موضوع: عندما يتزوج عبده الرومانسي

ردود: 3 | زيارات: 512
  1. #1
    Designer
    صور رمزية S.Badr
    تاريخ التسجيل
    Dec 2004
    المنطقة
    أرض سمرا وقمرا .. وضفه ونهر ومراكب
    العمر
    16
    ردود
    1,586

    Talking عندما يتزوج عبده الرومانسي

    عندما يتزوج.. عبده الرومانسي!


    عبده الرومانسي...

    هذا هو اسم شهرتي..
    ومثلما يحب "الخطيب" لقب "بيبو" ويعجب "عادل إمام" بلقب "الزعيم"، وتهوى "نادية الجندي" لقب نجمة الجماهير"سابقا طبعا!"..
    أحب أنا لقبي..


    فهو الذي أخذ من سنين عمري الكثير والكثير... والذي أضعت فيه الكثير من زجاجات البارفان الذي أغرق به الدباديب.. واستهلكت فيه أطنانا من الورق لأكتب فيها خطاباتي الغرامية الملتهبة.. وتعاطيت بسببه 324577848 قرص باندول حماية من البرد الذي كان يحتل جسدي دون مقاومة تذكر بسبب وقوفي في البلكونة في عز المطر أنظر للقمر في بلاهة.. أقصد في هيام وأنا أهتف باسم حبيبتي وأنت متأكد أن همسي في الليل والبرد والمطر سيصلها ليدفئها ويحسسها بالأمان "فيما بعد عرفت أنه في نفس الوقت الذي أهمس به باسمها للقمر، كانت هي في عاشر نومة مطلقة ذلك الصوت الرومانسي شديد النعومة المعروف بـ"الشخير"!".

    وكان أن قررت أن أتزوجها...
    وكان أن تحقق الكابوس الذي كان يجعلني أتراجع في اللحظة الأخيرة قبل أن أغلط..
    وأتجوز!

    تغيرت المشاعر وتحولت هي إلى كائن أشبه بــ"E.T" لا هم لها سوى الأكل والشرب والهتاف بكلمة "Home".. وطبعا Home هنا ليس المقصود به الوطن.. وإنما بيت أمها ولا مؤاخذة!
    إليكم مشهد من يوم في حياتي الزوجية مع هذا الكائن الغريب.. ولكم أنتم أن تحكموا..


    ليل خارجي/ محطة الأتوبيس

    مطر ورعد وبرق "مؤثرات صوتية" عوووووو! "هذا هو صوت الرياح"

    أنا والمدام نرتعش ونتكتك من البرد الرهيب الذي حول المكان إلى فريزر No Frost، الساعة العاشرة مساء ونحن في انتظار أتوبيس النقل العام الذي لا يأتي أبدا فيما يبدو.. كنا وحدنا في المحطة -فلا يجرؤ عاقل على الخروج من منزله في هذا الجو الرهيب- .. نظرت إلى عينيها -هل تجمدت لدرجة أنها لا تتحرك؟!- وأقول لها في سهوكة: مش ممكن يا حبيبتي الجو الرومانسي ده.. علشان احنا مع بعضينا ولأول مرة لوحدينا ولا حدش بيبص علينا.. على رأي "شادية" و"عبد الحليم" .."عبد الحليم ".. الله يرحمه.. عارفه أنا لو غنيت ليك دلوقتي حبك نار.. هنتدفا!.. تحب أغنيها ليكِ.. هاغنيها.. طيب اسمعي يا ستي..حـ...
    تقاطعني في حدة وهي تضع يدها المثلجة على فمي:

    نار إيه في الجو التلج ده.. يا شيخ ارحمني.. مش دي شورتك إننا نزور الست والدتك في الجو ده.. حبكت يعني؟

    أرد عليها وأنا لا زالت أراها في رقة سنووايت كما كانت في فترة الخطوبة:
    هو فيه جو أجمل من كده، وبعدين فين روح الرومانسية والتخيل اللي عندك.. ممكن نكون في الجحيم لكن لو مع بعض تصبح جنة.. طالما أنا وإنت مع بعض عيشي اللحظة الحلوة معايا.. يعني مثلا تخيلي دلوقت إننا في جزيرة لوحدنا.. والشمس طالعة.. حاسة بالحرارة! ياه ده الجو حر قوي!.. سامعة صوت العصافير!.. شايفة الشلالات!.. شفتِ البحر لونه أزرق ازاي.. شايفة الغزال اللي ماشي هناك... شمي ريحة الهوا النقي اللي مافيهوش تلوث...
    حاسة بـ....

    تشششششششششششششششششششش!

    جاء الأتوبيس اللعين ولم يجد في الشارع كله سوى بركة المياه التي تكونت من الأمطار ليمر عليها لتغرق هدومي كلها بينما استطاعت زوجتي الحبيبة أن تتجنب ما حدث لي لأنها لمحت أضواء الأتوبيس من على بعد، بينما أنا كنت غارقا في أحلام الجزيرة والعصافير!

    ثم وبمنتهى الإخلاص وجدت زوجتي العزيزة تقفز إلى داخل الأتوبيس الذي أغلق أبوابه في سرعة -قال إيه السواق مش بياخد إلا العدد القانوني!- ثم لمحت زوجتي تفتح شباك الأتوبيس لتطل منه لتقول لي وهي تبتسم لي ذات ابتسامة دراكيولا في أشد لحظاته الرومانسية:

    باي باي يا حبيبي.. هاروح أنا البيت.. وأبقى اركب إنت الفيل بقى اللي في الجزيرة وحصلني!

    تفتكروا كان رد فعلي إيه؟
    بالظبط ده اللي حصل..
    طلقتها..
    وقعدت لوحدي في الجزيرة!
    ابن المهندس مهندس .. وابن الدكتور دكتور .. يبقى ابن الريس متقال الريس حجازي متقال
    S.Badr = Samy Pasha = Samy Badr


  2. #2
    Designer
    صور رمزية S.Badr
    تاريخ التسجيل
    Dec 2004
    المنطقة
    أرض سمرا وقمرا .. وضفه ونهر ومراكب
    العمر
    16
    ردود
    1,586

    زوجة عبده الرومانسي تتحدث

    زوجة عبده الرومانسي تتحدث


    عملا بمبدأ الرد الذي كفله الدستور للمواطنين قررت أن أرد على اتهامات زوجي الرومانسي "عبده الرومانسي" اللي نشر غسيلنا "الفلة" في كل حتة ليظهر بمظهره الرومانسي الطيب.. من الآخر ملاك وناقص له جناحين. طبعا له حق يوصفني بإني E.T وسوبر وومان كما يحلو له.. طيب أنا لا هاكلمكم ولا هاعيط لكم أنا بس هاوريكم عينة من واجباتي اليومية وافتكروني بالدعوات.
    الساعة السادسة صباحا:
    أستيقظ من النوم الصبح علشان أعمل الغدا وكمان أجهز الفطار بالمرة، ده غير إني أوضب البيت ع الماشي، وأملا أزايز المية الفاضية، وأحط الغسيل في الغسالة، وأصحي ابننا وأأكله وأحضر له شنطته علشان أوديه لماما، وأتوضا وأصلي، وأصحي "سي عبده".
    الساعة الثامنة صباحا:
    أنزل من البيت لأستقل الأتوبيس إلى ماما في الدقي ثم أكمل أنا طريقي إلى عملي في المعادي.
    الساعة التاسعة إلى الساعة الخامسة:
    عمل متواصل لأنني بحكم كوني المديرة المسئولة عن خدمة العملاء فلازم أرد على كل العملاء "اللطاف" اللي بيلعنوا "سنسفيل" الشركة وأوقات "سنسفيلي" أنا شخصيا. لأ وإيه وأستحمل رزالة ده ودلع دي ومايمنعش بالمرة كلمتين من المدير العام "متنقيين على الفرازة" عن سوء أحوال القسم من أول ما مسكته.

    الساعة السابعة:
    وأخيرا أصل إلى البيت أخيرا بعد أن أكون أكملت سباق المارثون اللي انكتب عليّ من أول الجواز لأجد زوجي الرومانسي قد ألقى "ببتلات الورد" على السجاد من أول ما أدخل البيت -الصالون- مرورا بالسفرة والطرقة اللي بين الأوض ولغاية أوضة المعيشة، وهو قاعد على الكنبة وقطرات المية اللي على شعره وريحة البارفان اللي شاممها سابع جار بتقول إنه لسه يادوبك قايم من على "التسريحة" ومشغل لي أغنية "Lady" اللي بقيت باكرهها من بعد ما كنت باموت فيها والشمع سايح على ترابيزة الأنتريه وواصل للسجاد وحارق الخشب.. تمالكت أعصابي لأسأله:
    إيه اللي إنت "عامله" ده؟

    تخيلوا يرد عليّ ويقول إيه قال إيه دي طريقة شافها في أحد المنتديات الخليجية كوصفة "لإشعال نار الرومانسية" من جديد لأنني في نظره أحتاج لعلاج من المادية اللي بقيت فيها.. صح أنا مادية لأن الولد الصغير اللي مالوش ذنب مش هياكل ويشرب ويتعالج بالرومانسية لأننا مش هندفع الإيجار رومانسية والغاز حب والنور كلام جميل..... فين وفين عقبال ما فهمته إن الحركات اللي في المنتديات دي للناس اللي عندهم بدل الشغالة أربعة ولا هو اللي هينضف اللي بهدله....... بص لي بتأني ولعب لي دور "عبد الحليم حافظ" اللي يا عيني ما نجحش في علاجي –وده كله علشان ما يعملش حاجة طبعا- وقال لي "يا خسارة زمن الرومانسية" وترنح في مشيته وانزوى في أوضة النوم وكح كحتين من بتوع مرضى السل بتوع الأفلام........ والنبي إنتم قولوا لي أعمل إيه مع الرومانسي "عبده الرومانسي" أفهمه ازاي إن الحب أفعال لا أقوال!
    ابن المهندس مهندس .. وابن الدكتور دكتور .. يبقى ابن الريس متقال الريس حجازي متقال
    S.Badr = Samy Pasha = Samy Badr

  3. #3
    Designer
    صور رمزية S.Badr
    تاريخ التسجيل
    Dec 2004
    المنطقة
    أرض سمرا وقمرا .. وضفه ونهر ومراكب
    العمر
    16
    ردود
    1,586
    منقــــــ للدعابه ــــــول
    ابن المهندس مهندس .. وابن الدكتور دكتور .. يبقى ابن الريس متقال الريس حجازي متقال
    S.Badr = Samy Pasha = Samy Badr

Bookmarks

قوانين الموضوعات

  • لا يمكنك اضافة موضوع جديد
  • لا يمكنك اضافة ردود
  • لا يمكنك اضافة مرفقات
  • لا يمكنك تعديل مشاركاتك
  •  
  • كود BB مفعّل
  • رموز الحالة مفعّل
  • كود [IMG] مفعّل
  • [VIDEO] code is مفعّل
  • كود HTML معطل