فذلوك فزلوك

[رجل السماء]

حسبى الله ونعم الوكيل

تقول ايه لفذلكة الشعب المصرى

اسمع يا سيدى
وانا فى وسط البلد النهاردة كنت مع الاسرة
حوالى الساعة 12 بالليل راكن العربية امام احدى الصيدليات

فجأة وجدت العربية سخنت فتحت الكبوت علشان اشوف ايه المشكلة فزلكة

المهم قولت اكيد العربية عايزة ماء

سبت الجماعة فى العربية قبلت واحد شغال فى الصيدلية
وقلتله عايزين ماء
جاب زجاجة وانا داخل العربية والاخ عمال يضع الماء زجاجة ثم زجاجة ثم زجاجة
حوالى ست زجاجات
يعنى حوالى 6 لتر ماء
فى الحقيقة الشك قتلنى روحت نازل من العربية وطبعا العربية شغالة
لقيت الزيت طافح على المتور والحال زفت

والاخ يقولى ده صدى علشان العربية لايوجد فيها ماء
وهو من البداية شغال على فتحت الزيت وعمال يسقيها فى ماء
طبعا ما قولكمش
الشكمان دخان ثم دخان حتى تحولت السيارة لكتلة من الدخان
طبعا اول شىء عملته روحت قافل العربية
تقولوا ايه للفزلكة المصرية

روحت رايح على قرب بنزينة وقلت لواحد من الشغالين هناك على الحكاية

اتى معى ثم اخذنا العربية زق حتى البنزينة
والغرامة التى تسبب بها شخص عمرى ما شفته ولا حتى حلمت بيه قبل كدا
طبعا الراجل غلبان

اشتريت 2 جالون زيت واحد علشان يغسل بيه والثانى علشان يحطه بدل الطحينة الي تعملت


وغرامة بدون اى داعى

هذه نصيحة لكل شخص معه سيارة لاتدع احد يلمس سياراتك

اتمنى ان يحدث هذا الموقف مع احمد

[S.A]

...........................................










المصيبه إن الأخ المفروض بيعرف يعالج بشر







................................

[Ahmed012]

أكيد يا مصطفى كان نفسك يبقى معاك بولونيز ساعتها

وبعدين أنا مستغرب إنت إزاي شايفه يعك الدنيا كده وسايبه وواقف جنبه وساكت ؟؟؟؟

وعلى فكره أنا واخد بالي من العربية ميه وزيت وكهرباء وكلله
بس المشكله إنها بصراحه بتتبهدل في المطبات والمشوار اللي ياعيني واخداني فيه كل يوم
طبعا إنت عارف 6أكتوبر يعني إيه 90 كم يوميا ........... ده يوم مافيش خالص

على فكره أنا حصللي موقف مشابه بس ماخليتش حد يمد إيده في العربية خالص

بس الموقف اللي حصل إني مره كنت نازل من على كوبري أكتوبر من عند غمره كده وبعدين قولت أشرب مانجه من عند ملك المانجه كده.
المهم بكل ألاطه قمت راكن قدامه وطافي الموتور وناديت على واحد من اللي واقفين عايز واحد مانجه.
كانت كوبايه مانجه حلوه بصراحه بس راحت كل الوجاهه والقلاطه أول ماجيت أدور العربيه
حلفت ماهيا دايره
طبعا كل الواقفين بتوع المحل جم وحاولوا يزقوني لكن مارضيتش تدور خالص

المهم قمنا زاقينها على جنب الطريق وقمت رايح أدور على ميكانيكي علشان يشوف فيها إيه
وبالفعل لقيت ميكانيكي تحت الكوبري كده
قمت واخده ورايح على العربية بص فيها كده وقاللي دور طبعا أنا مابحبش أسيبه واقف على الموتور وأدخل أنا جوه لإنه مش الميكانيكي بتاعها ومش ثقه.
لكن غصب عني إضطريت قعدنا حوالي ربع ساعه وبعدين قاللي إنت محتاج بطارية !!
بالرغم إن البطاريه جديده بصراحه أول ماقال كده أنا عرفت إنه نصاب ......... قاللي بقى ثواني هاروح المحل وأجيب بطاريه وأفك دي وأركب و............
قولتله بص سيبها بايظه أنا مش عايز أروح دلوقتي
قاللي ياعم مش هاينفع أنا لازم وبتاع و........
قلتله لأ ياعم شكرا لغايه كده إتكل إنت على الله وقمت مديله جوز جنيهات وممشيه

وإتصلت بواحد صاحبي كنت عارف إنه قريب من غمره (نايتي). وعنده عربيه 131 مغلباه كده برضوا
المهم جه هوا وفريق العمل (إكرامي ومحمد على) وقعدنا نزق في العربيه ومارضيتش تدور
بالصدفه البحته إكتشف (إكرامي) إن أحد أسلاك البطاريه مفكوكه وإن البطاريه مملحه
يعني بس حطينا ميه على البطاريه ووصلنا السلك ((اللي طبعا كان فكه الراجل)).
ودارت العربيه ومشيت زي الفل...............





نصيحه مني ليك ماحدش يمد إيده في عربيتك وإن مدها لازم تكون واقف جنبه وعارف هوا بينيل إيه
لو إنت واقف ومش عارف يبقى أحسنلك سيبها بايظه لغايه مايجي واحد ثقه قبل الدنيا ماتتعك معاك



لمزيد من تعليمات الأمان عن البلونيز يرجى قرائه الموضوع
http://www.maxforums.net/showthread.php?t=50787

[esso70]

يا أخى دول وصلوا من فزلكتهم لحد باب البييت عندنا
قال اييه واحد صاحبي جاىى لى وانا مدييلوا مفتاح البييت يفتح وانا فى الدور الأرضي ولما المفتاح عصلج معاه شويه
جه واحد مش عارف كان رايح فيين كدا وطبعا عاييز يساعد
قام متربس الباب عليا وممعييش مفتاح وكان هيقطم المفتاح (( أنتوا عارفيين الحماسه فى مساعدة الغير ساعات بتوصل لدرجة الغباء))

[youssef_23]

موضوع جميل جدا
ارجو عرض تصميمات العربية بعد تعديلات الزيت
هههههههههههه
هو دة فعلا الشعب المصرى

[maxspider]

هو دة فعلا الشعب المصرى

شعب المعجزات ... في زمن لم تعد فيه أي معجزات ...

[String]

يا أخى دول وصلوا من فزلكتهم لحد باب البييت عندنا
قال اييه واحد صاحبي جاىى لى وانا مدييلوا مفتاح البييت يفتح وانا فى الدور الأرضي ولما المفتاح عصلج معاه شويه
جه واحد مش عارف كان رايح فيين كدا وطبعا عاييز يساعد
قام متربس الباب عليا وممعييش مفتاح وكان هيقطم المفتاح (( أنتوا عارفيين الحماسه فى مساعدة الغير ساعات بتوصل لدرجة الغباء))

ههههههههههههههههههههههههههههههههههههههههههههه
معلش ياسلام دى سنة الحياة

[Ahmed012]

ألذ حاجه إنك فعلا تلاقي المواطن المصري

دكتور عبقري ..... في العياده أو عند مرض أحدهم
مهندس فذ ....... حينما يتعلق الأمر بالهندسه وبالنظريات الهندسية
نجار قديم .... عندما يكون هناك مشاكل في أي حاجه في البيت ((نفس موقف إسلام))
سباك محترف...... أول مالمية تقطع ممكن يركبلك توصيله من الجيران
طيار خبير.. ...... في الحديث عن الطيران ......... ولااااااااااا عباس إبن فرناس نفسه وإحتمال تلاقيه يعرف الأخوان رايت كمان
صااااااايع كمبيوتر....... تلاقي بيل جيتس كان إبن خالته زماااااااان وقعد معاه كتير ويفهم في كل حاجه في الكمبيوتر
..............
من الآخر في كل حته وكل وقت وزمان ومكان
تلاقي المصري فهلوي ....... يفهم في كل حاجه ومستعد للمساعده زي ماحصل مع رجل السماء

[أبوهاشم]

والله مينفعش أخش بين الشعب المصري أحسن يزعلو مني

موقف غريب جدا

أضن انك تلحق تبيع العربية قبل ما تخبط أحسنلك

ههههههه

[max ghost]

تعيش وتاخد غيرها ..

[رجل السماء]

ربنا يحفظكم شر الفزلكة المصرية
زى مقال احمد مشكلة المصرى فاكر نفسه بيفهم فى كل حاجة

والغريبة تلاقيه واثق جدا من الي بيعمله حتى ولو هو فى النهاية غلط

يعنى الراجل كان عمال يضع فى الماء وتقول ده اكيد ميكانيكى مش ممكن يكون شغال فى صيدلية

ولما العربية دخنت جه واحد وقالى لازم تفك الطبة من تحت وتنزل الطحينة وتضع زيت من جديد

والله هو نفس الراجل قالى انا هفكلك الطبة وانت تجيب الزيت ونحطه
يعنى حتى بعد المصيبة لسة فاكر نفسه ميكانيكى تقمس رهيب لدور الميكانيكى
بس هو شعب لذيذ وطيب بكل مشاكله

ربنا يخلينا لبعض ونعيش وناخذ غيرها