صفحة 1 من 2 12 أخيرأخير
النتائج المعروضة من 1 الى 20 من مجموع 29

موضوع: حرية .. بابا أوبحية

ردود: 29 | زيارات: 3866
  1. #1
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585

    حرية .. بابا أوبحية

    حرية بابا أوبحية

    ------------------

    المكان : جمهورية بابا أوبح الفدرالية

    الزمان : من حبة صغنتتين فاتو

    استيقظ كبير القديسين كعادته كل صباح متثائباً وفاتحا فمه كسيد قشطة يوشك على تناول وجبة "كفتاكي" كومبو،
    ثم توجه مرتديا ملابسه الكهنوتية، وتوجه مباشرة إلى عزبة سعادته ... الوزارة

    وهناك ... دخل عليه مساعده الأول، فانحنى مقبلا يده مرددا :

    - السلام عليكم يا مولانا

    امتعض وجه كبير القديسين وهو يردد :

    - إيه السلام عليكو دي ... فين صباح الخير ... صباحه فل ... جوود مورنينج
    ... كامي

    - صباح القطايف والسمنة البلدي يا سيدنا ... انت تؤمر

    - طيب ... المهم ... ما هو الجديد لدينا يا ولد

    - سعادتك النهاردة هتنزل تعمل لفة على السريع على معاهد وزارتك

    - يادي القرف ... هوه أنا خلفت المعاهد دي ونسيتها، لازم كل شوية أنزل أبص
    عليهم ... نفسي كده أروح أدي بصة على دريم بارك وأتزحلق شوية

    - متقلقش سعادتك ... كلها حبة وهنلغي الوزارة خالص وتبرطع براحتك ... شد
    انت بس حيلك وهات درفها

    - أوكي ... هيا بنا لتلك المعاهد

    ------------------------

    في أحد المعاهد "القديسية" للبنات ... تجول فضيلته بين الفصول
    ملقيا نظرة هنا ونظرة هناك ... دخل أحد الفصول، و "صبح" على الطالبات،
    والتفت يتفقدهم و ...

    فجأة، رأى ذلك المنظر المريع الشنيع الفظيع، فـ "سورق" فضيلته،
    وكاد يغمى عليه لما رأته عينه الرقيقة من منظر مرعب ... رأى فتاة، مرتدية ملابس
    محتشمة، بل وسوداء !!!

    - يا نهار كاروهات من غير شمس

    صرخ فضيلته بصوت أسمع حسه بلاد "فكك مني" المجاورة ... ثم صرخ في
    الفتاة :

    - إيه اللي انتي عاملاه ده ؟ ... انتي فاكرة نفسك فين ؟؟ ... في مدرسة
    "قديسية" ؟

    مال عليه مساعده بسرعة : احنا في معهد قديسي على فكرة فضيلتك

    لكن سيادته لم يسكت ... بل تابع :

    - إيه التخلف اللي انتي فيه ده ... ازاي تلبسي حاجة زي كده ... ومحتشم كمان
    ؟؟ ... قلبي ... قلبي

    ناوله المساعد دواء القلب بسرعة ... فيما ردت الفتاة المصدومة :

    - حضرتك ... أنا اتعلمت كده ... ألبس محتشم وأبقى مؤدبة ... عشان ممشيش
    الناس تقعد تتفرج عليا

    صرخ الكبير :

    - انتي جاهلة ... واللي علمك جاهل ... وكمان إزاي تلبسي حاجة كده في مدرسة
    كلها بنات ؟؟

    هنا تدخلت المدرسة :

    - حضرتك هي بتلبس عادي لما نكون لوحدنا ... لكن لما بيجي رجالة - على
    افتراض إن حضرتك راجل - بتلبس المحتشم

    هنا صرخ سيادته في هستيريا والزبد يتطاير من فمه :

    - دي جاهلة ... وانتي جاهلة ... وكلهم جاهلين ... وأنا ربكم الأعلــ ...

    فجأة ... سكت بسرعة عندما وجد كل العيون تحدق به ... حاول الاستدراك صارخا
    في الفتاة :

    - اقلعي الأسود ده

    بكت الفتاة وخلعت الأسود مضطرة، فبادرها قائلا:

    - أومال لو كنتي حلوة ومسمسة كده زي نانسي عجرم اللي مجنيناني ... كنتي
    عملتي إيه ؟؟

    كادت المدرسة تفقأ عينه وهي تصرخ فيه :

    - حرام عليك يا جدع ... دي لسه بنت صغيرة

    ارتجف سعادته وأسرع يختبأ خلف مساعده ... ثم خد رجالته وحط ديله في سنانه
    وفتح ع الرابع ...

    -----

    وهناك ... في مقر عزبته الوزارية ..

    - يادي النيلة ... يادي النيلة ... لساني ده موديني اللومان

    - معلش فضيلتك ... كل مشكلة وليها حل

    - حل إيه يابني آدم ... انت عارف إن موقفهم كان سليم ... وبعدين أنا بعبعت
    بحاجات كتير غلط قصاد الإعلام ... ماما تقول عليا إيه دلوقتي، لسه فاشل زي ما أنا
    ؟؟؟

    - ولا يهمك يا ريس ... احنا هنعمل اشتغالة محترمة

    - اشتغالة إيه ياض ؟؟ ... نهارك
    أبيض، تكونش عاوزني أستقيل من الهيلمان والميغة اللي أنا فيها دي ؟؟

    - استقالة إيه بس سيادتك ... انت كل اللي هتعمله، هتطلع قرار صغير، بتقول
    فيه محدش يلبس أسود في المعاهد القديسية اللي كلها بنات ...

    - ما هو يا أهبل ده اللي بيحص

    ابتسم المساعد في مكر قائلا :

    - بالضبط كده

    فغر كبير القديسين فمه لحظات في بلاهة وهو يتمتم :

    - قصدك أبان إني خدت قرار مهم وإن معايا حق، لكن في الحقيقة الدنيا من
    الأول ماشية كده

    - تمام يا مولانا ... وبعدين تقول إن الأسود مش من القداسة في شئ، وإنه
    حاجة مبتدعة ومجرد عادة

    - بس يابتاع انت مانتا عارف إني
    قلت الحقيقة زمان، وقلت إن الأسود المحتشم حاجة كويسة ومن حق الواحدة تلبسه

    - يا مولانا قول إنك غيرت رأيك .. قول إنك قريت رأي مخالف في كتاب
    "هيس بأي كلام ... لكركور إمام" ... أي كدبة يامولانا، مش هعلمك أنا،
    دانتا أبو الكدب كله يعني

    أخذ يفكر برهة بينما مساعده يتابع :

    - وبعدين الواد "فاضل حمام" بيخدمنا تمام ... يعمل أفلام كل ما يشوف
    واحدة لابسة أسود اسم الله عليه يتخض كده والناس تضحك وخلاص، احنا نوصيه يعمل
    فيلمين كمان يطلع فيهم الناس دي وحشة وحرامية ... وهمه اللي مبوظين البلد، وهتلاقي
    الشعب كله صدق زي اللي ملوش فيها، وتطلع انت معاك حق وبتدافع عن بلدنا ضد الإرهاب

    - عفارم عليك يا ولد انت ... قلتلي ... اسمك إيه ؟؟

    زادت ابتسامة المساعد أكثر وهو يرد :

    - خدام فضيلتك ... إبليس يا مولانا

    --------------------------------------------

    المكان : جامعة "الحرية والتنوير والهجص ده كله"

    دخل السكرتير العام على مكتب رئيس الجامعة، واضعا أمامه جريدة بها قرار منع
    السواد من كبير القديسين، وهو يقول :

    - دلوقتي فرصتنا يا كبير ... نضرب وهي سخنة

    طالع رئيس الجامعة القرار ثم ردد :

    - دي حاجة هايلة، دلوقتي هنقدر نعمل اللي نفسنا فيه ... ونلزقها في كبير
    الطراطير ده ... بس ...

