاخد رأي المفعوصة دي ولا إيه ؟؟
    اعتدلنا, و"حياة" على وجهها نظرة ثقة لإحساسها إنها أصبحت كبيرة ويؤخذ برأيها, بينما تكلمت أنا :
    - دي الأبلة بتاعة "حياة" في المدرسة ... مسئولة المكتبة و ....
    - إيه ده؟ ... وهي عارفة إنك ساقط محو أمية ؟
    - اوعى لما تتجوزوا تجيبوا رف إيجار, دوروا مكتبة تمليك أحسن
    أخذ هذان الأخان الظريفان بالضحك على تعليقيهما الأخيران, ويصفقان بيد بعضهما كمجاذيب القرون الوسطى, نظرت بقرف إليهما وأوضحت :
    - لن أقول إلا ..... ربنا يشفي البعدا ...

    سألتني الحاجة : وظروفها إيه دي ؟
    - عادي, انتين نظام وكتالوج استعمال يصرف عند الزواج ... بيقولوا عندها أربع سرعات ..
    - احنا هنهرج يله؟ ... يعني احكيلنا عنها ...
    - بهزر يا أمي, بلاش قلبك يبقى ناشف زي أبويا ....

    أنزل أبي الجريدة .. أخيرا الراجل فاقلي ... ثم تناول حبة عنب ألقاها في فمه كأجدع نشنجي ... رفع الجريدة, وعاد مرة إخرى إلى حالته
    زفرت في يأس ... ثم تابعت محدثا أمي :
    - هي إنسانة مؤدبة ومحترمة, مثقفة, متدينة, أبوها وأمها كانوا منفصلين بس ...
    - إيييييييييه ؟؟؟

    صرخة مدوية, فوجئت أن مصدرها أبي ... أمي تضرب يدها على صدرها ... وصوت أبي الهادر يتابع :
    - جايبلي بنت مشردة يابن الــ ...
    - أأأ ... حاسب يا حاج ... "حياة" قاعدة
    تجمد أبي في مكانه مطالعاً وجه تلك الفتاة البريئة ... ثم نظر إلي نظرة نارية مرددا :
    - تعالالي على أوضتي يا محترم
    ثم ذهب إلى هناك ... أخذت أهدئ من روعي, أنا خلاص كبرت وشغال ... مش معقولة أبويا هيمد إيده تاني عليا يعني ... أنا راجل ملو هدومي وشغال ... أخذت أشجع نفسي حتى وصلت إلى غرفته وطرقت الباب, فرد : خش يافندي
    صوته الجهوري جعلني أعيد النظر, الراجل ممكن يغير رأيه فعلا ... ويمد إيده ... ويكسرلي ضلعين تلاتة ... مش الجري أحسن برضه؟؟؟ .... أنا إيه بس اللي خلاني عايز أتجوز ؟؟

    ازدرت ريقي, ثم دخلت ... وتبعتني أمي
    أبي : عايز تتجوز واحدة أبوها وأمها منفصلين ؟
    رديت : يا حاج .. إيه المشكلة يعني ؟
    - المشكلة ... المشكلة ... إن أبوها وأمها منفصلين ..
    - أيوه ... يعني إيه المشكلة إن أبوها وأمها منفصلين طالما هي متدينة وعلى خلق ...
    - شوفوا الواد ياخواتي ... أقوله منفصلين يقولي مؤدبة ... أم تامر شوفيلك صرفة مع الواد ...
    هرعت لي أمي قائلة : يابني ... أبوك قصده, هنقول للناس إيه .. أبوها وأمها متطلقين
    - وأنا مال أهلي (سوري يا حاج) ... هوه أنا هتجوز أهلها ولا هعيش معاهم ... أنا هتجوزها هيه ...
    - مينفعش يا تامر ... أنا وأبوك أدرى بمصلحتك ...

    نظرت لهما مندهشا, مصلحتي ؟ ... همه عايزيني أعنس ؟ ... نقلت بصري بينهما, ثم غادرت دون كلمة أخرى ..

    وهكذا ... ولمدة شهر ... أخذت أخوض جولات نقاشية مع والدي ووالدتي, تارة بالشد, وتارة بالشد !! حتى أني فكرت في عمل اعتصام سلمي أمام المطبخ, وتقديم شكوى إلى الأمم المتحدة ضد والدي, لكني خفت على البنت "حياة" العفريتة, فآثرت المحادثات السلمية ...
    وبعد كل ذلك, وافق والديّ على مضض ... أسرعت أقبل الأيدي والأقدام ... وقررت التقدم لها في المرة القادمة التي أراها فيها ...

    --------------------------------------

    "حياة" أختي الصغرى ... رغم محاولاتها أن تبدو لمضة, إلا أنها بريئة برائة عصافير الكناريا التي تعيش في القمر, وهذا ما تأكدت منه في هذا اليوم ...
    عدت من عملي مجهدا يومها, وقد قررت أن أفاتح "هيام" في اليوم التالي, وبينما أنا أتناول العشاء, ركضت ناحيتي كتلة الضوضاء المتحركة ...
    - تامر ... تامر ... ابقى هاتلي معاك دوريتوز المرة الجاية
    - حاضر يا توتة ... انت تؤمري
    - آه صحيح ... خد الشيكولاته دي
    - جميلة ... جبتيها منين ؟؟
    - أصل أبلة "هيام" اديتهالي النهاردة
    ...

    لمع في رأسي فلاش الأحلام الوردية بمجرد ذكر اسمها, وأنا لا أطيق صبرا لأكلمها غدا و ...
    - بمناسبة خطوبتها ..







    - نعاااااااااااااااااااااااام !!!!!!

    اجتمع البيت كله على صوتي وأمي تهتف: خير يا تامر ... في حنش قرصك ؟
    أصبحت كالمسبهل والريالة تتساقط من فمي ونظراتي زائغة ... سارع أبي :
    - انتي قولتيله إيه يا بت اني ؟؟ انطقي ..
    الفتاة المسكينة مخضوضة ورددت في خوف بصوت يقارب على البكاء :
    - ولا حاجة ... بديله شيكولاته, وبقوله بتاعة خطوبة أبلة هيام و ...
    لم يتمالك محمد أخي نفسه وانفجر ضاحكا بعنف ... نظرت إليه بغل, لا أستطيع مقاومة قتل ذلك الباعوض الذي يتجمع على قفاه, لا أستطيع .... طاااااااااخ

    ----------------------------


    السابعة والنصف صباحاً ... أسبوع من هذا الموقف ... "حياة" تحاول إيقاظي مرددة :
    - تاااااامر ... قوم وصلني ...
    شخيري يتقطع ... وانا أرد :
    - روحي شوفيلك حد تاني يا بت..
    - مش هتيجي معايا ... عشان تسأل أبلة "هيام" أنا عامله إيه في المدرسة ؟

    ضحكة مرارة مكتومة انطلقت مني .. البت دي بريئة طحن ... رددت دون أن أفتح عيني ...
    - كان زمان وجبر ... معدش في فايدة ... روحي اتنيلي على مدرستك
    كتمت الفتاة بكائها ... وانطلقت تدبدب في الأرض بغضب مبرطمة بكلام من عينة "أخوات فظاع" و "إيه البيت الخنقة ده يا ربي" ...

    بدأت أغيب عن الوعي متجها للنوم ... لكني بالتأكيد سمعتها تردد شيئا ما ... يتعلق بـ "العالم المصلحجية" ...

    بلا وكسة ...


    أخر تعديل بواسطة maxspider في 11 / 05 / 2009 الساعة 01:40 PM


  2. #2
    خبير إقتصادى
    صور رمزية نور العمر
    تاريخ التسجيل
    Apr 2007
    المنطقة
    Egypt, zagazig
    العمر
    28
    ردود
    2,867
    رائع رائع رائع....


    انت مصرواى على حق.....!

  3. #3
    عضو نشيط
    صور رمزية alienblues
    تاريخ التسجيل
    Jun 2007
    المنطقة
    Maroc
    العمر
    29
    ردود
    402
    ههههه, ايه ده يا شيخ و الله أضحكتني من قلبي. انت اللي كاتب المصايب -, اقصد التحف, دي؟
    .




    The only way to get smarter is by playing a smarter opponent

  4. #4
    عضو نشيط
    صور رمزية KeShOo
    تاريخ التسجيل
    May 2008
    المنطقة
    مــصــر
    ردود
    516
    ههههههههههههههههههه
    قصة روعة بجد يا يوسف
    تسلم ياباشا
    واوعى تنسي تجبلى فى الرد الجاى دوريتوز

  5. #5
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة نور العمر معاينة الرد
    رائع رائع رائع....


    انت مصرواى على حق.....!
    متشكر يا ريس ... أصلي شربت من نيلها ... ومرها ^_^

    اقتباس الموضوع الأصلي كتب بواسطة alienblues معاينة الرد
    ههههه, ايه ده يا شيخ و الله أضحكتني من قلبي. انت اللي كاتب المصايب -, اقصد التحف, دي؟
    ثواني أبص في البطاقة ... أيوه يافندم ... "ذاتس مي"

    شكرا لمرورك يا عسل

    اقتباس الموضوع الأصلي كتب بواسطة keshoo معاينة الرد
    ههههههههههههههههههه
    قصة روعة بجد يا يوسف
    تسلم ياباشا
    واوعى تنسي تجبلى فى الرد الجاى دوريتوز
    ههههههههه

    هاتلي عروسة وأنا أجيبلك مصنع شيبسي بحاله لحد باب بيتكم

  6. #6
    خبير إقتصادى
    صور رمزية نور العمر
    تاريخ التسجيل
    Apr 2007
    المنطقة
    Egypt, zagazig
    العمر
    28
    ردود
    2,867
    لسه فى أجزاء تانى ولا ايه يا باشا....

    لو بدور على عروسه..ابحث فى عمو جوجل ^_^

  7. #7
    مفيش فايده !!!

    هتفضل جامد طول عمرك يابني ... روائـــي نمبر وان


  8. #8
    عضو نشيط
    صور رمزية KeShOo
    تاريخ التسجيل
    May 2008
    المنطقة
    مــصــر
    ردود
    516
    بس سؤال بجد بقه يا يوسف
    هيه ايه موصفات العروسة اللى انت تتمناها

  9. #9
    عضو متميز
    صور رمزية khaliiiiid
    تاريخ التسجيل
    Oct 2005
    المنطقة
    فاس
    ردود
    3,496
    سلمت يمينك اخي يوسف...
    اتمنى ان تكون الحلقة الاخيرة في البارت فايف...
    مامعنى هذه الكلمة "دوريتوز"... نوع من الحلوى ؟؟
    في انتظار المزيد.
    ولا تحسبن الله غافلا عما يعمل الظالمون,
    إنما يؤخرهم ليوم تشخص فيه الأبصار,
    مهطعين مقنعي رؤوسهم لا يرتد إليهم طرفهم , وأفئدتهم هواء.



  10. #10
    عضو متميز
    صور رمزية ALSOODY
    تاريخ التسجيل
    Aug 2007
    المنطقة
    السعودية-جدة
    العمر
    28
    ردود
    1,779
    يا سلام ...إبداع والله ..انسجمت مع القصة ..
    الله يوفقك ..
    كن كالطير يحب العلو

  11. #11
    عضو متميز
    تاريخ التسجيل
    Jan 2007
    المنطقة
    Makah
    ردود
    2,088
    هههههههههههه

    الله يسعدك يايوسف

    ويجوزك البنت اللي فيها المواصفات اللي انته طالبها

    ميه ميه

  12. #12
    جامده طحححححححححححححححن .... قصة زي الفل .... كل سطر ضحكت عليه اربع ولا خمس دقائق ههههههههههه

    بس تعال هنا وقول مواصفات العروسه .....؟؟؟؟؟؟؟؟
    Nader nabil
    My portfolio

  13. #13
    عضو متميز
    صور رمزية MAXIOS
    تاريخ التسجيل
    May 2007
    المنطقة
    Cairo, Egypt
    ردود
    1,938
    هههههههههههههه
    والبنت ذنبها إيه يعني يللا عقبال بارت فايف
    إنت عايزلك منبر لوحدك ههههههههههههههههه
    543212345
    خالد ماهر
    ـــــــــــــــــــــــــــــــــــــــــــــــــــــــــــــــــــ
    My Animations



  14. #14
    عضو متميز
    صور رمزية mangawy
    تاريخ التسجيل
    Dec 2007
    المنطقة
    مصر
    العمر
    42
    ردود
    1,022
    اقتباس الموضوع الأصلي كتب بواسطة keshoo معاينة الرد
    بس سؤال بجد بقه يا يوسف
    هيه ايه موصفات العروسة اللى انت تتمناها
    إيه؟!!
    هو انت مش متجوز يا يوسف؟
    انا مش قادر أتخيل ان دي قصة
    عشت معاها وكأن هذا الموقف معاك
    لدرجة إني زعلت عشانك جدا
    رائع كعادتك

  15. #15
    ................
    كل أقوالي وأفعالي وأعمالي أضعها بين أيديكم للنقد
    لا تقل بغير تفكير ، ولا تعمل بغير تدبير

    أخوكم
    .. .-. -. ...- ..-. -.. ..- ...- -.

  16. #16
    أعتقد موا صفات العروسة اللي يبيها هي مواصفات ابلة هيام ههههههههههه

    بانتظار الخامس وتسلم على القصة
    كل أقوالي وأفعالي وأعمالي أضعها بين أيديكم للنقد
    لا تقل بغير تفكير ، ولا تعمل بغير تدبير

    أخوكم
    .. .-. -. ...- ..-. -.. ..- ...- -.

  17. #17
    عضو جديد
    صور رمزية mr.cg
    تاريخ التسجيل
    Jan 2006
    المنطقة
    قطر
    العمر
    36
    ردود
    45
    تسلم ايدك و دماغك يوسف باشا ....انا متابعك بجد انا ما قريتش فى خفه دمك ربنا يوفقك

  18. #18
    عضو متميز
    صور رمزية بــ3Dــدر
    تاريخ التسجيل
    Feb 2008
    المنطقة
    ليبيا (درنة)
    ردود
    2,824
    يا خطير اروع جزء الابن في غرفة الاب ... ^_^
    متابع لهذه السلسلة الخطيرة
    اخوكم بــــــدر الســـــــعـــــدون ...


    [/
    دروس المرحوم احمد .. رحمه الله

    facebook

  19. #19
    مشرف منبر Video Editing
    صور رمزية sofiane_av
    تاريخ التسجيل
    Aug 2005
    المنطقة
    Algeria
    ردود
    2,253
    أنت رائع أخي يوسف.. تعبير مميز.

    بالتوفيق.
    ... التعثر والسقوط في الطريق الصحيح، خير من السير بسلام في الطريق الخطأ.



  20. #20
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة نور العمر معاينة الرد
    لسه فى أجزاء تانى ولا ايه يا باشا....

    لو بدور على عروسه..ابحث فى عمو جوجل ^_^
    إن شاء الله ناوي أكمل عشرة أجزاء ... النية موجودة, بس الصحة تيجي ^_^
    في أجزاء سابقة ... تم إضافتها لرأس الموضوع

    على فكرة ... جوجل مينفعش تدور بيه على عروسة ... بينزلهالك متفيرسة وعليها باسوورد

    اقتباس الموضوع الأصلي كتب بواسطة sona_farar معاينة الرد
    مفيش فايده !!!

    هتفضل جامد طول عمرك يابني ... روائـــي نمبر وان
    ميرسي إلك كتير ... أخجلتم تواضعنا بجد

    اقتباس الموضوع الأصلي كتب بواسطة keshoo معاينة الرد
    بس سؤال بجد بقه يا يوسف
    هيه ايه موصفات العروسة اللى انت تتمناها
    اقتباس الموضوع الأصلي كتب بواسطة khaliiiiid معاينة الرد
    سلمت يمينك اخي يوسف...
    اتمنى ان تكون الحلقة الاخيرة في البارت فايف...
    مامعنى هذه الكلمة "دوريتوز"... نوع من الحلوى ؟؟
    في انتظار المزيد.
    والله حسب الظروف ... يمكن ربنا يكرمه حتى قبل بارت فايف ... وممكنيقضيها لحد البارت الألف ^^
    الدوريتوز ... نوع من أنواع البطاطس المحمرة (شيبسي) .. بس يدخل في طور المقاطعة

    اقتباس الموضوع الأصلي كتب بواسطة alsoody معاينة الرد
    يا سلام ...إبداع والله ..انسجمت مع القصة ..
    الله يوفقك ..
    ربنا يكرمك يا ريس ... نورت

    اقتباس الموضوع الأصلي كتب بواسطة badr-82 معاينة الرد
    هههههههههههه

    الله يسعدك يايوسف

    ويجوزك البنت اللي فيها المواصفات اللي انته طالبها

    ميه ميه
    ههههه ... ربنا يكرمك يا جميل ... ونسأل الله التيسير ...

    اقتباس الموضوع الأصلي كتب بواسطة نادر ندوره معاينة الرد
    جامده طحححححححححححححححن .... قصة زي الفل .... كل سطر ضحكت عليه اربع ولا خمس دقائق ههههههههههه

    بس تعال هنا وقول مواصفات العروسه .....؟؟؟؟؟؟؟؟
    ربنا يكرمك ...

    مواصفات ؟ ... تصدق مفكرتش أوي في الحكاية دي ... يا عم, اللي يجيبو ربنا كويس ^^

    اقتباس الموضوع الأصلي كتب بواسطة maxios معاينة الرد
    هههههههههههههه
    والبنت ذنبها إيه يعني يللا عقبال بارت فايف
    إنت عايزلك منبر لوحدك ههههههههههههههههه
    ثانكس ... متشكر جدا يا ريس ... كفاية عليا الموضوع ده بس

    اقتباس الموضوع الأصلي كتب بواسطة mangawy معاينة الرد
    إيه؟!!
    هو انت مش متجوز يا يوسف؟
    انا مش قادر أتخيل ان دي قصة
    عشت معاها وكأن هذا الموقف معاك
    لدرجة إني زعلت عشانك جدا
    رائع كعادتك
    لا يا عم ... مش متجوز .. لسه بدري ... مجرد نقد ساخر للواقع ...

    اقتباس الموضوع الأصلي كتب بواسطة الثقب الأسود معاينة الرد
    أعتقد موا صفات العروسة اللي يبيها هي مواصفات ابلة هيام ههههههههههه

    بانتظار الخامس وتسلم على القصة
    يمكن ... هيام أو هالة أو حتى أم الشفاتير ... بس ربك يسترها معانا ^^

    اقتباس الموضوع الأصلي كتب بواسطة mr.cg معاينة الرد
    تسلم ايدك و دماغك يوسف باشا ....انا متابعك بجد انا ما قريتش فى خفه دمك ربنا يوفقك
    يافندم متشكر جدا على كلامك الجميل ... نورت الموضوع

    اقتباس الموضوع الأصلي كتب بواسطة بــ3dــدر معاينة الرد
    يا خطير اروع جزء الابن في غرفة الاب ... ^_^
    متابع لهذه السلسلة الخطيرة
    ربنا يكرمك ... وكن دائما بانتظار الجديد مع 000 00 0 لخدمات المحمول ^_^

    اقتباس الموضوع الأصلي كتب بواسطة sofiane_av معاينة الرد
    أنت رائع أخي يوسف.. تعبير مميز.

    بالتوفيق.
    ربنا يكرمك يا سوفيان .. سعيد بتواجدك الطيب

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل