حوار يحرق الدم
- إيه هو الحيوان الأخضر الصغير اللى بياكل الزلط؟
هو ابن الحيوان الأخضر الكبير اللى بياكل الزلط
- أيه هو عكس كونكريت
لا تكن كريت
- أيه هو عكس تلميذات؟
Don't tell me that
- ليه الثعلب تخين ؟
علشان الثعلب fat fat
- حاجة ماشية على الأرض و بتعمل زززززززززززززز- إيه هى؟
صرصار راكب متوسيكل
- طب ناس دخلوا شقة فعرفوا إن فيها صراصير - عرفوا إزاى؟
لقوا الموتوسيكلات راكنة جنب البلاعة
- تعرف تقولى فرقين بين الليمون و الزيتون؟
1- فيه ليموناده و مافيش زيتونادة
2- تقدر تقول الناس لامونى لكن متقدرش تقول الناس زاتونى
- طب تعرف تقولى 5 فروق بين البطة و الوزة؟
1- تقدر تحلق شعرك زلبطة لكن ما تقدرش تحلق زلوزة
2- فيه رحالة اسمه ابن بطوطة لكن مافيش رحالة اسمة ابن وزوزة
3- تقدر تبلبط فى البحر لكن ماتقدرش تبلوز فيه
4- كلنا بنتغطى فى الشتاء ببطانية لكن مبنتغطاش بوزانية
5- الوزة كانت زمان بطة لكن الشيطان وزها
- طب تعرف تقوللى 5 فروق بين الفيل و النملة؟
1- رجل الفيل ممكن تنمل لكن رجل النملة مش ممكن تفيل
2- البيت ممكن يبقى فيه نملية
3- تقدر تاكل سمك فيليه لكن مش ممكن تاكل سمك نملية
4- كل واحد له بروفايل لكن مالوش برونملة
5- You can feel but you can't namla
- إيه الفرق بين الفيل و البرغوث؟
الفيل ممكن يتملى براغيث لكن البرغوث مش ممكن يتملى فيله
- إيه عكس زمان؟
The Woman
- طب أيه عكس نجوم؟
نجعد
- ليه القطر بيصفر أمام الأجزخانات؟
علشان القطرة تطلع
- ليه الكاسيت مابيخلفش؟
علشان بنحطله شريط
- و ليه الكتكوت مابيعرفش يكذب على الفرخة؟
علشان هيه اللى فاقساه
- ليه القطر بيقف على المحطة ؟
علشان مابيعرفش يقعد
- طب و ليه بيمشى بعد كده؟
علشان زهق من الوقفة
- بيضة وقعت من الطيارة و ماتكسرتش - تفتكر ليه ؟
ربنا يستر
- إزاى نحط غزالة فى التلاجة على 3 خطوات؟
نفتح التلاجه و نحط الغزالة و نقفل التلاجة
- طب إزاى نحط الفيل فى التلاجة على 4 خطوات؟
نفتح التلاجة و نشيل الغزالة و نحط الفيل و نقفل التلاجة
- طب فيه طيارة شايلة اجهزة كهربية و حصل فيها عطل لازم نرمى اتقل جهاز - نرمى ايه؟
نرمى التلاجة علشان فيها الفيل
- واحد بيعوم و فجأة مات - تفتكر ليه ؟
علشان التلاجة وقعت عليه
تعليق