I am all for you Hoss

يعني ياريت كله يعيد النظر في الاجازه

واحنا قدامنا تحدي كبير

التحدي بالظبط هو اننا مختلفين في الاهداف

يعني فري عاشق ماكس عاوز ينتج اعمال للبيع .. تمام
والفريق التاني عاوز الفريق يستمر في التعلم والانتاج يجي براحته ........ معقول برضه

انا شايف ان التقسيم دا ممكن لكن يكون بشكل غير معلن

يعني البسيوني جايب شغل للفريق ...... ودا كويس ومربح
يبقي نسيبه ختار ناس مححده للانتاج معاه

الناس اللي هو يحددهم

اما الباقي الفريق فيستمر انه يتعلم ويعرض اعماله ويطلب اسطوانات ويحضر الاجتماعات
واللي مستواه يتقدم يترقي للانتااج مع احمد

وبكده نكون مشينا في الاتجاهين

ويفضل البسيوني هو الرئيس برضه ....... لانه الاحسن

ايه رأيكو ؟

بسيونى الرئيس
اوك
انا موافق

رأيي هو رأيك بالظبط , حرفياً , يا حسام


وهو ده الي انا وبسيوني بنقوله من الصبح

طيب فين التقسيم

التقسيم لسه هيتحدد لأن في ناس غايبة مش عارفين مصيرهم

كنت عايز أقول إني هاعمل ال rigging وال character animation علي المايا

لذا, كل ما واحد منكم مستواه يتقدم في المايا , هيبقي له فرصه أكبر إنه يشتغل معايا في التحريك ,


إنما بقية الشغل, المودلنج والاكساء والاضاءة والرندر هيبقوا علي الماكس عادي

عمرو ..انت نسيت احنا اتفقنا علي ايه امبارح !!! الانيمشن هايقوم به الفريق الاساسي كله . لانه أهم جزء المشروع

يعني ماكس ومايا .

بدون مبالغه .. أحمد تيكا هو أفضل عضو في mgs حتي الان

افضل عضو في رايي هو محمود عوف ويوسف

والباقي كلهم كويسين

الفريق - الحمد لله - كل اعضاءه محترمين

السلام عليكم


بس حبيت أوضح موقفي من الأوضاع الي حاصلة في الفريق اليومين دول



أولا , لو دخلنا في دوامة مين أحسن عضو في الفريق ومين أحسن واحد فينا , يبقي بدأنا أول طريق الانهيار


تاني حاجة , موضوع رئيس الفريق , أحب أوضح حاجة , إنه مفيش ممول لأعمالنا , يعني مفيش واحد مننا جايب الباقي عشان يشتغلوا عنده ويديلهم مرتب

يعني موضوع مين يقوم بالاعمال التنظيمية ( الي لسه لغاية دلوقتي مش فاهم بالظبط هي ايه ) هو ده الي نتكلم عنه

وده في رأيي يبقي بالتناوب , يعني يتغير كل شهر مثلاً , مفيش واحد كده يبقي اسمه رئيس الفريق للأبد

وانا شخصياً مش هاقبل أبداً بإن واحد يفضل الرئيس للأبد , ولو النظام كده يبقي انا أول واحد خارج

تالت حاجة ,موضوع تقسيم الفريق , أول حاجة التفريق ضروري بين الناس الي بتعمل شغل والناس الي ما بتعملش , يعني فرضاً إننا عملنا مشروع وكملناه ( حجا مثلاً ) , يقوم مثلاً واحد اسمه mohab_gold يقبض أجر عن المشروع ده لأن إسمه كان مكتوب في لسته الأعضاء أول لما الفريق أنشأ ؟ يعني واحد ولا شارك ولا اشتغل بنسبة 0.001 % من المشروع ويقوم يقبض بس لأن اسمه مكتوب؟

يبقي ايه الحل هنا ؟

الحل هو ببساطة , الي يشتغل يقبض , الي ما يشتغلش ما يقبضش ,

وبما إننا كلنا مش شخص واحد , فمستوياتنا مختلفة عن بعضها , الي هيقدر يقدم أفضل شغل هو الي هيتحط شغله في المشاريع ( الي هتتسلم للقنوات الفضائية - يعني مش أي شغل ) , يبقي الناس الي مستواها مش قد كده نعمل فيهم ايه ؟ نرميهم في الشارع ؟ طبعاً لا ! الي مستواه ما يؤهلوش للشغل في مشاريع كبيرة زي دي , يقعد يتفرج علي الناس الي بتشتغل وياخد منهم خبرة , واحنا لسه بادئين والطريق قدامنا طويل بإذن الله , الي مستواه دلوقتي مش كويس بكرة يبقي كويس ويبقي من الأعضاء الأساسيين في الفريق

رابع نقطة , انا بصراحة شايف إنه كلنا بلا استثناء لأي حد لسه قدامنا كتير نتعلمه , ولسه في حاجات كتير جداً في البرامج دي الي بتستخدم في عمل الأنيميشن ولا نعرف عنها أي حاجة , والفريق بمستواه الحالي لا يصلح لانتاج أي اعمال ناجحة ,

يبقي ايه الحل ؟ نلغي الفريق؟

طبعاً لا ! نتعلم الي ناقصنا , والي ناقصنا ده يبقي ايه ؟ character rigging , setup and animation , وكل المتعلق بالموضوع ده من bones , ik , fk , character control ده بالاضافة لتقنيات التحريك وال keying ذاتها , والي شايف إنه بصراحة مفيش حد يعرف عن الحاجات دي ما يكفي لإنتاج أعمال في هذه الضخامة , أعمال تعرض علي القنوات الفضائية


طيب والحاجات دي عشان تتعلموها علي الماكس قدامكم ما لا يقل عن سنة , لأن مفيش مصادر تعليمية للحاجات دي علي الماكس , لأن صناعة الجرافيك العربية توقفت عند النمذجة والاكساء والرندر , والهدف الرئيسي من البرامج دي الي هو الانيميشن مهمل تماماً !!


طيب ايه الحل ؟ تقعدوا تجربوا لغاية لما توصلوا لحاجة ؟ تقعدوا سنة ولا اتنين عشان تعرفوا تطلعوا عمل محترم ؟

ولا حد بيفكر في تحريك جاهز بالكراكتر ستوديو ؟ انا لسه شايف إمبارح كليب معمول بالكراكتر ستوديو ( كان واضح عليه !! ) وكان عمل أقل ما يقال عنه إنه غبي , شخصية عمالة تمشي وتجري وتتشقلب وترقص , واضح إنه كان بيجرب كل الحركات الي موجودة في الكراكتر ستوديو , فأدي شكل بهلوان مش شخصية في فيلم !! ده غير الحركة الي أقل ما يقال عنها إنها سيئة والتنقل من حركة لحركة بيبقي قمة في الغباء , وأقدر أقول لكم إن أعمال زي دي مش هتتباع


لا انا عندي حل أسهل !

انا هاعلمكم كل الكلام ده , ومش علي الماكس حتي , علي المايا , هاخليكم محترفين تحريك شخصيات علي المايا ,هاعمل لكم قعدات كده تيجوا فيها عندي البيت وأعطيكم خلاصة كل قراءاتي والساعات الطويلة الي قعد أتعلم فيها التحريك , طبعا معظمكم بيفكر , هو انت أصلاً ليك في التحريك , طيب فين أعمالك ؟ , لكن انا الحمد لله تعلمت دلوقتي تحريك الشخصيات الحركة الطبيعية , تحريك يوصل لمرتبة الأفلام الريالتي مش بس أفلام كارتوون , وبقالي فترة مستني حد يجيب لي شخصية جحا عشان أظبطها وأوريكم شغلي عليها , لكن مش عارف أجيبها منين , آخر لما هازهق هاصممها انا من تاني ويبقي انا عملت الفيلم كله

شوفوا , عرض ماحصلش ومش هيحصل ومش لأي حد لا في المنابر ولا في العالم العربي كله إلا ليكم , هتيجوا عندي البيت في مواعيد هنحددها وهاعلمكم المايا , النمذجة والاكساء والكلام ده بس هيبقي تعريف بسيط لأنكم أصلاً فيه اساتذنا , بس هاعرفكم الحاجات الي بتعملوها علي الماكس دي بتتعمل ازاي علي المايا , وبس هتعرفوا الفروق ( البسيطة ) بين الاتنين وتبقوا في المايا زي ما انتم في الماكس وأحسن , بالاضافة إلي هاعلمكم اعداد وتحريك الشخصيات من نوعية التحريك في أفلام الريالتي !! وبعد الدورة ( المجانية ! ) دي هتبقوا في المايا أحسن ما كنتم في الماكس !!! لأنكم في الماكس توقفتم عند الصور الثابتة , انا بقي هافتحكم لكم الطريق إلي عالم التحريك


العرض ساري طول فترة أجازة نص السنة , الي عايز يجي أهلا وسهلا , الكل مرحب بيه , لكن يا ريت العدد ما يزيدش في المرة الواحدة عن 5 أشخاص , ويا ريت الي يجي يكون : من فريق mgs ( مش هاخد حد من برة ) , ويكون عنده فكرة عن الماكس والثري دي أصلاً , علشان يعرف يسلك في الموضوع ده

والي عايز يجي يكلمني علي المسنجر ما يكتبش في الموضوع هنا

ملحوظة : الشرح كله بالعربي طبعاً !

اشوفكم علي خير , سلام

طيب يا شباب , معلش , العدد هيبقي 3 بس في المرة الواحدة

هاى شباب

معلش ياجماعه انا مش هكون معاكم فى الفريق عشان محتاج انى احسن مستوايا شويه

وان شاء الله احسن مستوايا فى اسرع وقت ممكن عشان ادخل فى فريق المنصوره

وانا تحت التدريب


واشكركم

تحياتى بندق

ياريت ياجماعة مانكبرش الموضوع وناخد الأمور ببساطة لأن الموضوع مش مستاهل الدوشة دى كلها

قدرتك على الابداع والتميز تنبع من داخلك وثقتك بنفسك وقدراتك فى المجال اللذى تنوى التخصص فيه ومالوش صلة بفرق العمل

يعنى كل واحد يشوف مصلحته وبلاش التصرفات الطفولية دى وخلونا نتفادى الخطأ الاعظم اللى بيقع فيه العرب دايما وهو التنازع على القيادة وكل واحد يطور قدراته ويتجاهل محاولات اعداء النجاح لهز ثقته بنفسه وان شاء الله يصل الى مايريد.

أهلا بالشباب ..
إيه أخباركم ..
الامتحانات طحن يا رجالة ..
ربنا يوفق الجميع ..

أنا كمان هتعلم التحريك على الماكس يا عمرو .. وانا بدأت فيه بالفعل من فترة .. بس تركته بسبب الدراسة ..
بمافيه character rigging , fk and ik systems والحركة الطبيعية والذي منه ..
التعليمي التابع لماكس غني جدا بالدروس المفيدة في المجال ده ..
ربنا يوفقك ..

الفكرة اللي عاجباني جدا في الموضوع كله .. هو إننا يكون لينا مكان محدد في أجازة نص السنة بالتحديد .. علشان نبدأ الشغل .. وأوعدكم كلكم . على اسبوع واحد هيبقى مستويانا كلنا زي بعضها مع الفروق الطبيعية ..
وهننتج شغل جامد .. وهنتفق إن شاء الله ..

ربنا يوفق الجميع...