موضوع: حتى اسألوا سيمبا !!

ردود: 9 | زيارات: 905
  1. #1
    Designer
    صور رمزية S.Badr
    تاريخ التسجيل
    Dec 2004
    المنطقة
    أرض سمرا وقمرا .. وضفه ونهر ومراكب
    العمر
    16
    ردود
    1,586

    Angry حتى اسألوا سيمبا !!

    حتى اسألوا.. سيمبا!
    وإنت ماسك ساندويتش الفول السخن وماشي مع صاحبك -ولاّ صاحبتك يا سيدي ما تزعلش!- بصيت على يمينك لقيت أفيش فيلم سينما جديد..
    شكله كده بيقول إنه حلو -الفيلم مش الساندويتش!-

    هتبص لصاحبك وتطلعوا الفلوس اللي معاكم وتحسبوها وتشوفوا هتحصل تمن تذكرة السينما؟!
    ولاّ..
    هتبص للأفيش في السريع..
    وبعدين ترجع تاكل في ساندويتش الفول اللي برد؟!

    شوف يا سيدي..
    لو كنت من الناس اللي ممكن تعمل الاختيار الأولاني
    جميل جدا.. خليك معانا..
    ولو فضلت ساندويتش الفول عن كلامنا ده...
    معلهش تعال على نفسك وكمل الموضوع لآخره..
    مش جايز تلاقيه أطعم من الفول السخن؟!|

    بس ما تستعجلش بس واصبر شوية علينا..
    وخلينا نسألك كام سؤال مهم..

    شفت فيلم "الأسد الملك" أحد روائع والت ديزني..
    عرفت إن الصراع بين الشر اللي بيمثله الأسد "سكار" والخير اللي بيمثله الأسد "سيمبا" ممكن يكون طويييييييييييييييييل المدى لكن الأكيد إن الخير هو اللي بينتصر في النهاية.. مش مصدقنا.. طب حتى اسألوا سيمبا!

    كنت تعرف حاجة عن المجاهد الليبي الكبير "عمر المختار" قبل ما تشوف فيلمه الشهير اللي أخرجه المخرج السوري الرائع "مصطفى العقاد" الله يرحمه؟

    قرأت كتاب عن سيرة "صلاح الدين الأيوبي" اللي الناس كلها بتستشهد بقوته وعظمته وإنسانيته في نفس الوقت في التعامل مع الأعداء.. ولا أكتر حاجة عرفتها عنه كانت من خلال فيلم "الناصر صلاح الدين"؟

    إيه شعورك لما بتسمع أغنية "زهرة المدائن" اللي بتغنيها صاحبة الصوت العبقري "فيروز"؟
    بتحس بإيه لما بنحتفل بذكرى نصر أكتوبر وبتسمع أغنية "وأنا ع الربابة باغني"؟
    بييجي إيه في بالك لما تسمع رائعة "صلاح جاهين" "صورة" بصوت "عبد الحليم حافظ"؟
    فاكرين مسرحيات سكة السلامة ووجهة نظر والزعيم.. وغيرها وغيرها؟


    وصلك المعنى؟
    طيب إمسك فيه بقى بإيدك وأسنانك وتعال ندردش مع بعض شوية..

    أي واحد بيدرس في الحضانة حتى عارف إن مصر بلد نامي..
    يعني لا بلد مستواها الاقتصادي كبير بالقوي..
    ولا تحت الأرض يعني..
    يعني احنا مش زي سويسرا.. ولا زي موزمبيق برضه!
    نما.. ينمو.. نموا.. صار ناميا..
    هو ده حال مصر..

    طيب جميل..

    هل في الظروف اللي مصر فيها دي..
    ممكن نعتبر إن الفن.. ضرورة مانقدرش نستغنى عنها..
    ولا رفاهية...
    زيه زي العربية المرسيدس.. والتكييف الموجود في الشقة.. والشاليه اللي في شرم الشيخ.. والهدوم اللي بتتشري من إيطاليا.. والأكل اللي بييجي سخن طازة من مطاعم فرنسا؟

    بلاش دي..
    وتعال نفكر بشكل تاني..

    إيه الجهاز اللي هتكون ضامن إنه أكيد هيكون موجود في أي شقة أو حتى عشة في مصر..
    الجاكوزي.. ولا دي في دي.. ولا الأجهزة الرياضية لزوم التخسيس.. ولا حتى الكمبيوتر..
    ولا التليفزيون؟

    هو التليفزيون.. صح؟
    طيب المفروض إن التليفزيون يقدم إيه..؟؟
    أخبار ومسلسلات وأفلام وبرامج وأغنيات.. بتقدم قيمة ما.. "بنقول المفروض يعني مالناش دعوة باللي بيحصل دلوقت.. ما دخلناش في السياسة يا عم!"..
    طيب ماهو لو افترضنا إن الفنون بكل أنواعها رفاهية..
    ليه التليفزيون موجود في كل البيوت..
    ليه مكان التليفزيون بيكون أول حاجة بنتفق عليها
    وبعدين نحدد بقى هنحط باقي الأثاث فين؟
    ليه النقاش حوالين المسلسلات الحلوة ولا البايخة بياخد وقت كبير جدا من وقتنا..
    يبقى الأكيد إن الفنون مش رفاهية..

    بس خد بالك احنا بنتكلم عن الفن الحقيقي..
    الفن اللي له دور إيجابي ولو حتى كان الدور ده ترفيهي..
    يبقى احنا مش بنتكلم عن الفن -هو فن أصلا؟!- اللي بيقدمه نجوم الفيديو الكليب من....... واكتبوا إنتم الصفات اللي إنتم عايزينها...

    عموما دول أصلا مش قضيتنا..
    ولا أصلا مهتمين بيها..
    لأن الأكيد إن الفن الحقيقي -زيه زي كل حاجة حقيقية- هو اللي بيعيش للآخر.. زيه زي الخير والصدق والحق.. ولو مش مصدقينّا.. روحوا واسألوا سيمبا!


    بعيدا عن ده..
    احنا بس عاوزين نعرف..

    ممكن يكون الفيلم الكويس والأغنية الجميلة والمسرحية المحترمة..
    ممكن دول كلهم يكونوا زيهم زي ساندويتش الفول اللي احنا بنفطر بيه كل يوم الصبح؟
    لو كان ساندويتش الفول بيدينا الطاقة المادية اللي بتخلينا نكمل باقي اليوم والشهر والسنة والحياة..
    مش برضه الفن اللي له دور إيجابي ممكن يمدنا بالطاقة الروحية اللي تخلينا نكمل باقي اليوم والشهر والسنة والحياة..


    فكروا كده وردوا علينا..
    وممكن تستعينوا بصديق يشارككم التفكير..
    يعني ممكن تروحوا تسألوا سيمبا!
    في انتظاركم..




    الموضوع منقول من موقع
    بص وطل

    انا ناقله بس عشان اقول اني مش موافق على كل الكلام الي مكتوب .. لاني حاولت اكتب رأيي هناك ومش نافع
    ابن المهندس مهندس .. وابن الدكتور دكتور .. يبقى ابن الريس متقال الريس حجازي متقال
    S.Badr = Samy Pasha = Samy Badr


  2. #2
    عضو متميز
    صور رمزية youssef_23
    تاريخ التسجيل
    Oct 2004
    المنطقة
    ارض الله
    العمر
    35
    ردود
    7,047
    الفن فعلا مثل السكين ممكن تقتل بيه او ممكن تعد بيه اشهى الطعام

  3. #3
    عضو متميز
    صور رمزية علاء مختار
    تاريخ التسجيل
    Sep 2005
    المنطقة
    الاسكندرية
    العمر
    30
    ردود
    1,098
    ويا ترى أيه اللى مش عاجبك؟
    لا إله إلا الله
    محمد رسول الله

    سبحان الله وبحمده سبحان الله العظيم
    تذكروا اموات المسلمين بالدعاء

  4. #4
    عضو متميز
    صور رمزية emas
    تاريخ التسجيل
    Nov 2003
    ردود
    3,543
    طبعا حلوه حكايه مش عاجبك وما تقولش ايه هو ونقعد احنا كل واحد يفتى يحاول يرضيك

    هههههههههههه


    الفن شىء جميل لو استعمل استعمال صحيح

    والذى يجبر الفنان على حسن الاستخدام هو مستهلك هذا الفن


    لو المستهلك زوقه سىء واخلاقه سيئه واى شىء يرضى به ساعتها الفن سيكون كما تراه الان


