سؤال يهمني.. بخصوص مجال الديزاين الـ 2d وتصميم المواقع

[i-m_moslem]

السلام عليكم وعيد مبارك عليكم يارب ..

سؤالي هو إني بحب مجال التصميم على العموم ومهتم بيه وبأخباره..

لكني حبيت إني أتخصص فيه وبالتالي حابب إني اشتغل ف المجال علشان أقدر أدي فيه بإذن الله..

بس طبعا انا مش معايا شهادة ف تخصص معين..

ف ياريت الأعضاء الكرام يوجهوني منين أبدأ..

من حيث الكورس اللي ادخله والمكان اللي اروحه بحيث إني من سكان القاهرة وأي نصيحة بقى مفيده من خبراتكم ف المجال المنشود..

وياريت أعرف برضه ياترى السوق عايز مصممين التو دي ولاا مصممين المواقع اكتر ولاا عايز غير دول؟؟

وجزاكم الله خير من قبل م تردوا عليا ...


تامر عمران

[aktoom]

السوق محتاج مصممين متميزين .. ولو كان لديك خبرة في تصميم المواقع كان أفضل ...

على كل حال .. يوجد كتب متخصصة ... يوجد اسطوانات ويوجد دروس كثيرة على النت ...

لكن لو بدأت بأخذ دورة في معهد معترف به لكان الأمر أفضل .. وأنصحك بالمعاهد المعتمدة من شركة أدوبي ...

ولكن بطبيعة الحال لن يقف الأمر عند الشهادة ... بل يجب الاستمرار بالممارسة والاحتكاك .

وفقك الله

[SENSE]

وعليكم السلام

بص ياتامر

اولا اهلا بيك فى المنتدى

ثانيا بالنسبة لسؤالك

عشان تتخصص فى مجال التودى قدامك طريقين

جرافيك ثابت اللى هو الدعايا والاعلان ( تصميمات ثابته لاستخدامها فى لافتات المحلات والمطبوعات وهكذا)

او جرافيك متحرك اللى هو الموشن جرافيك والانيميشن الخاص بالتو دى

وفى كلتا الحالتين لازم تكون بارع فى برنامج الفوتوشوب

ولو عايز تبدأ ابدأ من الفوتوشوب CS3

بالنسبة للدعايا والاعلان هتاخد Photoshop + Illustrator

بالنسبة للموشن جرافيك او الانيميشن

هتاخد Photoshop + Adobe After Effects

فى قسم تالت اللى هو الويب ديزاين

ودا هتاخد فيه Photoshop + Flash or Swish MAX + Dream waver

بالنسبة للمكان المناسب

فانا برشح مركز YAT

هتلاقيه فى اى مكان

هو غالى شوية بس جميل جدا ومفيد

بالتوفيق ياحبى

[i-m_moslem]

أخي aktoom وأخي sense ربنا يباركلكم في كل اللي فهمتموهولي بجد.. آمين يارب العالمين ..

طيب انا سمعت سمع مش حلو على يات.. وسمعت إن المركز الثقافي الروسي عنه إنه جميل..

ياترى أنهي فيهم أحسن ولاا فيه أحسن منهم.. وياترى يات فروع وفروع؟

والسوق ياترى محتاج دايماً لمين أكتر.. مصممين تو دي ولاا مصممين مواقع..

والمشكلة إني أعرف كتير ف الفوتوشوب وخايف أدخل أتعلم نفس اللي انا عارفه وبالتالي يبقى اسمي اشتريت شهادة وبس..

وبصراحة..

أنا عايز اتعلم قبل الشهادة.. حتى ولو مشتغلتش بيها..

طبعا الشغل مهم .. لكن العلم أهم .....

حبيت كمان اقول إني الحمد لله بعرف ارسم كويس قوي ودايماً بيكون عندي افكار لو حبيت اعمل شعار أو لوجو لحاجة معينة.. هل دا يقدر يفيدني ف اللي هتعلمه؟

معلش بقى ولو اني مش بحر.. بس بحب الزيادة .. وطمعان ف خيركم ومساعدتكم..

جزاكم الله خير عني وعيد مبارك علينا وعليكم وعلى كل العائلة يارب ...

[SENSE]

بالنسبة ليات فهو مركز معتمد وشهادته هتنفعك كتير بالذات فى مصر

عشان انت عارف انها بلد شهادات للاسف

تانى حاجة السوق محتاج ويب ديزاينر طبعا

وهقولك كمان تروح فين

هتروح القرية الذكية هناك فى شغل كتير للويب ديزاينرز ومرتباتها جميلة جدا

بالنسبة لموضوع فروع وفروع دا معنديش فكرة عنه

بس هما ناس كويسة وبتعرف تختار الانستراكتور كويس

المركز الثقافى الروسى معرفش اى حاجة عنه بصراحة لانى محتكتش بيه قبل كدا

وبالنسبة للافكار فهى اهم حاجة للمصمم عشان هى دى الحاجة اللى بتميزه عن بقية المصممين وبتعمله اسم

ربنا يوفقك