    - بس إيه سعادتك

    - أنا خايف العيال بتوع الجماعات يطلعوا فيها ويعملولنا مظاهرات ويشتموني
    بشتايم وحشة، وانت عارف إني فافي وبعيط لما حد بيشتمني

    - على بابا يا جدع !!

    - نعم ؟؟

    - قصدي ... حضرتك متخافش ... هنخلي الأمن يظبطهم ... وبعدين طول مانتا سايب
    البنات لابسة المحزق والملزق، ومبينة كل اللي عندها، وتهز رايحة جاية ... يبقى
    متقلقش، بقية الطلبة هيفضلوا مريلين ومش هيعبروا بتوع الجماعات ولا هيطلعوا
    مظاهرات .... الكلام ده لو منعنا البنات تلبس لبس الرقاصات اللي بييجوا بيه،
    ساعتها كل الطلبة وبتوع حقوق الإنسان والحيوان هيقولولك ده كبت لحرية المرأة

    مال عليه اكثر مرددا :

    - إنما دول شوية بنات غلابة لابسين أسود محتشم ... لازم نضيق عليهم لحد ما
    يفطسوا ... ومحدش هيتكلم عشان وزير الأمن شايف شغله كويس وكل الشعب عنده
    "فايبريشن" من الخوف

    - طيب ... نبدأ الأول بالمدن الجامعية ... نقول محدش يخش بالسواد عشان في
    بنات بتخبي رجالة معاهم فيه

    - صحيح هوه تفسير أهبل زي سعادتك ... بس الناس كلها هتقتنع

    - وبعدين نمنعه من الامتحانات عشان البنات ممكن يغشوا بيه

    - ياااااااااااه ... مستوى العبط عندك في ارتفاع دائم، اللهم لا حسد ... بس
    الناس هترضى على طول، محدش هيضيع وقته يفكر إن في ناس بتبص عليهم وبتفتشهم همه
    مخصوص من الأول دونا حتى عن اللي لابسين إيشاربات، ولا إن نفسية البنت ممكن تبوظ
    وهي بتمتحن ... المهم إنك اديتهم أي كلام وهمه ناموا مرتاحين وخلاص

    - يعجبني فيك إنك فاهمني على طول يا ... يا ...

    - تلميذك يا دكتور ... إبليس

    ----------------------

    انتشرت أخبار منع السواد في أنحاء جمهورية بابا أوبح، وخصوصا بعد قرار
    تعيين رئيس جامعة"الحرية والتنوير والهجص ده كله" وزيرا لوزارة
    "الهجص المبكر" ... فأسرع رؤساء الجامعات بإصدار قرارات منع السواد
    المحتشم في الامتحانات، وأصبحوا يتسابقون
    للظهور في برامج "التوك شو" حتى تنتبه الحكومة لعبطهم فتعينهم في مختلف
    وزارات العبط

    وأصبح عميد كلية "الناس الكويسة" يعلن أن : الحرب على السواد
    المحتشم أدعى من محاربة العدو ... رغم تأكيد زملائه وتلامذته أنه كان دائما يدعوهم
    إلى الثبات على مبادئهم خصوصا بعد صدور قرار كبير القديسين ... لكن يبدو أن الكرسي
    "زغلل عينه وجابله استبحس" فباع تلك المبادئ في سوق الجمعة استعمال خفيف
    ...

    لم تصدق الفتيات المحتشمات ما حدث ... وتوجهن إلى الحكومة لإنصافهن، لكنها
    أقرت بالعبط الصادر من تلك الشلة ... بينما انشغل الشعب البابا أوبحي، بمشاهدة
    مباريات "كأس الإمعية للدول السلبية" " ... وقتل ذوي الدين الآخر
    لأنهم "مش زيهم"، بينما يسب هو الدين ليل نهار حتى خرج منه من زمان وهوه
    مش دريان، ومدافعا عن بناء سور الجنينة الذي تقيمه حكومته بدعوى حماية جزرها ،رغم
    أن الأرانب على الجانب الآخر ماتت من الحصار اللي فات ... تاركا كل تلك القضايا
    تحت بند "وأنا مال أهلي"

    لتستمر الحياة ..



