هههههههه
الموضوع ما فيهوش لبس خااااالص
لان الاخ الفاضل عامل اقتباس لرد من ردودي في الورشه يعني هو قاصد يبعت الكلام هنا
وزي ما قلت انه نفس الرد في الجنبين
يعني من الواضح انه تبع مبدء كل الردود تمشي في اي موضوع
وقول اوكي لاي رساله
ودا اللي بياكد ان الراجل ما كانش عارف احنا بنتكلم في ايه على قد ما هو كان بيتجاوب مع مواضيع المنابر
ودي مشكلة الجرافيك عندنا فعلا
المنتدى ده المفروض انه مكان تبادل خبرات
لكن احنا بنتعامل معاه على انه مكان فرد عضلات
يا جماعه انا كتير بتعلم حاجات جامده جدا من ناس لسه بتقول يا هادي
وكتير برده بتصدم بفراغ عقول بعض الناس اللي يفترض انهم عتاوله
احنا عاوزين نسمع بعض وناخد وندي مع بعض
مش نقنع بعض اننا اشطر من بعض
عييييب دا احنا الاصل
تمام انت كده
عشره على العشره
بس في شوية ملاحيظ سفروته
1- موضوع تنعيم الظل موضوع مهم جدا لتشخيص اضاءة الشمس واللي هي عادة تاني اضاءه بتحطها في المشهد بتاعك
فما ينفعش طيعا نستعجل
2- الشمس مصدر اضاءه متساوية التوزيع - ودي نقطه مهمه بتخلينا دايما ما نفكرش في الاسبوت لايت لتمثيل الاضاءه -
وعليه يبقى ما ينفعش يكون في اماكن شديدة الاضاءه واخرى لا يعني المنطقه الساطعه في وسط الريندر بتاعك بتقول ان الاضاءه صناعيه وقريبه من السين فراجع الانتينسيتي بتاعت اللايت والغي واحد من الاتنين وخلي بدل منه مثلا اومني لايت وفعل خاصية امبينت من منطقة Advanced effects
3- بدل ما تستخدم اتنين دايركشن لايت وتبهدل الجهاز معاك في الحسابات خليه واحد وفعل خاصية الاوفر شوت من Directional parameters حتلاقي ان الاضاءه بتسرح بره حدود الـ Cone خاصة ان احنا مش محتاجين موضوع الانديركت ليمينشن دلوقت
طبعا احنا المفروض نتكلم على موضوع لون الشمس بس انا مأجله عشان نتكلم في مع اضاءة القبه السماويه
نكمل كلامنا
طبعا انا كنت حابب يكون في مشاركه اكتر من الناس عشان حتى يكون في اكتر من اسلوب قدامنا عن تمثيل الاضاءه الخارجيه لكن ربما بعد ما نتكلم عن موضوع اضاءة الافق الناس تبدء تشاركنا خبراتها
المهم نكمل احنا اضاءة القيه السماويه
اضاءة الشمس في الواقع عباره عن ايه
اولا اللون عباره عن خليط من نور الشمس والاضاءه العامه اللي جيه من السما وقدر قليل جدا من الكولور بليدينج اللي حاصل نتيجة الانديركت لمينيشن او الاضاءه الغير مباشره
طيب احنا اتكلمنا عن تمثيل اضاءة الشمس بشكل مبسط وقلنا انه حيكتمل موضوعه مع كلامنا عن القبه السماويه
اضاءة الشم لما بتيجي من الفضاء وهي بتمر خلال طبقات الافق بيحصل لها نوع من التشتت في طبقات الجو والسحب ودا بيخلي السماء بتشع اضاءه نوعا ما
وحسب حالة صفاء الجو والتوقيت والمناخ بيكون شكل الاضاءه
يعني اضاءة السما الصافيه بتكون اقرب للزرقه
السماء الملبده بالغيوم بتقترب من درجات الرمادي
اضاءة السما المبكره بتكون باهته وافرب للون الابيض
اما وقت الغروب بتكون الاضاءه نوعا محمره
وقت الظهيره مابين الصفره والبرتقالي
الاجواء البارده بتكون السما لونها اقرب للالوان البارده ازرقات وحاجات من دي
الاجواء الحاره بتكون السما لونها احمر وحاجات من دي
الحراره اللونيه color temperature
الكلام ده بنمثله في الاعمال الفنيه اعتمادا على حاجه اسمها الحراره اللونيه color temperature وهو زي ما تقول كده ترجمه لدرجة الحراره بالوان
شوف مثل الصورة ديه
