المقاسات الاستاندرد للطباعة ؟

[mohheader]

السلام عليكم ...

كنت اتمنى ان اعرف المقاسات النموذجية للتصميم ...
لاني بعد ما عدلت ديزاين لاحد الاخوة ورايح اطبع كل المطابع قالولي الورق حيهدر ...
والتكلفة كده حتزيد
المقاس كان 30 × 15 ...

المهم هل لي ان اهرف المقاسات الاستاندرد ..

او طريقة حسابها ؟


تحياتي

[Shady3D]

قالولك الورق كدا هيهدر = الورق فيه اتلاف كتير - طيب ليه قالولك كدا ؟ لانك يا بطل هتشترى الورق بالفرخ - والفرخ بيتقسم حسب ما انت عاوز لحجم التصميم - فلو كنت عاوز احسن حاجة روق لسوق الورق وشوف كمان نوع الورق الى انت عاوزو واسال على قياسه مثلا 100× 70

ولو تصميمك 30× 15 فى فرخ 100 × 70 يعنى المطبعجى هيطبع 10 وش وبعد كدا 10 قلب على الفرخ الواحد والتهدير فى الفرخ الواحد هيبقا تقريبا 70 × 15 = خسارة عليك انتا
دا غير ان فيه تهدير على الجوانب انا محسبتهولكش !!

العلمية دى بتتسمى عملية المونتاج ودى بعد التصميم ان انتا بتجهز لفصل الالوان وللطباعة + اقل نسبة اهدار
لو التصميم بتاعك لازم يكون بالقياس ده لازم تزود سعره بعد الطباعة للعميل لانو هوا الى لازم يشيلو مش انت انما لو انتا الى اقترحت القياس ده - خليك فى قياسات الفلاير
بس احسن حاجة ان انتا تعرف الاول قياس الفرخ اد ايه واديلك قياس للتصميم بحيث تطبع منو اكبر عدد فى فرخ واحد بدون تهدير

[mohheader]

^_^
مهو انا و العميل تقريبا واحد ^_^
فمش حينفع هو يشيل حاجة ^_^ ...

انا حسب ما سمعت ان الفرخ بيكون بالفعل على 100 * 70 ...

لدي بقى سؤال

ما هي المسافة الي بتكون لازمة بين الصورة والي جنبها ...ولا ممكن لاصقين في بعض ؟

بصراحة دورت كثيرا عن شيء على النت ولو بالانجليزي عن عالم المطابع
بس للاسف لم اجد شيء

مع اني لو تعلمت الموضوع ده حيفدني بعدين كثيرا قبل ما ابدأ في اي تصميم علشان اعرف اوفر في التكلفة


جزاك الله خيرا اخي zone_shady وان شاء الله كله في ميزان حسناتك

تحياتي

[mohheader]

اخي zone_shady

بعد العديد من التداول

تم الاتفاق على عمل برشور للجمعية - التي انا عضو بها -...
ولكن في اختلاف في تحديد المقاس ...

فبعد اذنك سأحكي لك الحكاية

البروشور حيكون حاجة اشبه بالكتيب ...
الصفحات تفتح من فوق لا من الجنب
( الفكرة مستوحاه من بروشور لمنتجات اصالة )

حنقول مثلا الكتيب يتكون من 11 صفحة + الغلاف
الصفحات كوشيه 115
والغلاف ورق كارتون ( حتبقى مشكلة في الافلام !!! صح ؟ ) كده حنعمل فلمين ... هل من مقترحات ؟

الفرخ ... 100 × 70 سم

في سؤال ... ما رأيك في فكرة الكتيب ؟
هل تعتبر شيء ذو جودة ؟
بمعنى شيء محترم ؟

عايز أسمع رأيك لو طلبت منك جمعية عمل لها بروشور ولم تحدد لك اي مواصفات نهائيا

( في مشكلة اخرى احب اسمع فيها رأيك ,,, )
في صفحة اسمها انجازاتنا ..

الصفحة دي مشكلتها انها عبارة عن نقاط طويلة بعض الشيء وفي حاجات ليس من السهل اختصارها


عارف اني ازعجتك ...

اسف جدا

تحياتي
وجزاك الله خيرا

[Shady3D]

السلام عليكم وصباح الخير


______________________________________________________
ما هي المسافة الي بتكون لازمة بين الصورة والي جنبها ...ولا ممكن لاصقين في بعض ؟
______________________________________________________



انسا حاجة فى الطباعة اسمها مسافات بين اى تصميم واخر - يعنى المونتاج لازم يكون كل حاجة ملاصقة للثانية
لان فيه حاجة اسمها القص فى المطبعة بعد الطباعة - والقص له خط واحد ملوش خطين .

بالنسبة للبرشور - سهل اوى متقلقش بس اهم حاجة تركز معايا .

هدى مثل بكتيب 30 سم × 21.5 سم " كدا وهوا مفتوح " ولما االكتيب يتقفل هيكون 15 سم × 21.5 تمام كدا
الكتيب ده وهوا مقفول بيكون 14 صفحة منهم 2 غلاف

طيب لو فتحت الكتيب وشلت الدبابيس ؟ هتلاقى ان الكتيب اصبح 14 / 2 = 7 صفح فقط وكل صفحة تقابل
صفحة اخرى مع الحفاظ على ارقام الصفحات - سهلة اوى كدا - هتعمل 7 تصميمات كل واحد مقسوم لتصميمن
لان كل تصميم صفحة وتحط رقم الصفحة - جرب تعمل الموضوع ده الاول على اى ورق لغاية ما تظبط معاك

بعد كدا هتمنتج الشغل - وغالبا المونتاج بيكون فى الكوريل درو وليه شغل تانى خالص غير الفوتوشوب
لانك لازم تجيب الـ 7 صفحات تحت بعض تماما بدون اى فواصل ويكونو زى صفحة الجريدة الكبيرة
او تعمل فصل الوان لكل صفحة لوحدها - بس كدا ممكن تكلفك اكثر

والغلاف لو كان ورق كارتون او اى ورق مش مشكلة كدا كدا هينطبع عليه " انتا بتتكلم فى اوفست "
انما فكرة الكتيب ان الصفحات تفتح لفوق - بصراحة غلط - طيب ليه لان الفكرة دى تمشى مع نتيجة مكتب
مع نتيجة سلك ابيض لمكتب بردو انما متمشيش مع كتيب لانو مش دفتر ملاحظات ؟ خلى بالك مش كل حاجة
تمشى مع التانية مظبوط

بالنسبة للورق 115 جرام = ممتاز بس اتاكد انو 115 جرام وكمان خلى المطبعة تعملك على الغلاف طبقة U.V
هتكلفك بس هتكون ممتازة جدا

لو جمعية طلبت منى اعمل كتيب - عاوزين كام الف منو ؟ ميعاد التسليم ؟ ميزانية الكتيب اد ايه فى حالة لو هعمل
منو 5 الاف مثلا ؟ اتفق الاول على السعر ولازم وظبطه الاول لان بعد اتفاق السعر هعرف هجيب ورق بكام
وهطبع بكام .. بعد كدا هجيب كاميرة وصور الجمعية واخد الداتا منهم وهكمل شغلى عادى ليهم .. ولازم اكسبهم

ممكن واحد يقولك " عاوز حاجة تمشى الحال " واحد تانى " عاوز حاجة محصلتش " واحد تانى " حاجة معقولة "
طبعا كل كلمة انت بتسمعها ليها تجهيز يعنى مش معقول ادى ورق تقيل وواخد سلفنة وتصميم جديد لواحد عاوز اى حاجة وخلاص
بدون اى تكلفة عليه ؟

صفحة انجازاتنا - ممكن تكون اربع صفحات فى بعض مطويين فى صفحة واحدة فى الداخل
ولما تفردها تلاقي عرضها بقا 4 اضعاف الكتيب - وبتتعمل كتير فى اغلفة المجلات عارف ليه
علشان المجلة تحط فيها كمية اعلانات كتير بسعر عالى لان دا ضهر الغلاف طبعا -

جرب بقا تعمل الصفحة دى بتتفح لفوق او لتحت ايه رايك اقتنعت ؟
التصميم بتاعك غالبا فى الكتيب لازم يكون نمط واحد او استايل واحد لان مينفعش كل صفحة بنظام
اختر 3 خطوط للعمل ككل وليس اكثر - جهز الخلفية للكتيب واحدة - جهز الداتا بتاعت البرشور + الصور
خلى بالك دائما ان الخط المنحنى اجمل من الخط المستقيم - خلى بالك ان الخط يبان من الخلفية " الوان متعاكسة "
استخدم الاوت لاين للخط ان كان لون الخط بنفس لون الخلفية - حدد مطلع الكتيب عاوزو ينبهر بالتصميم ولا بالمادة

الخلفيات لازم تكون من روح العمل - مثلا الطب - روحهم الطب واداوته واللون الابيض - ممكن تجيب صورة جهاز
رسم اشعة وتعمل لها ماسك وينتهى مع اللون الابيض بـ Fade ودى تكون الخلفية مع شوية لعب خفيف مع استخدام خط
اسود كلاسيكى - لان الكتيب رايح مثلا لدكاترة وتعاملهم مع الناس بيكون غالبا كلاسيكى

عكس مثلا ما هتعمل كتيب لحفلة فى مارينا - لازم تكون حاجة تشد جامد على اد ما تقدر

خلى بالك على اد ما تقدر تعمل فصلة الوان واحد للشغل كلو مترتب لان ممكن تاخد صفحة الوانها بايظة فى الكتيب
ساعتها المطبعة تقولك انتا جايب 5 فصلات للكتيب احتمال العيب من عندهم - ساعتها مفيش كلام منك
انما لو باعت الشغل كلو فصلة واحدة - والله تشيل المطبعة الشغل كلو بتاعتو اتغيرت وكتير بتحصل

[mohheader]

بسم الله ما شاء الله ^_^ ....

بالنسبة للتكاليف ... فلو ان شاء الله حنعمل حاجة نظيفة ( اتمنى ذلك ) حنجيب ممكن sponser ^_^
( وهو المطلوب حاجة الي يشوفها يقول وااو ) ^_^

ان شاء الله حجرب الي قلتلي عليه في بريفيو صغير كده وارد عليك ( التقسيمة نفسها )

وعجبتني اوي الفكرة الي قلتها لصفحة الانجازات ^_^

بما انك من مصر ( تقدر تحسبلي تكلفة تقريبية او مبدأية ) للبرشور بحسب تخيلك هذا ...
مثلا لنقل خمسة الاف ...
او تقلي خطواط الحساب

الي اعرفه ان الافلام ( الواحد بـ 200 ) بما انك عملتها وش و ظهر تبقى الافلام كده 400 لوحدها ( طبعا الكلام ده لو المونتاج عرف يضبط الصفحات دي كلها على ربع - نص - فرخ كامل )

فاضل سعر الورق + الطباعة + المربح ... ( ده الي لا اعرف كيف احسبه )


تحياتي
واسف جدا على الازعاج

[mohheader]

على فكرة ...

روحت عملت فرخ ( 100 * 70 )
لقيته ياخد 10 من 30 × 21,5

[mohheader]

10 = 3 كتيبات صح ؟
12 صفحة = 6 ورقات = 3 × 30 × 21.5
لان الغلاف حيبقى خارج الفرخ . صح كده ؟

[mohheader]

على فكرة اخي لو الكتيب يحتوي فقط على 8 صفحات فقط بالغلاف بدل( 14 + 2 غلاف )

هل حيبقى رفيع جدا بشكل سيء ؟؟

وبكدة يبقى الكتيب افضل ,, ولا مطوية ؟

[Shady3D]

ان شاء الله يا محمد تعمل احسن كتيب
بالنسبة لخطوات الحساب بما انك اول مرة تحسبها يبقا لازم حد يحسبهالك
شوف المطبعة لو هتطبع 5 الف هتحتاج كام فرخ تمام وشوف سعر الفرخ كام = معاك سعر الورق
وثمن الطباعة بالتسليم كام = معاك المطبعة كدا
وثمن الأفلام كام - وجمعهم ونزل ربحك انت = الثمن للعميل النهائى

وحساب الأفلام بالسنتميتر . وكل وش لازم يكون له اربع افلام لوحدو او تجمعهم وش وظهر مع وش وظهر فى فصلة واحدة
ولو الفرخ 100* 70 هياخد معاك 8 من 30*21.5 يعنى اربع صفحات وش وظهر

6 ورقات = 12 صفحة = 12 من 30*21.5 يعنى فرخ ونص
وممكن الـ 6 ورقات يكون منهم الغلافين ..

ولو الكتيب هيكون 8 ورقات وش وظهر = 16 من 30 * 21.5 والفرخ بياخد 8 يعنى فرخين

بصراحة نقطة عدد الصفحات ترجع لك انت وحسب العميل بس لو كان الكتيب 8 صفحات ايه المانع ؟