موضوع: ..:: أمنيات نيولووك ::..

ردود: 19 | زيارات: 1329
  1. #1
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585

    ..:: أمنيات نيولووك ::..

    هذه القصة كتبتها ضمن مسابقة مغلقة في احد المنتديات الجامعية

    طبعا لم تحز على مركز متقدم لأسباب عديدة ...

    اعذروني لأنها مغرقة في العامية شيئا ما ... مع أني كنت قررت ألا أكتب ثانية في المنتدى بالعامية بعد نصيحة أخونا أبو بدر ... لكن ما باليد مفر

    أترككم مع القصة

    -------------

    ..:: أمنيات نيولووك ::..
    -----------------

    حمدي أفندي ... ذاك الرجل البسيط ... البسيط جدا ... بسيط لدرجة أن البساطة تبرأت منه ووضعته في خانة "أبسط من البساطة" ... في أواخر الأربعينات, أو قبل الخمسينات بشوية فكة ... يرتدي نظارات "قعر كوباية" أصبحت جزءا لا يتجزأ من وجهه ... وهو – رغم بساطته – متزوج من سيدة تعود أصولها إلى عائلة هولاكو, الفرع الدموي منها ... ويملك "أورطة عيال" تملأ عليه حياته صراخاً وعويلاً ...

    يبدأ صباحه بالاستيقاظ المبكر صباحا, للحاق بعمله الحكومي العتيق, ويجلس على مكتبه كأي موظف تقليدي يحل كلماته المتقاطعة التقليدي ويتناول كوب شايه التقليدي بينما يحرص أشد الحرص ألا يخرج عن هذه التقليدية بشبر واحد ... ثم يعود إلى منزله ليدأ حراً جديدة في شقته يحاول فيها أن ينال لقمة ما من بين هذه الأفواه وأن يحظى بمرتبة يرمي عليها جتته ليبدأ في اليوم التالي نفس المشوار ... ونفس الحياة ... ونفس التقليدية ... حاجة آخر ملل!!

    -------------

    وفي أحد أيام عودته من المنزل, وبينما يقف على المحطة مستسلما ... وصل إلى مسامعه صوت ينادي :
    "وعندك الفانوس السحري ... الفانوس الذري ... الفيرجين الجديد من فوانيس المرحوم علاء الدين ... خدلك واحد وحققلك تلات أمنيات ... قرب يافندي ... قربي يا مدام"

    اقترب حمدي في حذر من الرجل ... ثم سأله : بكام البتاع ده يا كابتن ؟
    التفت له الرجل في غضب, وبصله من فوق لتحت مرددا :
    كابتن ؟ ... شايفني واقف بجيب إجوان في أبو تريكة ؟
    أبو تريكة مين وإجوان إيه ؟؟؟ ... بقولك بكام البتاع ده يا جدع ؟
    أعاد البائع نظرته المسوحية الشاملة ... ثم رد بأنفة :
    امشي يا ريس ... مببيعش حاجة للناس البيئة ...

    اتسعت عينا حمدي، وزفر وزغر، وغلى رأسه واحمر كأفلام توم وجيري ... ثم أخرج موسا من بين طيات لسانه كأجدع بلطجي, وانقض على الرجل واضعا الموس على رقبته وهو يهتف :
    عاملي فيه ابن خواجة ؟ طب إيه رأيك هاخد واحد من البتاتيع دي ... ومن غير فلوس كمان ...
    ظل ذاك الرجل محافظا على كبريائه بالعافية، وريالة حمدي تغرق وجهه فتحيله ترعة مريوطية جديدة، ثم ناوله واحدا من الفوانيس مردداً:
    يحرق، يلعن، يودي، يجيب ... عشان كده قلت عالم بيئة ... ده إيه القرف اللي الواحد عايش فيه ده ... خد واحد اطفحه أهوه ...

    تناول حمدي الفانوس بعنف, ثم دفع بالرجل بعيدا ... وفجأة لمحت عينه الخبيرة لوحة أتوبيس 87 بشرطة, فانطلق كالمجنون متجاوزا كل الحواجز البشرية حتى صعد الاتوبيس ويداه تقبض على الفانوس في اهتمام واضح يذكرك بـ "جولم" في "لورد أوف ذا رينجز"

    وصل حامد إلى البلوك الذي يقطنه, صعد مسرعا, ثم وقف أمام باب شقته, تلفت يمنة ويساراً ليتأكد من خلو الطريق, فتح الباب وما إن دخل حتى ...
    "بابا جههههههههههههههه"
    فوجئ بأبناءه الخمسة يقفزون عليه جميعا ما بين حضن وشكوى وعضة وطلب, فما كان منه إلا أن تناولهم بالشلاليط واللكميات واحدا بعد الآخر مرددا :
    غور ياض انت وهوه من هنا ... دانتو خلفة هَنَا"

    رفع رقبته كديك ينوي الصياح, ثم صرخ منادياً زوجته بصوت يشبه سرينة الإسعاف :
    انتي يا ولية ... خدي ولادك دول من هنا, بدل ما أروحيك بيهم على بيت أبوكي عدل"
    فجأة لمح تلك الكتلة التي تزوجها قادمة من المطبخ مرتدية إيشارب عتيق من أيام أحمس وتضع بارفان "إف يع إتفو" متناولة في يدها سكينا حاداً وهي تزمجر :
    في إيه يا جدع انت ... صوتك عالي كده ليه ؟
    ما إن لمح حمدي أفندي السكين حتى ازدرد ريقه في صعوبة وهو يتمتم :
    أبدا .. مفيش ... كنت بقول فين قمر حياتي ؟
    رد ابنه السفروتة في سرعة : لأ يا ماما, ده كان بيقول ....
    أسكته حمدي بشلوت محترم تلته صفعة صاروخية وهو يصرخ :
    اسكت يا قليل الحيا ... يعني ابوك بيكدب ؟؟؟ .... قلة أدب صحيح
    ثم التفت إلى جودزيلا ... احم ... أقصد زوجته وسألها :
    عاملة إيه على الغدا النهاردة ؟
    ملوخية
    أورديحي ؟
    أكيد ... هوه انت جبت حاجة .. اطبخي يا جارية كلف يا ...
    خلاص خلاص ... جتنا ملوخية في حظنا اللوبيا

    -------------

    دخل حامد أفندي غرفة النوم، وأوصد بابها خلفه ... وهو يردد في نفسه "اصبر يا واد يا حمدي، كلها شوية وهتغرق في طبق فتة باللحمة والبط وتعيش في عز ونغنغة"
    همّ حمدي أفندي بدعك المصباح كما يفعل علاء الدين, لكنه فوجئ بلوحة أرقام الكترونية معلق بجانبها لوحة إرشادات تقول
    ( خدمة الفانوس السحري .... إذا أردت طلب عفريت المصباح من فضلك اضغط على 333, أما لو كنت ترغب بترك رسالة للأخ العفريت فاضغط على 555, وفي حالة وجود شكاوى نرجو مراسلتنا على أرض العجايب عمارة الواد الجني شقة سالب أربعين, أو على موقعنا دابيو دابيو دابيو عفاريت دوت جن, مع تمنياتنا بأمنيات متعفرتة )

    أسرع حمدي يضغط "التلات تلاتات" في لهفة، ولكنه فوجئ بصوت يرد :
    الأخ العفريت مش موجود دلوقتي, بس تقدر تبعتله مني كول بصوتك بعد سماع صوت الصريخ
    أحس حمدي بالإحباط, لكنه قرر المحاولة مرة ثانية وثالثة .... وبعد مرور ثلاث ساعات من المحاولات والصريخ ... رد عليه صوت آخر :
    العفريت حضر ... برجاء وضع الفانوس على الأرض والرجوع خطوتين للخلف مع ارتداء حزام الأمان وقفل السوستة ..
    تراجع حمدي للوراء بعدما وضع الفانوس على الأرض, فبدأ دخان ملون بالتصاعد تصاحبه موسيقى راب وأضواء الديسكو ... وفجأة, ظهر من بين الدخان عفريت يرتدي بدلة لوكس ونضارة شمس بوليس ...

    صرخ حمدي بفرحة : عفــ ... عفــ .. عفريت بيه ؟؟!!!!
    نظر له العفريت نظرة لا مبالاة, ثم أخذ يلف بعينيه في المكان مرددا :
    ياي ... إيه المستوى البيئة ده ... يخرم جيبك يا فنكش, قولتلك متبعينيش للناس الموبوءة دي
    كان حمدي مسبهلا بما يراه, فلم يبد أنه قد سمع تلك الكلمات, ثم صاح :
    يا عم العفريت ... ممكن تحققلي اللي أنا عايزه ؟
    في قرف رد عليه العفريت :
    ماشي ماشي ... خلينا نخلص من الليلة القرف دي
    ثم أخرج بضعة أوراق من جيبه ناولها لحمدي أفندي وهو يقول :
    اكتب في الورقة دي اسمك، وسنك، ومرتبك، وعندك كام عيل، وكام عربية, وكام واسطة، وكام ...
    حيلك حيلك حيلك ... إيه ده كله ؟ ... انا موظف غلبان بـ 180 جنيه و 24 قرش وبدل شحاتة في الشهر
    اتسعت عينا العفريت في دهشة وهو يرد :
    كمان ... دانتا في الضياع، حالتك أوت أوف سيرفيس .. سوري يا باشا ... أنا مشغول ومش فاضي لشغل العيال ده
    أخرج حمدي الموس المستخبي في غضب صائحاً :
    شكلكو كده شلة نصابين وقطاع طرق ... أنا هعرف آخد حقي تالت ومتلت منكو

    فجأة، لف العفريت حول نفسه خالعا بدلته لتظهر فانلته الحمالات التي يبظ منها الشعر, وأخرج مطواة قرن غزال تصنيع شبرا مشوحا بها وهو يردد:
    لأ ... اوعى تفتكر إن احنا خيخة, داحنا صيع, احنا اللي دهنا الهوا زبدة بلدي, دانا أصيع واحد في عزبة شَكَل يا ريس, أسنجفك إنت وعشرة زيك
    أدرك حمدي أنه الخسران في النهاية, وأنه سيضيع على نفسه فرصة الأحلام, فأخذ يهدئ من روع العفريت ويطيب خاطره بكلمتين ... ويبين له إن الفقر ابن ستين في سبعين هوه اللي خلاه عصبي كده ...

    استعاد العفريت هدوئه ووقاره, ومارس بعض يوجا الريلاكسيشن عائدا إلى بدلته الفخمة مقدما الأوراق من جديد لحمدي قائلا :
    طب اتنيل املى الاستمارة دي .. ده لو لسه فاكر اسمك
    بدأ حامد في ملئ الاستمارة التي لا تقل بيناتها المطلوبة عن البيانات المطلوبة من طيار جوي سيشترك في وحدات الاستطلاع بزيمبابوي, وفي آخر الأوراق وجد خانة الأمنيات بثلاث أماكن فارغة, ليضع فيها ما يتمناه ...

    ----------------

    انتهى حمدي من ملئ الاستمارة وقدمها إلى العفريت, فتناولها بقرف, وقرأها, ثم ردد :
    أمنيتك الأولى شقة واسعة ... سليم ؟
    سليم
    يعني يا أذكى أخواتك أنا لو اعرف أجيب شقق كنت لقيتني لسه عايش في الفانوس الكحيتي ده, ده أنا لسه ما استلمتش شقتي من الجهاز ... جزاءاً لغبائك المزمن، الأمنية دي اتحرقت عليك
    فتح حمدي أفندي فمه مذهولا والعفريت يتابع :
    الأمنية التانية, عربية آخر موديل ... هوبا .. ألف مبروك يا ريس, عربيتك راكنة تحت البيت
    لم يصدق حمدي نفسه, وطار على الشباك ليجد أمام البيت عربية كارو مارو "زق معايا", وحمار حصاوي فشلة يستلزم إطعامه جزيرة كاملة من البرسيم ...
    التفت حامد في صدمة وهو يقول :
    بس يافندم ... العربية ...
    خلاص خلاص ... مش لازم تشكرني يابني ... ده شغلي برضه
    ثم اعتدل مستطرداً:
    الأمنية الأخيرة ... تتجوز أجمل واحدة في الدنيا ... ممم الموضوع صعب حبتين تلاتة
    ثم اقترب من أذن حمدي هامسا :
    بس أنا ممكن أريحك من الولية اللي معاك دي, خد المسدس ده ... وبالليل وهيه نايمة جنبك ... طاااخ ... ولا من شاف ولا من دري
    ثم اعتدل في سرعة مربتا على كتفه قائلا :
    شكرا على تعاونك معانا يا حمدي أفندي ... مصر كلها فرحانة بيك