    يعنى العيب ليس عيب فنان بل عيب شعب سمح لاى واحد يقول على نفسه فنان والناس ترضى بما يقدمه

    واى حمار اصبح منتجا بعد تربيه المواشى يتخرج منتج فورا

    الفيلتر هو المشاهد وليس الحكومه ولا الوزارات ولا الرقابه

    ولو هناك شعب واعى ستجد المفسدين للفن يضمروا ويتبقى القادر فقط على انتاج ما يرضى زوق الناس المرتفع



    التلفيزيون لم يعد كماله ولا اوبشن اصبح فعلا اهم جزء فى المنزل وذلك ليس لان الشعب هايف

    لان اهداف التلفيزيون اشياء كثيره جدا وليس المسلسلات ولا الفيديو كليب

    والجهاز مظلوم بما يرسل من خلاله وكما ان الشعب فيلتر فهو ايضا قادر على اختيار ما يشاهده

    اذا العيب ليس فى الجهاز ولا الارسال بل فيمن يمسك الريموت كونترول


    كنا اشد فنا لما يا باشا كان فيه باشوات يرعون الفنون وطبعا الثوره لم يعجبها الرقى

    وقضت على صناعه السينما وحقنوا الناس بما يريدوا ان ينتشر من افكار

    ورغم قربنا من السينما العالميه ايام الابيض والاسود ضعنا فى دخول الالوان

    واكمل الامريكيون المهمه وصنعوا ما لن نستطيع صنعه خلاص السبق اصبح بعيد عنا تماما




    طبعا كل هذا ليس الذى تريد انت سماعه ومتوقع فى الاخر يطلع رايك ايه بس قلت اللى عندى ورزقى على الله
    _____________
    EMADSOUND

  5. #5
    Designer
    صور رمزية S.Badr
    تاريخ التسجيل
    Dec 2004
    المنطقة
    أرض سمرا وقمرا .. وضفه ونهر ومراكب
    العمر
    16
    ردود
    1,586
    لو المستهلك زوقه سىء واخلاقه سيئه واى شىء يرضى به ساعتها الفن سيكون كما تراه الان


    يعنى العيب ليس عيب فنان بل عيب شعب سمح لاى واحد يقول على نفسه فنان والناس ترضى بما يقدمه

    واى حمار اصبح منتجا بعد تربيه المواشى يتخرج منتج فورا

    الفيلتر هو المشاهد وليس الحكومه ولا الوزارات ولا الرقابه

    ولو هناك شعب واعى ستجد المفسدين للفن يضمروا ويتبقى القادر فقط على انتاج ما يرضى زوق الناس المرتفع
    هوه ده الي انا اقصده ..
    ابن المهندس مهندس .. وابن الدكتور دكتور .. يبقى ابن الريس متقال الريس حجازي متقال
    S.Badr = Samy Pasha = Samy Badr

  6. #6
    Freelance
    صور رمزية String
    تاريخ التسجيل
    Jul 2004
    المنطقة
    Egypt
    العمر
    32
    ردود
    1,486
    انا بصراحة قعدت ادور على سيمبا ملقتوش والميزه انا الموضوع عن الفول ومتهيئلى بقول متهيئلى على حد علمى أنى المصرى الوحيد اللى عمره ما كل الفول ولا يطيق يشوفه اساسا .
    حد تانى مبيحبوش اللى مبيحبوش يرفع ايده
    ( موافقه )
    يجرى تعديل الدستور
    ــــــــــــــــــــــــــــــــــ
    Ahmed Abd Elnaby
    CG artist - compositor
    0162963777 2+

  7. #7
    Registered User
    صور رمزية Ahmed012
    تاريخ التسجيل
    Nov 2004
    المنطقة
    Cairo, Egypt, Egypt
    العمر
    32
    ردود
    2,173
    فاكرين الموضوع بتاع رجل السماء فلحص فلحوص

    المصري بطبيعته فهلوي ويعرف كل حاجه في أي حاجه

    فالناس اللي شغالين في مجال السينيما حاليا مش خريجين معهد سينيما ولا إعلام حتى ولا أي كلليه تمت بصله للإنتاج السنيمائي أو التلفزيوني

    معظمهم تجاره وحقوق وكتير منهم زراعه والفاشلين من الكليات دي هما اللي دخلوا المجال ده

    وبالواسطه أو الكوسه إشتغلوا في ماسبيسرو و بالفهلوه البليه لعبت معاه

    ده غير إن العادات السيئه أصبحت موضه !!! واللي يقوم بها واد روش طحن

    على سبيل المثال محمد سعد والشهير بشخصيه اللمبي
    اللي عمللها في 3 أفلام
    شارب الخمر على طول وماشي يطوح في الشارع بس كوميدي جدااااا
    لدرجه إن الناس بدأت تقلد الشخصيه دي وتقول زييه وتقلد طريقته في الكلام

    وطبعا أي واحد من مقلدي اللمبي بقى ليه قبول عند الجمهور والناس كللها بتتفرج عليه
    باللرغم من إن فيلم اللمبي 2 طلع فيه محمد سعد بدور ظابط شرطه أيضا ... ونجح في ذلك
    بدليل إن الناس كانت بتقلد الشخصيه دي كمان ... إلا إن معظم الفيلم بطوله الشخصيه الغلبانه أو بنت الشارع المتبهدله الكحيانه.
    على سبيل المثال ((( شبته وتكب تكااب )) (( العم بخ ))


    قام عامل محمد سعد فيلم عوكل ...... واللي طالع فيه بدور سمكري سيارات (( لا ونفسه يشتغل في مجال السينيما ))
    طبعا الفيلم كان كوميدي جدااا وحقق أرباح هائله ....
    والناس بدأت تقلد سمكريه السيارات ... وطريقتهم في الكلام (( قهوه المصريييييييييين )) (( نهر النيل تحت السرير)) إلخ


    محمد سعد قام عامل فيلم بوحه
    طالع فيه بدور جزار في المدبح ......... طبعا إنتوا عارفين النتيجه
    كل الناس بتقللد عباراته وطريقته في الكلام
    (( يادي الليله اللي زي كاللو الصباع )) (( صبح صبح ياعم الحج )) (( وشك اللي بين قوسين )) إلخ

    أنا مش بهاجم محمد سعد أبدا بالعكس
    انا ذكرته كمثال مش أكتر
    هوا حاول ينهض بالكوميديا في الأفلام المصريه
    لكن للأسف كان من أفلامه آاثار جانبيه
    زي اللي إحنا بنناقشها معاكوا هنا

    شكرا ليكم
    .........
    ولنا عوده

  8. #8
    عضو متميز
    صور رمزية emas
    تاريخ التسجيل
    Nov 2003
    ردود
    3,543
    ببساطه هناك مقوله (( الفن مرآه الشعوب ))

    لا توجد مقوله (( الفن مرآه الفنانين ))
    _____________
    EMADSOUND

  9. #9
    عضو متميز
    صور رمزية MN3M
    تاريخ التسجيل
    Apr 2003
    المنطقة
    void Egypt
    ردود
    3,021
    أهم حاجه إن إحنا نحافظ عن ثقافتنا بالفن بتاعن------------------> بمعنى إن إحنا يبقى عندنا فن و كله فى التمام بس مايبقاش على النمط الأوروبى أو الغربى..نبقى بكدا شعب فيه فن (أى نعم راقى) بس بيعكس كل قيمنا و أخلاقنا ...

    لأ .. دا إحنا المفروض منزعش إلا اللى بيتوافق معانا و يكون مصنوع بإدينا لأن ساعتها هانثق فى اللى الناس بتشوفه و نطمن على الآخر عارفين ليه؟؟

    لأن الناس بتسدأ أى حاجه تيجى فى التلفزيون أو أى وسيله إعلاميه..مثلا لو طلعت إشاعه إن أنا مت(طبعا بعد الشر عليا) و الكلام دا إتنشر و طلع فى التلفزيون..و جيت روحت عند واحد صاحبى أكيد لما يشوفنى يصرخ..و لما أقول له أنا قدامك و بين إديك حى أرزق و كمان بتنفس...

    كل اللى ممكن يقوله " يعنى أكدب التلفزيون..؟ "..

    يبقى كل اللى أقدر أقوله إن إحنا لازم نهتم أكتر بإعلامنا لأن الناس بتسدأ اللى بتشوفه..
    M HAMMAD
    M.A.Moniem

    الله--سبحان الله وبحمده سبحان الله العظيم--المستعان
    قال الأنيمتور المناضل منعم كامل :
    لو لم أكن أنيمتور لوددت أن أكون أنيمتور

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل