استفسار حول لوحات الفلكس

[noob25]

بسم الله الرحمن الرحيم

اخواني الأعزاء ارجو منكم ان تدلوني على موقع مختص في لوحات الفلكس
بحيث يحتوي على تصاميم ودروس .....

كما اريد ان اعرف الإسم الذي يطلق عليها بالإنجليزية حتى اتمكن من البحث


وشكراً

[noob25]

Up Up Up Up

[a_elbadry]

بسم الله الرحمن الرحيم.

أخي العزيز . إستفسارك ده غريب شوية . عشان محدش هيديك التصميم اللي أنته عاوزه على الجهاز . ولا حد هيقولك تصمم إزاي .
الحاجات دي والتركات دي هتعرفها من واقع الخبرة . وانا دلوقتي هاقولك حاجات مهمة لازم تخلي بالك منها في التصميم لما تعمل تصميم للفليكس أو البنر .

أولاً الفرق مابين الفليكس والبنر . وفي خامة جديد في مصر إسمها ( الماش ) .

الفليكس هو بيستخدم للوحات المضيئة . يعني اللوحات اللي بيكون جواها نور . عشان تنور بالليل .
أما البنر والماش ده بيكون غير مضيء . يعني بيتسلط عليه النور من الخارج . وهو بيستخدم غالباً للوحات اليوني بول . أو غير . عشان بيوفر كتير في الكهرباء من بدل ماتحط نور لكل المساحة الكبيرة دي .

ملحوظات تخلي بالك منها وانته شغال للفليكس .
1 - تخلى الـ Resolutuon بتاعك قليل . يعني تحاول تخليه مابين 25 لحد أقصي 75 وتحاول كل ماكنت اللوحة كبير تقلل عشان تكون خفيفة على الجهاز لأن أنته بتصدر بإمتداد Tiff . وهتكلم عنها في نقطة تانية .
2 - تحاول تعمل حاجة إسمها Safe Size أقل حاجة خمسة سم داير ما يدور عشان الشد والتركيب يعني متخليش كتابة أو صورة مهمة تكون في المساحة دي .
3 - حاول تبعد عن اللون الأسود والرصاصي . إلا في الحالات الضرورية .
4 - متغمقش ألوانك قوي للبنر . أما الفليكس مش مشكلة عشان هيه بتبقى مضيئة . بس برده متخليهاش غامقة قوي . يعني الرحمة حلوة .
5 - الصورة بتاعتك تكون بجودة عالية . عشان أنته بتشتغل على مساحات كبيرة .
6 - حاول الكتابات تكون ببرنامج الكورل أو الإليستراتور . عشان بتكون فيكتور والجودة بتاعتها جيدة جداً .
7 - حاول متزحمش التصميم . عشان ده بيكون في الشارع والناس ماشية واللي ماشي بسيارة . يعني محدش هيقف تحته ربع ساعة عشان يقراه .
8 - ألوانك طبعاً لازم تكون على نظام الـ C Y M K ودي حاجاة أساسية ولازم تكون عارفها .
9 - خلصت شغلك خلاص . أعمل Save As وأختار الإمتداد Tiff . وتكون مقفولة يعني دامج كل اللايرز بتاعتك مع بعض . وبعد تنسخ على إسطوانة .


متهيقلي دي الحاجات اللي تخلي بالك منها . اللي أنا فاكرها . ولو حاجاة وقفت قصادك . أنا تحت أمر سعتك في أي وقت .

أسف على الإطالة .

[noob25]

اشكرك اخي الكريم على الرد والمعلومات القيمة .....

أخي العزيز . إستفسارك ده غريب شوية . عشان محدش هيديك التصميم اللي أنته عاوزه على الجهاز . ولا حد هيقولك تصمم إزاي .

انا لا اريد شيىء على الجاهز ولكن لااحد يخلق متعلم و الغريب فعلاً هو انه لايوجد مراجع في النت
لمثل هذه الأشياء

وعلى العموم اشكرك وبارك الله فيك