صباح شونج بونج هونج كونج

[S.Badr]

هذا الصباح وكل صباح لا يتغير سيناريو كل يوم ولكن هناك ما لاحظته مختلف
خرجت من بتنا وقابلت واحد جارنا وقلتله صباح الخير زي كل يوم لكن الغريب لقيته بيرد عليا شنج فنج لنج
استغربت من الرد لكن لاني طبعا لسه صاحي قلت يمكن انا لسه مفوقتش قلت احسن حل اني اروح لعم فتحي بتاع الفول انتشلي ستندوتشين فول علي واحد طعميه يمكن افوق واصحصح
ولسه بقول للواد ايطه صبي عم فتحي هاتلي 2 فول واحد طعميه
قالي ( تسج منج بوشو )
استغربت تاني وقولت يمكن لسه بس عشان مفطرتش
المهم كلت وقلت بقه عايزين نحبس بكوبايه شاي
وقلت في عقل بالي يله اجرب قهوه كتكوت الناس كتير بتشكر فيها وفيها مشاريب حلوه
ونديت علي جاااااااابر (علي راي العضوه سابرينا)
ابعتلي واحد شاي وصايا يا جابر
وكانت الصاعقه لي
رد جابر( بنج ميشو بونج)
بصراحه يا جماع انا اتخضيت قولت اكيد وداني جري فيها حاجه انا لازم اروح لدكتور ودان احسن انا كده شكلي بايظ خالص
المهم اتصل عليا واحد صحبي علي الموبايل ورديت عليه
ولقيته بيكلمني( شنج بونج تيشي موشي )
بصراحه التليفون وقع من ايدي من الخضه وقلت اكيد في حاجه مش مظبوطه
قلت خلاص انا احسن حاجه اشتري الجرايد دي اكيد ملهاش علاقه بالسمع دي هتبقي بعنيا والحمد لله انا شايف كويس اهو
واول ما مسكت الجرنال زي ما يكون مسكت سلك كهربا عريان
لقيت الكتابه من فوق لتحت ورسومات مش فاهم منها حاجه
وبطريقه غير اراديه قطعت الجرنال الف حته
وطبعا كان فعلي هذا مسار دهشه من رواد القهوه
وجالي واحد شكله كده عيان زيي وودانه وجعاه وعينه مش شايفه
الزبون : صباح الخير
انا: مش معقول انت بتقول صباح الخير يعني انا كويس مش عيان
الزبون: مالك يا كابتن
انا: مش عارف من الصبح بسمع حاجات غريبه وبشوف حاجات اغرب
الزبون: طب وايه يعني
انا: في ايه ايه اللي حصل
الزبون: يا جااابر هات قلم رصاص وكراسه
بصراحه انا قلت يمكن الزبون ده شاعر ولا كاتب وعايز يكتبلي قصيده ولا حاجه او رسام وعايز يرسملي صوره
الزبون : شايف القلم ده
انا: ايوه شايفه
الزبون صنع ي الصين
الكراسه صنع في الصين
قوم كده واقلب الكرسي اللي انت قاعد عليه هتلاقيه صنع في الصين
بص في قفا اللي قدامك (طبعا مش قصدي القفا مصنوع في الصين )
بس التكت بتاع القميص مكتوب عليه صنع في الصين
شايف جزمه الاخ ده صنع في الصين
الكوبايه اللي انت بتشرب فيها الشاي صنع في الصين
البراد اللي اتعمل فيه الشاي صنع في الصين
اللمبه اللي بتنور القهوه صنعت في الصين
المروحه المتعلقه في السقف صنع في الصين
كل حاجه بقت صنع في الصين
مش عايز الناس تتكلم بالصيني ليه؟
عموما هسيبك بقه عشان تشرب الشاي براحتك واقولك شونج بونج هونج كونج
يعني مع السلامه
وفعلا بدات افكر ان كل حاجه بقت في حياتنا صيني
نزلت العتبه وشوفت كل حاجه بتتباع صيني- مقشره بطاطس صيني
مفكات صيني - اقلام رصاص وحبر صيني -ملابس صيني - احذيه صيني -لوازم المنزل كلها صيني -لوازم الديكور بقت صيني وبما اني مهندس ديكور فالموضوع ده انا عارفه كويس اوي
فحسيت يا جماعه ان في حاجه غلط
تفتكرو فعلا هيجلنا يوم ونتكلم صيني ؟
ربنا يستر

بقلم : من أهل مصر .......... منقول يعني

[MNG]

هههههههههههههههههههههه
رائع و هي الحققية كله صيني على صيني ......

[sa9r]

لا عليك يا شنج بونج تيشي موشي .

[*يس*]

هههههههههههههههههههههههههههههههه

أذكر أني كنت لا اعرف غير الشاي الصيني

ايييييييه يازمن

[MNG]

الحمد لله الماكس سلم من الصينين ؟؟؟؟
ولا كان شيئ ثاني ....

[khaliiiiid]

أذكر أني كنت لا اعرف غير الشاي الصيني

هههههههه
تذكرت قصة حكاها لي احد الاصدقاء عن صديق له كان يدعي معرفته باللغة الصينية
وكان كل من يعرف عنه هذه المعلومة يطلب مته ان يكتب له اسمه باللغة الصينية .....
العفريت ....... كان يحفظ فقط كلمات الشاي الاخضر الصيني .... فقط كان يقوم بتغيير اماكن الحروف..

[downs_mass]

رة قابلت صينية ( يعني سيدة من الصين وليست صنية الشاي )

أشرت الي الكيبورد وقلت لها بالاشارة ( لانها لا تتكلم انجليزي .. عربي ةخفيف فقط )

واشرت لها فيما معناه ان كل شئ هنا صيني

الحياة في مصر بقا لونها صيني

كله من اللي سرقوا فلوسنا وسابونا للصينين

[abukatada]

شينج بونج هونج لى ........توم لى ............جيت لى.............جاكى شان..............بروس لى......وعجبى

[ZIZO]

مستقبلا (من 30 الى 60 سنة)
لن تدرس الانجليزية في المدارس
سوف يتعلم التلاميذ اما اللغة الهندية أو الصينية
لأن هذاين الدولتين إقتصادهم يتصاعد بشكل مخيف
بعكس اقتصاد العم سام

[abukatada]

مستقبلا (من 30 الى 60 سنة)
لن تدرس الانجليزية في المدارس
سوف يتعلم التلاميذ اما اللغة الهندية أو الصينية
لأن هذاين الدولتين إقتصادهم يتصاعد بشكل مخيف
بعكس اقتصاد العم سام

سمعت هيكل على الجزيرة كان بيتكلم فى الموضوع ده وقال حاجة غريبة جدا

إن الصين اللى بنقول عليها مخيفة إنتاجها السنوى يعادل أقل من ربع الإنتاج الأمريكى

وده السبب فى إن أمريكا خايفة منها ....لكن هى حاليا لاتسبب أى مشكلة للأمريكان

[y@sser]

الموضوع واضح
طول ما الشعب بياكل فول يستاهل الي يحصل
اعتقد لو بطلنا الفول ممكن نتكلم الماني
ربنا يستر