تويت
قصة الفلاح والحمار والأسد
بيقولك مره واحد فلاح وهو بيشتغل فى الأرض بتاعته لاحظ أن الحمار بتاعه كده قاعد يتململ ومش عاجبه !! .... المهم الفلاح سكت ... سكت خالص ... وعمل نفسه مش واخد باله .... لحد ما الحمار فى يوم انفجر فيه وقال له بمنتهى الغضب :-
بص بقى .... أنا باتعامل المعاملة دى ليه ؟؟ ... اشمعنى بتحطلى برسيم بس عشان آكله .... لكن أنت بتاكل مية صنف ومية نوع !!
الفلاح ذاهلا :- يعنى أنت عايز ايه ؟؟ ... أقدملك فى الزريبة كباب وكفتة ؟؟
الحمار :- زريبة ايه ؟؟ ... انا عايز أدخل البيت وآكل من على ترابيزة السفرة بتاعتك !! ... أنا اللى باعمل الشغل كله وطالع عينى طول النهار ... وكل الخيرات اللى عندك دى أنا السبب فيها .... يبقى ماكلش ليه معاك من نفس أكلك وعلى سفرتك كمان ؟؟
الفلاح وهو يهرش رأسه :-بس أنت حمار !! وطول عمرك بتاكل البرسيم وعايش فى الزريبة ... اشمعنى دلوقتى اللى مش عاجبك ؟؟ ايه اللى جد ؟؟
الحمار حزينا :- أنا كنت ساكت وكاتم شكوتى جوه قلبى ... لحد ما شفت الجيران بيعاملوا الحمير اللى عندهم ازاى .... فصعبت عليا نفسى وقررت آخد حقى أنا كمان !!
الفلاح :- ماشى ... انا ماعنديش مانع تيجى تخش بيتى وتاكل على سفرتى كمان .... بس مش خايف من الأسد ؟؟
الحمار :- أسد ايه ؟؟!!
الفلاح :- أنت مش عارف أن فيه أسد عندى فى البيت ؟؟ ... وأنك لو دخلت البيت حياكلك ؟؟
الحمار وقد بدت عليه الحيرة :- بس ازاى عندك أسد فى البيت !! ... مش ممكن ياكلك انت كمان ؟؟
الفلاح :- لا طبعا .. انا مروضه ... وبديله ياكل .... لكن أنت غريب عنه .... لو شافك حياكلك!! ... عرفت بقى ليه أنا كنت مانعك تدخل البيت ؟؟ ... عرفت ليه كنت مقعدك فى الزريبة ؟؟
الحمار وهو يهز ذيله بعصبية وبدا الخوف عليه :- أسد ؟؟ ..... يا نهارى !! ... يعنى أنت طول الفترة دى كنت حامينى من الأسد وأنا مش عارف !! ... وأنا بدل ما أشكرك مش عاجبنى ؟؟ ..... أنا مش عارف أقول لك ايه .... سامحنى
- See more at: http://wise-people.blogspot.com/2014...l#.U_yVkfmSy88