    --------------------

    في عزبة كبير القديسين، حيث يجلس فضيلته متابعا الأخبار، وبجانبه مساعده
    إبليس ... ردد :

    - كويس .. كويس ... الدنيا بقت تمام وكله نسي وعاش حياته ... عالم ملهاش في
    حاجة أصلا

    - طبعا يا مولانا ... احنا بقى نستريح ونبدأ نخطط لحاجة بعيدة و ...

    - بعيدة إيه يا بتاع إنت ... احنا لازم نعملنا مصيبة تانية في السخونية دي
    عشان يقولوا عليا فلتة زماني

    تسرب القلق إلى قلب إبليس مرددا :

    - انت فعلا "فتلة" زمانك

    - المهم ... أنا عندي فكرة فحيتة

    رد في حذر :

    - إيه يا مولانا

    - إيه رأيك ؟؟ ... نطلع فتوى إنه يجوز لحكومتنا بناء سور الجنينة، وإن اللي
    يعارضه مخالف لتعاليم القداسة

    هنا صرخ إبليس في صدمة :

    - حرام عليك يا جدع انت .... اتقي الله !!!





    -------------------------------------------------------------------------------

    جميع احداث هذه القصة هي من خيال كاتبها المريض بالهبوط الزعبوطي، وأي
    تشابه بينها وبين الواقع هو مجرد مصادفة وحشة ... أصل الحاجات دي بتحصل في القصص
    الساخرة بس





  2. #2
    عضو متميز
    صور رمزية AHMAD-MAX
    تاريخ التسجيل
    Nov 2007
    المنطقة
    الاردن
    ردود
    2,478
    مضحكة محزنة .. يسلمو ايديك
    ... ...
    الحرية هي التوحيد ..
    عكس الحرية الشرك بالله تعالى ..
    تحرر من عبادة الاشياء حتى عبادة النفس والهوى وصرفها لله وحده ..
    وتمرد على كل قانون غير قانون الله ..
    ان لم تعبد الله وحده ... سوف تكون عبدا لملايين الاشياء ..

  3. #3
    عضو متميز
    صور رمزية keycoo
    تاريخ التسجيل
    May 2007
    المنطقة
    في مكان ما
    ردود
    1,754
    لا حول ولا قوة الا بالله ...

    بس عفارم عليك اخي .. ولكن اود سؤالك .. هذه القصة كأنها حصلت في الواقع تماما منذ وقت ليس طويلا على العالم الاسلامي ... اذكر قصة شيخ في مصر مثل القصة ...

    ولكن اللهم فقهنا في ديننا .. وابعد الظالمين والمنافقين الينا

  4. #4
    مشرف منبر 3D Studio MAX
    صور رمزية ابومعاذ
    تاريخ التسجيل
    Dec 2005
    المنطقة
    وطنى هنا او قل هنالك حيث يبعثها المنادى الله اكبر
    ردود
    5,117
    ههههههههههههههههههه كبير التلباويين برحتك شويه للقدسين يحلو عليك بركتهم
    هههههههههههههه فظيع يافظيع

  5. #5
    ماحدش يعرف يا جماعه القصص ممكن تدخل الاعمال المميزه ولا لأ ؟!ّ
    Nader nabil
    My portfolio

  6. #6
    عضو نشيط
    صور رمزية flamingoAD
    تاريخ التسجيل
    Aug 2007
    المنطقة
    طنـــــ مصر ـــــطا
    ردود
    909
    بسم الله ماشاء الله ... خيال خصب انت عارف لو القصة اتعملت فيلم من خمس سنين مكانش حد صدق الأحداث دي زي أفلام الخيال العلمي ولكن دائما وبعد مرور السنون والأعوام يتحقق الخيال ولا عزاء للمتخيلين

    تسلم أيدك وربنا يخرب بيت الظالم واللي بياكل بدينه

    اللهم صلي على محمد وعلى آل محمد كما صليت على إبراهيم وعلى آل إبراهيم إنك حميد مجيد .. اللهم بارك على محمد وعلى آل محمد كما باركت على إبراهيم وعلى آل إبراهيم إنك حميد مجيد

    قال ابن القيم رحمه الله :
    المحبة شجرة في القلب
    ، عروقها الذل للمحبوب ، وساقها معرفته ، وأغصانها خشيته ، وورقها الحياء منه ، وثمرتها طاعته ، ومادتها التي تسقيها ذكره

  7. #7
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة ahmad-max معاينة الرد
    مضحكة محزنة .. يسلمو ايديك
    أكرمك الله ... شر البلية مايضحك بالفعل

    اقتباس الموضوع الأصلي كتب بواسطة greatness dzn معاينة الرد
    لا حول ولا قوة الا بالله ...

    بس عفارم عليك اخي .. ولكن اود سؤالك .. هذه القصة كأنها حصلت في الواقع تماما منذ وقت ليس طويلا على العالم الاسلامي ... اذكر قصة شيخ في مصر مثل القصة ...

    ولكن اللهم فقهنا في ديننا .. وابعد الظالمين والمنافقين الينا
    حصلت ؟؟؟ ... إزاي بس ... دي حاجات في الخيال بس يا باشا

    اقتباس الموضوع الأصلي كتب بواسطة ابومعاذ معاينة الرد
    ههههههههههههههههههه كبير التلباويين برحتك شويه للقدسين يحلو عليك بركتهم
    هههههههههههههه فظيع يافظيع
    حبي ... ماي لوف ^^

    خليه "يحل" عن نافوخنا يا حسن ^^

    اقتباس الموضوع الأصلي كتب بواسطة نادر ندوره معاينة الرد
    ماحدش يعرف يا جماعه القصص ممكن تدخل الاعمال المميزه ولا لأ ؟!ّ
    حبيب عمو ^^

    اقتباس الموضوع الأصلي كتب بواسطة flamingoad معاينة الرد
    بسم الله ماشاء الله ... خيال خصب انت عارف لو القصة اتعملت فيلم من خمس سنين مكانش حد صدق الأحداث دي زي أفلام الخيال العلمي ولكن دائما وبعد مرور السنون والأعوام يتحقق الخيال ولا عزاء للمتخيلين

    تسلم أيدك وربنا يخرب بيت الظالم واللي بياكل بدينه
    ههههههه

    شكرا لمرورك

  8. #8
    عضو متميز
    صور رمزية The MAS
    تاريخ التسجيل
    Apr 2009
    المنطقة
    Amman, Jordan, Jordan
    العمر
    24
    ردود
    2,132
    اقتباس الموضوع الأصلي كتب بواسطة maxspider معاينة الرد

    - خدام فضيلتك ... إبليس يا مولانا

    اقتباس الموضوع الأصلي كتب بواسطة maxspider معاينة الرد


    هنا صرخ إبليس في صدمة :

    - حرام عليك يا جدع انت .... اتقي الله !!!
    اقتباس الموضوع الأصلي كتب بواسطة maxspider معاينة الرد
    اقتباس الموضوع الأصلي كتب بواسطة maxspider معاينة الرد
    شيئ يذكرني بشخص ما...الله أعلم مين هو

    <<Nobody>> سابقاً

  9. #9
    عضو قدير
    صور رمزية nazzal
    تاريخ التسجيل
    Oct 2005
    المنطقة
    المملكه الاسلاميه المتحده
    ردود
    2,939
    ههههههههههههه
    رائعه من شخص راااائع
    يزداد حبي له في كل مره ادخل له موضوعا
    مش لاقي كلام اقوله لك لاني مش حا اعرف اعبر بيه عن اللي جوايه فعلا
    ممكن ابوخ عليك واستاذنك في نشرها عندي علي الفيس بوك
    مع ضمان حقوق الملكيه الفكريه لك بالطبع

    قل إن شاء الله وليس إنشاء

    محمد راغب ( نزال)
    .................................................
    اللهم ارحم احمد واجمعنا معه في جنه الخلد بلا سابقه عذاب

  10. #10
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة <<nobody>> معاينة الرد
    شيئ يذكرني بشخص ما...الله أعلم مين هو
    غريبة ... مع أنها "خيال محض" ^_^

    اقتباس الموضوع الأصلي كتب بواسطة nazzal معاينة الرد
    ههههههههههههه
    رائعه من شخص راااائع
    يزداد حبي له في كل مره ادخل له موضوعا
    مش لاقي كلام اقوله لك لاني مش حا اعرف اعبر بيه عن اللي جوايه فعلا
    ممكن ابوخ عليك واستاذنك في نشرها عندي علي الفيس بوك
    مع ضمان حقوق الملكيه الفكريه لك بالطبع
    حبي ... دانا اللي بموت فيك يا ريس ^^

    والله ببقى سعيد لرؤية ردودك ... عشان بحبك لله في لله ... مش عشان هتعزمني على الغدا ... لأ، من قبلها

    اتفضل انقل يا باشا ... الموضوع واللي كتبه تحت أمر سعادتك

  11. #11
    عضو متميز
    صور رمزية mmnoor
    تاريخ التسجيل
    Nov 2007
    المنطقة
    ساكن فين ؟؟ انت مخبر ولا ايه ؟؟؟
    العمر
    31
    ردود
    6,588
    قصة روعة روعة روعة
    بجد ربنا يعين البنات (المحتشمات) على قداسته

    لا وإبليس هوا اللي بيفرمله دا يدي إبليس دروس بعد الظهر

    طلب ممكن أنقلها في المدونة بتاعتي مع حفظ الحقوق ؟
    (وَإِذَا قِيلَ لَهُمُ اتَّبِعُوا مَا أَنزَلَ اللَّهُ قَالُوا بَلْ نَتَّبِعُ مَا وَجَدْنَا عَلَيْهِ آبَاءنَا أَوَلَوْ كَانَ الشَّيْطَانُ يَدْعُوهُمْ إِلَى عَذَابِ السَّعِيرِ) لقمان :21

    الرد على من قال بحل المعازف

    http://www.abumishari.com/

  12. #12
    عضو
    صور رمزية sir.hossam
    تاريخ التسجيل
    May 2009
    المنطقة
    مصر (القاهرة)
    ردود
    65
    بارك الله فيك

  13. #13
    عضو نشيط
    صور رمزية hagi
    تاريخ التسجيل
    Dec 2009
    المنطقة
    فلســ♥.حيفـــــا.♥ـــطين
    العمر
    30
    ردود
    851
    انا شوفت العنوان اسمو غريب فما خشيتش بعدين شفت اسم صاحب الموضوع تركت كل شي بأيدي وكبس عليه
    بصراحة لقيت ابداع مش طبيعي كالعادة وبصراحة اول مرة اسمع بهيك قصة ههههههه
    تحياتي يا احلى باشا

  14. #14
    عضو متميز
    تاريخ التسجيل
    Sep 2003
    العمر
    28
    ردود
    4,029
    يوسف انتا بعد البحث عن العروسة وانتا في قائمة التوب عبطاء في الكتابة : P

  15. #15
    عضو متميز
    صور رمزية MAXIOS
    تاريخ التسجيل
    May 2007
    المنطقة
    Cairo, Egypt
    ردود
    1,938
    همّ يضحِّك ويبكِّي
    543212345
    خالد ماهر
    ـــــــــــــــــــــــــــــــــــــــــــــــــــــــــــــــــــ
    My Animations



  16. #16
    عضو نشيط
    صور رمزية salah_snz
    تاريخ التسجيل
    Aug 2007
    المنطقة
    مصر
    العمر
    28
    ردود
    362

    و لا تعليق
    Jrchitects
    for Architectural and Graphic Designs
    jrchitects@gmail.com

  17. #17
    عضو متميز
    صور رمزية mmnoor
    تاريخ التسجيل
    Nov 2007
    المنطقة
    ساكن فين ؟؟ انت مخبر ولا ايه ؟؟؟
    العمر
    31
    ردود
    6,588
    اقتباس الموضوع الأصلي كتب بواسطة salah_snz معاينة الرد

    و لا تعليق
    نفسي أفهم، فرقت إيه الكمامة عن البرقع ؟؟

    ولا هي تلكيكة والسلام ؟؟
    (وَإِذَا قِيلَ لَهُمُ اتَّبِعُوا مَا أَنزَلَ اللَّهُ قَالُوا بَلْ نَتَّبِعُ مَا وَجَدْنَا عَلَيْهِ آبَاءنَا أَوَلَوْ كَانَ الشَّيْطَانُ يَدْعُوهُمْ إِلَى عَذَابِ السَّعِيرِ) لقمان :21

    الرد على من قال بحل المعازف

    http://www.abumishari.com/

  18. #18
    طالب / مدرسة الأنيميشن
    صور رمزية eslamafify
    تاريخ التسجيل
    Oct 2005
    ردود
    2,274
    تسلم ايدك يا يوسف بجد تسلم ايدك

    بس انا افتكرت ابليس هيعتزل فى الاخر واحتمال يكون قطع الخلف وجاله شلل تلت ترباعى

  19. #19
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة mmnoor معاينة الرد
    قصة روعة روعة روعة
    بجد ربنا يعين البنات (المحتشمات) على قداسته

    لا وإبليس هوا اللي بيفرمله دا يدي إبليس دروس بعد الظهر

    طلب ممكن أنقلها في المدونة بتاعتي مع حفظ الحقوق ؟
    منور يا جميل ... انقل يا باشا زي مانتا عاوز ^^

    اقتباس الموضوع الأصلي كتب بواسطة sir.hossam معاينة الرد
    بارك الله فيك
    شكرا يا حسام

    اقتباس الموضوع الأصلي كتب بواسطة hagi معاينة الرد
    انا شوفت العنوان اسمو غريب فما خشيتش بعدين شفت اسم صاحب الموضوع تركت كل شي بأيدي وكبس عليه
    بصراحة لقيت ابداع مش طبيعي كالعادة وبصراحة اول مرة اسمع بهيك قصة ههههههه :d
    تحياتي يا احلى باشا
    متشكر يا جميل، ده وجودك لوحده يزيدني شرف وعماد وحسين

    اقتباس الموضوع الأصلي كتب بواسطة عامر معاينة الرد
    يوسف انتا بعد البحث عن العروسة وانتا في قائمة التوب عبطاء في الكتابة : P
    آند أي ويل ستاي أون إت ^_^

    اقتباس الموضوع الأصلي كتب بواسطة maxios معاينة الرد
    همّ يضحِّك ويبكِّي
    وهم بيلطم ^^

    اقتباس الموضوع الأصلي كتب بواسطة salah_snz معاينة الرد

    و لا تعليق
    ولا أعرفك

    اقتباس الموضوع الأصلي كتب بواسطة mmnoor معاينة الرد
    نفسي أفهم، فرقت إيه الكمامة عن البرقع ؟؟

    ولا هي تلكيكة والسلام ؟؟
    لا يافندم ... دول كمان قلعوهم الكمامات

    لكن البنت المؤدبة اللي لابسة من غير هدوم، براحتها ... اهم حاجة الشبابا الصايع يعيش ويتلهي ويتوكس

  20. #20
    يوسف التلباني
    عضو لجنة تحكيم

    صور رمزية maxspider
    تاريخ التسجيل
    May 2004
    المنطقة
    <<<<EGYPT>>>>
    العمر
    32
    ردود
    5,585
    اقتباس الموضوع الأصلي كتب بواسطة eslamafify معاينة الرد
    تسلم ايدك يا يوسف بجد تسلم ايدك

    بس انا افتكرت ابليس هيعتزل فى الاخر واحتمال يكون قطع الخلف وجاله شلل تلت ترباعى
    هههههههههههههه ... تصدق ممكن يكون جاب شريحة :d

    منور يا ريس

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل