ايوةةةة .. فعلا المقارنه كانت بين الكانون والـ p80

انا اول مره اسمع منك عن الـ p90


وعاجبنى فعلا انها اوبتيكال زوم 24 الشاشه 3 انش

عموما خلينا نشوف ونقرر ..

قريت كذا ريفيو انتقدو فيه النايكون p90 , وكان فيه مقارنة بينها وبين ال SX10 وكانت الافضلية للكانون
بصراحة ده زاد من استيائي , لأني لحد دلؤت شايف الصور الخاصة بالنايكون افضل بكتير سواء من حيث الالوان او الفوكس ..
بس عموما الاتنين شبه بعض جدا , الفرق بينهم فتصوير الفيديو , النايكون متقدرش تعمل زووم الا ديجيتال زووم اتنين اكس , لكن متقدرش تعمل زووم بالاوبتيكال زووم , ودي حاجة مش ظريفة خالص, وكذلك الصوت بيكون مونو مش ستيريو , وحتي ال 24x الموجودين ف النايكون مش كفء للدرجة , ف لما بتعمل زوم لحد الاخر الصورة بتبهت ...

دي صور عجبتني لل Nikon P80 , بردو محافظة علي قدرة الفوكس بتعتها















هنا صور جديدة بئة للكانون SX10















الصورة دي عجباني جدا والوانها رهيبة









شوية انتعاش













للأسف لحد دلؤت الي يكسب الكانون , لكن انا مصر علي رأيي ان النايكون افضل في الالوان وادق في الفوكس او العزل

مازال البحث جاري

صور النيكون جميله فعلا.. والعزل بتاعها رائع...

انا سمعت ان سعرها ..7500 ؟؟ هل هذا صحيح ؟

الي سعرها غالي دي Nikon D90 , اما الي بنتكلم عليها هنا Nikon P90 بسعر 360 دولار
انا اعتقادي ان اغلب الي استعمل ال Canon SX10 كانو من المبتدئين جدا , وكانو بيستعملو الاعدادات الاتوماتيك
ف عشان كدا تلاقي الصور مش اد كدا , ويمكن الي استعمل النايكون , كان بروفيشنال , ف كانت الصور طالعة احترافية اكتر , يمكن ميكنش عيب الوان كاميرا , انما عيب مستخدم ...
الريفيو ف كل المواقع للكانون 4.5 او 4.7 من 5
اما النايكون , مواقع 4.5 , ومواقع 4.0 , يمكن التقييم قليل عشان عيب النايكون في التصوير الفيديو
دلؤت يا اما اشتري الكانون , وجايز افقد روح الالوان في التصوير , وجودة الفوكس , واكسب روعة الاوبتكال زوم , والتصوير الفيديو .
او اشتري النايكون , واكسب جودة وروعة الالوان في التصوير , والفوكس الرائع , وافقد جودة تصوير الفيديو
او جايز يكون رأيي الاول في الكانون خاطئ , وانها افضل من النايكون
اعمل ايه يارجالة

يااااااه دا عيب قااااتل ..!!!!

انا محتاج تصوير الفيديو جدا ..

ودا خلانى افكر الاول فى الـ canon sx1 عشان الـ HD. بس الميزانيه : )

فقلت خلاص مش هتفرق خلينا فى الـ 10 اهو فيديو نضيف برضو

بس ان النايكون مفيهاش فيديو اوبتيكال زوم .. دا يقلل منها اووى

موضوع جامد جدا ومفيد جدا

بس انا مش فاهم فيه حاجة
اوبتيكال زوم ولينس (دى العدسة عرفتها لوحدى ) وديجيتال زوم ولوايد ومش عارف ايه وبقيت الحاجات المكلكعة دى

حد يعرف موقع كويس ابتدى منه ؟؟؟؟؟

Nikon P90 Quality SUCKS
من هنا

زند : الاوبتيكال زووم دا التقريب البصري , ده بيكون افضل من الديجيتال وانقي ..

انا هحط شوية تعريفات هنا من واحد صديقي بحاجات مهمة ف الكاميرا
------------

- Image
وده طبعا صورة الكاميرا ولما بندوس عليها بتطلعلنا صفحة جديدة فيها صور للكاميرا الا لو كانت الكاميرا لسه حديثة بيتاخروا شوية فى وضع صور ليها

2- More information
معلومات اضافية :
اول لينك تاريخ الاعلان عن ظهور الموديل ولما بندوس عليه بنلاقى تقييم اولى بيتم كتابته فى الموقع عن الكاميرا وامكانياتها وايهالجديد فيها حتى قبل نزولها للسوق
تانى لينك لو دست عليها بيظهرلى جميع الموديلات الخاصة بالماركة دى وهيا كانون فى الحالة بتاعتنا

3-Discussion
المناقشات :
اول لينك بيفتحلى القسم الخاص بالماركة (كانون) فى المنتدى الخاص بالموقع
تانى لينك بيعمل سيرش على التوبيكس الخاصة بالموديل ده

4- Owners opinions
اراء ملاك الموديل ده
اول لينك بتقرا راى الناس فى الموديل ده
تانى لينك بتكتب رايك انت

5- Prices
سعر الكاميرا فى معظم المحلات المشهورة بامريكا

6- Format
نوع الكاميرا وزى ما قولنا قبل كده بينقسم ل 3 انواع
1- compact : او البوينت اند شوت
2- DSLR - Like : الشبيهة بالاحترافية
3- DSLR : الاحترافية

7- Price (street)
متوسط السعر بالنسبة للمحلات

8- Also known as
بعض الموديلات يكون لها اسمان (اسم خاص بامريكا والاسم الاخر خاص باوربا والشرق الاوسط )

9- Release Status
يخبرنا ان كانت ما زالت موجودة فى السوق ام تم سحبها لنزول موديلات احدث

10- Max resolution
اقصى ابعاد للصورة عند التصوير على اكبر ميجا بكسل موجود بالكاميرا
لاننا زى ما احنا عارفين ان لو الكاميرا 10 ميجا بكسل على سبيل المثال احنا ممكن نصور على 10 او 8 او 5 او 3 او 2 او حتى اقل وطبعا كل اختيار بتختلف ابعاده
وفى المثال اللى احنا واخدينه الابعاد هيا 3648 فى 2736
ده معناه ان الصورة فيها 3648 بيكسل فى العرض و 2736 بيكسل فى الارتفاع
ولو ضربنا الرقمين فى بعض الناتج هيكون 9.980.928 اللى هو تقريبا 10 مليون بكسل يعنى معنى كده ان الكاميرا 10 ميجا بكسل

يعنى مثلا لو شفت صورة لما تضرب ابعادها تعرف الكاميرا دى كام ميجا بكسل
زى ما قلنا قبل كده احنا ممكن منصورش باقصى ريزوليوشن للكاميرا وممكن نصور بالابعاد دى
2816 x 2112, 2272 x 1704, 1600 x 1200, 640 x 480, 3648 x 2048
وانتوا بقا بالكالكيليتور هتعرفوا كل صورة من دول متصورة على كام ميجا بكسل

12-Image ratio w:h
النسبة ما بين العرض والارتفاع وهيا هنا 4:3 او 3:2
4:3 دى النسبة الموجودة فى شاشات الكمبيوتر اللى بنستخدمها
اما 3:2 دى اللى بنقول عليها ال wide screen

13- Effective pixels
ده الميجا بكسل الحقيقية اللى الكاميرا بتستفيد منها من السنسور
يعنى مثلا تلاقى كاميرا 15 ميجا بكسل بس الميجا بكسل الحقيقية 14.6 لان العدسة مش قادرة تغطى السينسور بالكامل ولسه فيه مساحة مش مستخدمة فى السينسور
طبعا ده مش مهم قوى فى اختيارنا للكاميرا بس انا برضه حبيت اقولكم على كل حاجة

14- Sensor photo detectors
ده الميجا بكسل اللى بيتكتب على علبة الكاميرا ولكن مش الحقيقى المستخدم زى ما قلنا فى النقطة اللى قبل كده

15- Sensor size
وبيبقى مكتوب قدامه رقم زى ده على سبيل المثال
1/2.3 وده الرقم الشائع للسينسور وعلى فكرة طبعا احنا اكيد عارفين ان 1/2.3 اكبر من 1/2.5 واصغر من 1/1.8
ما بين قوسين بنلاقى على سبيل المثال للسينسور 1/2.3 .... 6.16 x 4.62 mm وده معناه ان ابعاد السينسور 6.16 ملى فى 4.62 ملى
وهنلاقى جنبها رقم 0.28 سم مربع وده حجم السينسور
ودى صورة لشرح الفرق بين السينسورز



الرقم الاولانى اللى اتكلمنا عنه 1/2.3 هو اسلوب قديم كان مستخدم لقياس السينسور الا وهو قطر الانبوبة الزجاجية التى يوجد بنهايتها السينسور ولكن الا يجب ان يتجاوز حجم السينسور ثلثى قطرها والا فالمساحة الزائدة لن تكون مستخدمة

سورى ان كنت دخلت فى تفاصيل معقدة بعض الشئ

16- Pixel density
الموضوع ده ابتدوا يكتبوه حديثا فى بعض المواقع ... الا وهو كثافة الميجابكسل بالنسبة للسينسور يعنى ايه ؟؟؟
دلوقتى احنا قلنا ان الكاميرا دى 10 ميجا بكسل وحجم السينسور بتاعها 0.28 سم مربع طيب لو كان السينسور حجمه 1 سنتى متر مربع المقابل ليها من الميجا بكسل كام ؟؟؟(بضرب طرفين فى وسطين .... 10 فى 1 على 0.28 الناتج هيكون) 35 ميجا بكسل فى السنتى متر المربع.... يا ترى هل ده رقم حلو ؟؟؟ لا طبعا ده معناه انى بكبس 35 مليون نقطة فى سنتى متر مربع او انى بكبس 10 مليون نقطة فى مساحة صغيرة لا يتجاوز حجمها ثلث السنتى متر مربع

طيب نيجى لكاميرا تانية كانون برضه اسمها 1000D بس نوعها DSLR
الكاميرا دى 10 ميجا بكسل برضه بس ابعاد السينسور بتاعه 22.8 فى 14.2 ملى يعنى حجم السينسور بتاعها 3.28 سنتى متر مربع
لو حبينا نحسب كثافة الميجا بكسل للسنتى متر الواحد (بضرب طرفين فى وسطين ايضا 10 فى 1 على 3.28 ) هلاقى النتيجة طالعة 3.1 ميجا بكسل فى السنتى متر المربع
وطبعا فرق شاسع ما بين 35 ميجا بكسل فى السنتى و 3.1 ميجا بكسل فى السنتى
زى انى احط 35 حصان فى مساحة محدودة قدرها 100 متر وما بين انى احط 3 بس فى نفس المساحة

طبعا ده بيفرق فى جودة الصورة
يا رب تكون المعلومة وصلت يا دكتور بلال

17- Sensor type
وهما نوعين CCD و CMOS
كل نوع منهم ليه مميزاته وعيوبه وممكن نبقى نحط مقارنة ما بينهم بعدين بس بصفة عامة مش هو ده اللى هيفرق معانا فى اختيار الكاميرا

18- Sensor manufacturer
الشركة المصنعة للسينسور

19- ISO rating
زى ما قلنا قبل كده دى حساسية السينسور للضوء
الايزو الطبيعى للكاميرات هو 100 واوقات ممكن نستخدم 80 لكن لو بنصور فى جو مظلم مثلا والصورة طالعة ضلمة ممكن نود الايزو نخليه 200 هنلاقى الصورة منورة شوية وتفاصيل اكتر بتبان
ولو خليناها 400 هتبان تفاصيل اكتر و 800 تبقى اكتر و 1600 اكتر واكتر
بس ما نخليش الارقام تخدعنا لانهم بيزودوها كسياسة تسويقية مش اكتر
لان فى الكاميرات الرخيصة اللى بنشتريها كل ما نزود الايزو النويز اللى فى الصورة بيزيد ودى صورة بتبين الفرق ما بين صورة ملتقطة بايزو 100 و ايزو 800



-----

الموضوع ده هنا بئة ومفيد جدا , هيفيد اي حد مبتدئ ف موضوع الكاميرات

http://www.ournormandy.com/forum/showthread.php?t=60385

الله ينور عليك يا كريم

جزاك الله خيرا .. معلومات مفيدة جدا , واللينك الى انت حاطيته مفيد اوى بردوا ,

انت قومتها فى دماغى انى اشترى كاميرا بدل ما كنت هاحدث الجهاز