لو خدت بالك في ارقام مكتوبه عند كل تون دي اشاره لدرجة الحراره اللي بيمثلها اللون ده
طبعا الارقام دي بالكلفن
ونحطها قاعده قدام عنينا ونحاول ماننسهاش لاننا حنحتاجه قدام
الالوان حرارتها بتقاس بالكلفن
الصوره دي بقى
لو خدت بالك لون الاضاءه على الجدار ورا المصابيح مختلف ودا ارتباطا بدرجة حرارة الاضاءه اللي خارجه من المصباح ومكتوب جنب كل مصباح درجة الحراره وقيمة الجهد الكهربائي
خاي بالك من التدرج اللوني الموجود في السما
دا بيعبر ومطبوع في ذهن الناس كلها بتوقيت الغروب
بمعنى ان المصور لو ادى ظهره للشمس وصور المباني اللي قدامه
حتلاقي الصوره طبعا مصبوغه بالوان التدريج اللي قدامك
واول ما حتشوفها حتقول على طول الصوره ديه وقت الغروب
الكلام ده اسمه جو الصوره الالوان والاضاءه بتديك ايحاء بالمكان قبل ما تشوف تفاصيله
الصور ديع بردوا وقت الشروق
واخد بالك من الالوان ودرجة الاضاءه في المكان
طيب نشوف بقى احنا ممكن نحقق الكلام ده ازاي في الماكس
حلو اوى كده بس انا مش فاهم التدرج الى من 0 ل 1000 ده ايه علاقته بالكلفن علما بأن قيم الكلفن فى الصوره الى تحت معديه الألف ممكن توضيح اكتر استاذ شريف
انا اسف اللبس ده سببه انا من خلال سهو في الكتابه
هو القياس لحرارة اللون بيكون بوحده اسمها الميرد Mired
وهي اللي التدريج بتاعها تحت مدرج الالوان اللي فوق
والميرد ده بيساوي مقسوم مليون على كلفن اللون نفسه
يبقى الكلفن للاضاءه والميرد للون نفسه
وحيث ان احنا هنا موضوعنا هو الاضاءه فانسى موضوع الميرد ده خالص
وخليك مع الكلفن خاصة
ان اوتوديسك مبشيشه الدنيا في الماكس وما دخلتناش في قصة القسمه والضرب دي
ومخلينا نحدد لون الاضاءه بالكلفن مباشرة
على فكرة يا جماعه انا جتني لفته كريمه من الاخ الفاضل محمد قشطه بخصوص الورشه
هو كان بيعلق على ان التطبيق العملي اهم من النظري
وخاصة لو تطبيق في حالات معقده ومشاهد اكبر من موضوع البوكسات
وانا شخصيا معاه في الموضوع ده
لكن لان احنا اتناولنا موضوع وعايزين نفنده صح
فانا راي بصراحه اننا نقتل كل جوانبه تماما
عشان فعلا انا عاوز اعمل تغطيه عملية بحالات معقده
فالكلام ده حيفيد اوي بعدين
يا جماعه احنا عاوزين نتعامل مع الامور بعقولنا مش يذاكرتنا
لو اتناولنا الموضوع على انها مفهوم وفكرة منطقيه مبنيه على اساس علمي ما فيش مشهد حيقابلنا مش حنعرف ننوره
اما موضوع اننا نعتمد على شوية اعدادات نلزقها مع كل مشهد
ويا صابت يا خابت
ونعد نعيد ونزيد في تيستات الريندر علشان يظبط
عمرنا ما حننور
فيا ريت بس الناس تستحمل معايا للاخر وتساعدني فعلا باللي عندها لاننا محتاجين نتعاون مع بعض
ما فيش مجال محتاج تعاون اكتر من مجالنا ده
وربنا يعينا جميعا
بص يا سيدي
اولا بلاش موضوع استاذ ديه خلي البساط احمدي
ثانيا الجدول اهه
الجدول ده بيحددلك قيمة لون اضاءة بعض المصادر في ظروف معينه وهو مختار حالتين الحاله الاولى مكان داخلي وجو ومعامل تصحيح الوان اضاءه المكان بقيمة 3200 كلفن ومكان خارجي حيكون لونه ايه بمعامل تصحيح اضاءه قيمتها 5500 كلفن
وهنا ده الكلام اللي احنا لسه قايلينه عن ان لون الاضاءه الشمس بيبقى مجموعه من العناصر متاثره ببعضها
فهو يا صاحبي حاططلك مجموعه من مصادر الاضاءه بدءا بلون لهب عود الثقاب وبيقولك ان عادة درجة اضاءته بتتراوح من 1700 الى 1800 كلفن
خليني هنا بقى احطلك تدريج لوني بدرجاته الاول
تعليق