    فجأة, تلاشى العفريت مخلفاً وراءه بعض الدخان الملون وموسيقى الراب إياها ... تاركاً حمدي في حالة ذهول أشبه ببطة اكتشفت أن أمها ديك كبير.
    استفاق حمدي على صوت ازيز متصل يخرج من الفانوس, تلاه خروج ورقة صغيرة, التقطها حمدي ليجد مكتوبا فيها :
    ( شكرا لاستخدامك خدمة أمنيات نيولوك, أنت مدين لنا بمبلغ 50 ألف جنيه نظير خدمتنا المتميزة, سيتم إرسال مندوبنا لتحصيل المبلغ أو الحجز على ممتلكاتك وبيعك في مزاد علني, مع تحيات الفانوس السحري للخدمات )
    كان هذا أكثر مما يحتمله حمدي أفندي ... الراجل اللي أبسط من البساطة ... لذا, فقد رفع المسدس إلى فمه و ..... ضغط الزناد

    -----------------------

    دخل العفريت على غرفة مديره في مكتب العمليات وهو يردد :
    بقولك باشا ... ياريت نلحق نبعت الورق ده للمسئولين عشان ينبسطوا
    رد المدير في بهجة :
    انت عملتلنا أوردر جديد ؟
    رد العفريت في فخر :
    أكيد يا ريس ... الراجل دلوقتي زمانه مشرف في جهنم
    دانتا عفريت ياض يا عفريت
    عيب يا باشا ... دانا تربيتك
    لأ ... انت تربية أباليس

    وارتفعت ضحكاتهما عالياً .....


    - تمت -




  2. #2
    طالب / مدرسة الأنيميشن
    تاريخ التسجيل
    Jun 2006
    المنطقة
    مصر
    ردود
    7,061
    هرجع تاني بس لما الصداع يروح ان شاءالله

  3. #3
    عضو متميز
    صور رمزية khaliiiiid
    تاريخ التسجيل
    Oct 2005
    المنطقة
    فاس
    ردود
    3,496
    هههههههه
    سلمت يمينك اخي يوسف
    ولا تحسبن الله غافلا عما يعمل الظالمون,
    إنما يؤخرهم ليوم تشخص فيه الأبصار,
    مهطعين مقنعي رؤوسهم لا يرتد إليهم طرفهم , وأفئدتهم هواء.



  4. #4
    عضو متميز
    صور رمزية AHMAD-MAX
    تاريخ التسجيل
    Nov 2007
    المنطقة
    الاردن
    ردود
    2,478
    وتضع بارفان "إف يع إتفو"
    حلوه دي كخخخخخخخخخعععششش
    ... ...
    الحرية هي التوحيد ..
    عكس الحرية الشرك بالله تعالى ..
    تحرر من عبادة الاشياء حتى عبادة النفس والهوى وصرفها لله وحده ..
    وتمرد على كل قانون غير قانون الله ..
    ان لم تعبد الله وحده ... سوف تكون عبدا لملايين الاشياء ..

  5. #5
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة shady sobhy معاينة الرد
    هرجع تاني بس لما الصداع يروح ان شاءالله
    شافاك الله وعافاك ...

    اقتباس الموضوع الأصلي كتب بواسطة khaliiiiid معاينة الرد
    هههههههه
    سلمت يمينك اخي يوسف
    جزاك الله كل خير يا خالد

    اقتباس الموضوع الأصلي كتب بواسطة ahmad-max معاينة الرد
    حلوه دي كخخخخخخخخخعععششش

    أنت أحلى يا أحمد ^^

  6. #6
    طالب / مدرسة الأنيميشن
    تاريخ التسجيل
    Jun 2006
    المنطقة
    مصر
    ردود
    7,061
    جمييييل يا يوسف ماشاء الله كالعادة

  7. #7
    خبير إقتصادى
    صور رمزية نور العمر
    تاريخ التسجيل
    Apr 2007
    المنطقة
    Egypt, zagazig
    العمر
    28
    ردود
    2,867
    تسلم ايديك.....

  8. #8
    ماشاء الله يا يوسف .. انت بجد كاتب رائع جدا وليك مستقبل كبير جدا في الكتابه ..

    ربنا يوفقك
    Nader nabil
    My portfolio

  9. #9
    عضو نشيط
    صور رمزية 3D_PLAYER
    تاريخ التسجيل
    Jun 2009
    المنطقة
    تحيا مصـــــــــر
    ردود
    932
    وتضع بارفان "إف يع إتفو"
    هههههه يععععع
    طب انا عندى اقتراح ليك بما ان كل كتابتك جميله كده اعمل مدونه و اعرض فيها كل اللى انت كتبته ممكن يتم نشره فى الصحف زى مدونات كتيييير
    بسم الله الرحمن الرحيم
    (( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي ))
    صدق الله العظيم
    اللهم ارحم امى و عافها و اعف عنها و اكرم نزلها و وسع مدخلها

  10. #10
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة shady sobhy معاينة الرد
    جمييييل يا يوسف ماشاء الله كالعادة
    أكرمك الله يا شادي ... مش هنشوفلك عروسة ؟؟؟

    اقتباس الموضوع الأصلي كتب بواسطة نور العمر معاينة الرد
    تسلم ايديك.....
    جزاك الله خيرا

    اقتباس الموضوع الأصلي كتب بواسطة نادر ندوره معاينة الرد
    ماشاء الله يا يوسف .. انت بجد كاتب رائع جدا وليك مستقبل كبير جدا في الكتابه ..

    ربنا يوفقك
    أكرمك الله يا نادر ... وشاكر جدا لتشجيعك

    اقتباس الموضوع الأصلي كتب بواسطة 3D_PLAYER معاينة الرد
    هههههه يععععع
    طب انا عندى اقتراح ليك بما ان كل كتابتك جميله كده اعمل مدونه و اعرض فيها كل اللى انت كتبته ممكن يتم نشره فى الصحف زى مدونات كتيييير
    لدي مدونة بالفعل

    http://yusufun.blogspot.com/

    شكرا لاهتمامك على كل حال

  11. #11
    عضو نشيط
    صور رمزية Mr.ALDO
    تاريخ التسجيل
    May 2009
    المنطقة
    Cairo,Egypt
    ردود
    688
    انتا مذهل يا شادي بجد القصة جميلة جدا جدااااااااا
    بتفكرني اوي بطريقة الدكتور أحمد خالد توفيق
    و البلوج حلوة حتي انا عملت بوك مارك عشان اقراها كلها
    كييييييييييب اووووووووووون

  12. #12
    عضو نشيط
    صور رمزية 3D_PLAYER
    تاريخ التسجيل
    Jun 2009
    المنطقة
    تحيا مصـــــــــر
    ردود
    932
    البلوج حلو بس مش شايف انه يستحق انتشار احسن من كده
    يعنى كتباتك لا تقل عن مدونه دكتوره غاده اللى اتحولت لكتاب و لا عن سوسه المفروسه اللى اتنشر لها فى اكتر من جريده
    يعنى لو حاولت تنشر المدونه بتاعتك بين المدونات المشهوره دى هتلاقى نجاح كويس ممكن نلاقيك فى احدى الجرائد او يمكن فى العاشره مساءا
    بسم الله الرحمن الرحيم
    (( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي ))
    صدق الله العظيم
    اللهم ارحم امى و عافها و اعف عنها و اكرم نزلها و وسع مدخلها

  13. #13
    طالب / مدرسة الأنيميشن
    تاريخ التسجيل
    Jun 2006
    المنطقة
    مصر
    ردود
    7,061
    يوسف ( ايدي على كتفك يا خويا )

    Mr.ALDO انا مذهل هههه طبعا تقصد يوسف هو اللي مذهل

  14. #14
    عضو متميز
    صور رمزية mmnoor
    تاريخ التسجيل
    Nov 2007
    المنطقة
    ساكن فين ؟؟ انت مخبر ولا ايه ؟؟؟
    العمر
    31
    ردود
    6,588
    أكيد جامدة زي الباقي
    (وَإِذَا قِيلَ لَهُمُ اتَّبِعُوا مَا أَنزَلَ اللَّهُ قَالُوا بَلْ نَتَّبِعُ مَا وَجَدْنَا عَلَيْهِ آبَاءنَا أَوَلَوْ كَانَ الشَّيْطَانُ يَدْعُوهُمْ إِلَى عَذَابِ السَّعِيرِ) لقمان :21

    الرد على من قال بحل المعازف

    http://www.abumishari.com/

  15. #15
    اقتباس الموضوع الأصلي كتب بواسطة shady sobhy معاينة الرد

    mr.aldo انا مذهل هههه طبعا تقصد يوسف هو اللي مذهل
    يوسف غير متواجد حاليا .. خد انت المجامله بداله ههههه
    Nader nabil
    My portfolio

  16. #16
    عضو قدير
    صور رمزية MOHSEN
    تاريخ التسجيل
    Jul 2006
    المنطقة
    ..::EGYPT ::..
    ردود
    3,238
    جاامده ياباشا ..
    A BiG FaN OF

    MAXFORUMS
    Theory_Of_Design@yahoo.com



    م / محســن عمــاد
    mohsen_3d

  17. #17
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة mr.aldo معاينة الرد
    انتا مذهل يا شادي بجد القصة جميلة جدا جدااااااااا
    بتفكرني اوي بطريقة الدكتور أحمد خالد توفيق
    و البلوج حلوة حتي انا عملت بوك مارك عشان اقراها كلها
    كييييييييييب اووووووووووون
    ربنا يكرمك يا باشا ... أخوك يوسف .... احنا لسه محصلناش نيجي حاجة في شعرة صفرا من بتوع شادي

    اقتباس الموضوع الأصلي كتب بواسطة 3d_player معاينة الرد
    البلوج حلو بس مش شايف انه يستحق انتشار احسن من كده
    يعنى كتباتك لا تقل عن مدونه دكتوره غاده اللى اتحولت لكتاب و لا عن سوسه المفروسه اللى اتنشر لها فى اكتر من جريده
    يعنى لو حاولت تنشر المدونه بتاعتك بين المدونات المشهوره دى هتلاقى نجاح كويس ممكن نلاقيك فى احدى الجرائد او يمكن فى العاشره مساءا
    ههههه ... متشكر جدا على اهتمامك ... أنا سعات بحاول من حين لآخر في موضوع النشر ده ... بس شكلي فقري

    اقتباس الموضوع الأصلي كتب بواسطة shady sobhy معاينة الرد
    يوسف ( ايدي على كتفك يا خويا )

    mr.aldo انا مذهل هههه طبعا تقصد يوسف هو اللي مذهل
    يا عم مش حاجة صعبة ... ندورلك على عروسة لوبولي رندر فيراي ونومال مابز عشان التفاصيل ... وحرك يا ريس براحتك

    اقتباس الموضوع الأصلي كتب بواسطة mmnoor معاينة الرد
    أكيد جامدة زي الباقي
    حبي ... متشكر يا جميل

    اقتباس الموضوع الأصلي كتب بواسطة نادر ندوره معاينة الرد
    يوسف غير متواجد حاليا .. خد انت المجامله بداله ههههه
    شادي مدير المكتب على فكرة ... وبديله مرتب شئ وشويات ^^

    اقتباس الموضوع الأصلي كتب بواسطة mohsen معاينة الرد
    جاامده ياباشا ..
    ربنا يكرمك يا محسن

  18. #18
    عضو متميز
    صور رمزية DreamPaint
    تاريخ التسجيل
    Mar 2009
    المنطقة
    أرض الكنانة .. وأم البلاد
    العمر
    25
    ردود
    2,804
    يو آر ذا بيست أوف بيستس ..
    واو .. روعة ياسِيدي.. إيه الحلاوة دي..
    وتبقى اللهجة الأم أما ..
    بيست ريجاردز ..
    لا إله إلا الله محمد رسول الله

    DreamPaint Flickr
    MY DeviantArt
    TUNISIA ---->████████████████ : 100% done

    EGYPT ------>████████████████ : 100% done

    LIBYA ------->██████████░░░░░░ : in progress

    ALGERIA ---->████░░░░░░░░░░░░ : in progress

    YEMEN ------>██████░░░░░░░░░░ : in progress


    PALESTINE ->░░░░░░░░░░░░░░░░ : The Next Project




  19. #19
    عضو متميز
    تاريخ التسجيل
    Sep 2003
    العمر
    28
    ردود
    4,029
    تبغى الصراحة
    الزواج حاجة مفلسعة غير كدا مش حقبلها منك
    جيب لنا قصص زواج جديدة هههههههههههههه



    الله يحفظك يايوسف
    روح الله يوفقك :d

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل