يعني إيه سياسة الإستخدام العادل
في بيع الشقق
يعني أبيعلك شقة تلات أوض بكامل سعرها اللي هو أصلا أغلى من السعر العالمي
ونبقى كاتبين في العقد مساحة الشقة أكبر من مساحتها الحقيقية اللي إنت مديهالي
وما اقدملكش اي خدمات زي الأسانسير والصيانة مثلا
وفي النهاية يبقى من حقك تستخدم أوضة واحدة بس
علشان ما تزحمش الشقة
وأأجر أنا الأوضتين الباقيين مفروش - وهو ده العدل
البلد فيها أزمة مساكن يا أخي خلي عندك دم !!!
-
سياسة الإستخدام العادل للسيارات
يعني أبيعلك عربية كاش بكامل سعرها
اللي هو أغلى من سعرها وهي طالعة جديدة لانج من المصنع
بس كل يوم الصبح لازم توصل تلاتة أصحابي شغلهم
وأنا اللي ها ألم الأجرة وأحطها في جيبي
ماهو العربية فيها خمس كراسي يا جدع خلي إستخدامك عادل أومال
وأهو نوفر زحمة المواصلات هو البلد ناقصة زحمة يعني
-
ليه سياسة الإستخدام العادل سياسة إشتراكية تقدمية ؟؟؟
لأن هو ده المفهوم الجديد للإشتراكية
وهي إن رجال الأعمال أصحاب شركات الإنترنت
اللي هما أصلا بيعملوا بلايين بسبب إحتكارهم للسوق
لازم - تشاركهم - في فلوسك
ولازم وزارة الاتصالات وجهاز تنظيم الاتصالات
اللي هما بيفترض فيهم انهم في صف المستخدم
لازم يدعموا رجال الاعمال المحتكرين في سرقتهم لينا
لازم تساعدهم إنهم يبيعوا نفس سعة الباندويدث لمستخدم وإتنين وتلاتة
زي بالضبط اللي بيبيع شقة لأكثر من ساكن
بدون أي سعي لتطوير الخدمة لتواكب عدد المستخدمين
يعني هما عندهم عشر خطوط
يرضيك يبيعوهم لعشر مشتركين بس ؟؟؟
ومية تانيين يتحرموا من الخدمة لأنة الشركة مش عاوزة تشتري بضاعة من اللي بتبيعها للناس
قلب عيشك يعني بالبضاعة الموجودة
وحصيرة الصيف واسعة
ولقمة هنية تكفي مية
وبكده يا حلو يبقوا بيبيعولك الهوا في أسلاك